كيەۆتەگى ديپلوماتيالىق كورپۋسقا قازاقستاندىقتاردان ەۆاكۋاتسيالاۋ بويىنشا ءوتىنىش تۇسكەن جوق - س ءى م

استانا. KAZINFORM – ق ر س ءى م رەسمي وكىلى ايبەك سمادياروۆ ۋكرايناداعى جاعدايعا قاتىستى تۇسىنىكتەمە بەردى. بۇل تۋرالى ۆەدومستۆونىڭ باسپا ءسوز قىزمەتى ءمالىم ەتتى.

ونىڭ سوزىنشە، قازاقستاننىڭ ۋكرايناداعى ەلشىلىگى شتاتتىق رەجيمدە جۇمىس ىستەپ كەلەدى.

- ءبىزدىڭ ۋكرايناداعى ەلشىلىگىمىز شتاتتىق رەجيمدە جۇمىس ىستەپ كەلەدى. سىرتقى ىستەر مينيسترلىگىندە الەمدەگى جاعدايعا مونيتورينگ جاسايتىن ارنايى احۋالدىق ورتالىق بار. ءبىزدىڭ مالىمەتىمىزگە سايكەس كيەۆتەگى شەتەلدىك ديپلوماتيالىق كورپۋس ءوز جۇمىسىن جالعاستىرۋدا جانە ازاماتتارىن ەۆاكۋاتسيالاپ جاتقان جوق. قازاقستاندىقتاردان دا ەۆاكۋاتسيالاۋ بويىنشا وتىنىشتەر تۇسكەن جوق جانە قازىرگى ۋاقىتتا ارنايى ۇشاقتاردى جىبەرۋ جوسپاردا جوق، - دەدى ول.

سونىمەن قاتار، ايبەك سمادياروۆ ۋكراينادا قازىر 300-گە جۋىق قازاقستان ازاماتى بولۋى مۇمكىن ەكەنىن ايتتى.

- وزدەرىڭىز بىلەتىندەي، ۋكراينادا سوعىستىڭ جالعاسىپ جاتقانىنا ەكى جىلدان استى. كەتەمىن دەگەن ازاماتتار ەلدەن شىعىپ كەتكەن. ءبىراق ءبىزدىڭ ەسەبىمىز بويىنشا ۋكراينادا قازىر 300-گە جۋىق قازاقستان ازاماتى بولۋى مۇمكىن. ناقتى سانىن ايتۋ قيىنعا سوعادى. وعان قاراماستان، بىرنەشە كۇن بۇرىن ءبىز ۋكرايناداعى قازاقستاندىقتارعا ەل اۋماعىنان كەتۋ تۋرالى حابارلاما جاسادىق. قازاق ديپلوماتتارى ءوز جۇمىسىن تياناقتى اتقارىپ كەلەدى، ەگەر وتانداستارىمىزدان ءوتىنىش تۇسكەن جاعدايدا ولارعا بارلىق قاجەت كومەكتى كورسەتەمىز. دەگەنمەن، جاعدايدىڭ ودان ءارى دامۋىنا بايلانىستى ءوز ارەكەتىمىزدى جاسايمىز، - دەدى س ءى م رەسمي وكىلى.

ەسكە سالساق، بۇعان دەيىن پرەزيدەنت ۋكرايناداعى احۋالدىڭ ۋشىعۋىنا بايلانىستى شۇعىل شارالار قابىلداۋدى تاپسىرعانى حابارلاندى.

سونداي-اق، پرەمەر-مينيستر ۋكراينا توڭىرەگىندەگى جاعدايعا بايلانىستى شۇعىل جيىن وتكىزدى.

اۆتور

اينۇر تۋماكبايەۆا