كىتاپ وقۋ ادەتىن قالاي قالىپتاستىرۋعا بولادى؟
استانا. قازاقپارات - كىتاپ وقۋعا دەگەن قىزىعۋشىلىقتى قالاي جانداندىرۋعا بولادى. بۇگىندە زاماناۋي كىتاپحانالار، فەستيۆالدار مەن كىتاپ مارافوندارىنا قاراماستان تۇراقتى وقىرماندار سانى ءالى دە از. تولاسسىز اقپارات اعىنى پەن الەۋمەتتىك جەلىنىڭ ىقپالى وقۋ ادەتىن ەكىنشى ورىنعا ىعىستىردى. سونىمەن، كىتاپ وقۋدى قالاي جانە نەدەن باستاعان دۇرىس؟
الەۋمەتتىك جەلىلەردەگى جاڭالىقتار، تەلەفونداعى ءتۇرلى حابارلامالار ادامنىڭ كوڭىلىن اۋلاپ، كىتاپ وقۋ ادەتىن بىرتىندەپ ىعىستىردى. سيفرلاندىرۋ داۋىرىندە ءتىپتى ەڭ كىتاپقۇمار جاننىڭ ءوزى وقۋدان جالىعاتىنى جاسىرىن ەمەس. «كىتاپ وقىماۋ سيندرومى» بىرنەشە جىلعا سوزىلۋى مۇمكىن. وسىنداي جاعدايدى جاقسى بىلەتىن استاناداعى كىتاپ كلۋبىنىڭ مۇشەلەرى وقۋعا قايتا ورالۋعا نە كومەكتەسەتىنىن جاقسى بىلەدى.
ۆيولەتتا كيم، كىتاپ كلۋبىنىڭ ۇيىمداستىرۋشىسى:
- كەيدە مەندە ەكى اپتا بويى قولىما كىتاپ المايمىن، ءبىراق كەيىن قايتادان ءوز ادەبىمە ورالامىن. نەگىزى كىتاپ وقىماۋ دا قالىپتى جاعداي. دەگەنمەن وقۋدى ۇناتساڭىز، بۇل جولدا ەڭ ماڭىزدىسى - تۇراقتىلىق. پروتسەسسكە تولىق بەرىلىپ، الاڭداماي وقىساڭىز بۇل ادەت ءتيىمدى ءارى ناتيجەلى بولادى.
دارحان جۇماعازين، استانا قالاسىنىڭ تۇرعىنى:
- باستاپقىدا كىتاپ قىزىقسىز بولۋى مۇمكىن، وندايدا الدىمەن ءتارتىپ ماڭىزدى. ءوزىڭىزدى كۇنىنە كەمىندە 10-15 بەت وقۋعا داعدىلاندىرۋ كەرەك. ال كەيىن بۇل ادەتكە اينالادى. كۇندەلىكتى كۇيبەڭ تىرشىلىكتە مۇنداي كلۋبتار قارايىپ قالماۋعا كومەكتەسەدى. مەن كىتاپ كلۋبىنىڭ كەزدەسۋلەرىنە قاتىسىپ جۇرگەن سوڭ ءجيى كىتاپ وقي باستاعانىمدى بايقادىم. سەبەبى كەزدەسۋلەردە كىتاپتىڭ مازمۇنى تالقىلانادى. ال ەگەر شىعارمانى وقىماي بارساڭ، ءوزىڭدى ىڭعايسىز سەزىنەسىڭ. سوندىقتان ءوزىمدى تارتىپكە سالىپ، كىتاپ وقۋعا ماجبۇرلەيمىن. وسىلايشا پايدالى ادەت قالىپتاستىرامىن.
بۇل جەرگە كىتاپ وقىپ، پىكىر الماسىپ، شىعارمادان العان اسەرمەن ءبولىسۋ ءۇشىن كەلەدى. ورتاعا كەز كەلگەن ادام قوسىلا الادى. كىرۋ تەگىن. ەڭ باستىسى بۇل - شابىت سىيلايتىن جانە وقۋعا دەگەن قىزىعۋشىلىقتى ارتتىراتىن ورتا.
ۆيولەتتا كيم، كىتاپ كلۋبىنىڭ ۇيىمداستىرۋشىسى:
- ءبىز ءۇشىن كىتاپ قۇمار جاننىڭ جاسى دا، جىنىسى دا، كاسىبى دە ماڭىزدى ەمەس. ءبىزدىڭ كلۋبتا 18 جاستان باستاپ، 50 جاستان اسقان ادامدار بار. ءبىز ءار اي سايىن جينالىپ، كىتاپتاردى تالقىلايمىز جانە كەلەسى ايدا قانداي كىتاپ وقيتىنىمىزدى بىرگە تاڭدايمىز.
ەدۋارد ياشكوۆتا كىتاپ وقۋ ادەتى بالا كەزدەن بويىنا سىڭگەن. اناسىنىڭ ەرتەگىلەرى ونىڭ ادەبيەتكە دەگەن سۇيىسپەنشىلىگىن وياتتى. ەدۋارد ءۇشىن كىتاپ وقۋ جاي عانا حوببي ەمەس - بۇل ءومىر سالتى.
ەدۋارد ياشكوۆ، استانا قالاسىنىڭ تۇرعىنى:
- اتا- انانىڭ بالا كەزدەن كىتاپ وقۋ مادەنيەتىن قالىپتاستىرۋى وتە ماڭىزدى. ەگەر ساعان كىشكەنتاي كەزىڭنەن باستاپ كۇندەلىكتى كىتاپ وقىپ بەرسە، ونى كورىپ وسكەن ادام، ۋاقىت وتە كەلە ءوزى دە قىزىعىپ، وقي باستايدى. وقۋدى وزىڭە ۇنايتىن، اتاۋى نەمەسە قىسقاشا سيپاتتاماسى قىزىقتىراتىن كىتاپتان باستاۋ كەرەك.
جاس وقىرماندى قىزىقتىرۋ ءۇشىن ءسوز عانا ەمەس، كورنەكى بەينە دە ماڭىزدى، دەيدى بالالار جازۋشىسى جانە يلليۋستراتور ايسۇلۋ الماسبايەۆا.
ايسۇلۋ الماسبايەۆا، يلليۋستراتور، بالالار جازۋشىسى:
- ءبىز الەۋمەتتىك جەلىلەرگە تىم تاۋەلدى بولىپ كەتتىك. قازىر Instagram نە Facebook-تاعى پوستتاردان ۇزاق ءماتىندى، ارتىق نارسەنى وقۋعا قينالامىز. بۇل ميدىڭ دەگراداتسياسىنا اكەلەدى. بالالاردى وقۋعا قىزىقتىرۋ ءۇشىن ءبىز ساپالى كونتەنت پەن جاقسى يلليۋستراتسيالارعا ءمان بەرۋىمىز كەرەك.
شەتەلدە كىتاپ تەك وقۋ ءۇشىن ەمەس، ويىن تۇرىندە دە ۇسىنىلادى. ياعني ينتەراكتيۆ قوسىلعان: QR ،VR تەحنولوگيالارى ارقىلى بالا ۆيرتۋالدى الەمدە كورە الادى، مۋزىكا تىڭدايدى. بۇل قازاقستانعا دا بىرتىندەپ ەنىپ جاتىر. سيفرلىق تەحنولوگيا داۋىرىندە كىتاپ وقۋ ادەتىن ساقتاۋدىڭ ءوزى سىناقتان وتۋمەن تەڭ. ءبىراق ءبىر بايقاعانىمىز دۇرىس ورتا قۇرسا، كىتاپقا دەگەن قىزىعۋشىلىقتى قايتارۋعا بولادى. پىكىرلەس جانداردىڭ قولداۋى جانە ادەبيەتكە دەگەن شىنايى ماحاببات ءوز ناتيجەسىن بەرەدى. دەمەك كىتاپتار ءومىرىمىزدىڭ ماڭىزدى بولىگى بولىپ قالا بەرەدى.
وتكەن جىلدىڭ سوڭعى توقسانىندا وقىرمان سانى كۇرت ازايعان. قازىر ەل اۋماعىندا 4 مىڭعا تارتا كىتاپحانا بار. وعان 5,7 ميلليون ادام جازىلىپتى. بۇل %7- عا از كورسەتكىش. كىتاپحانا قورى دا ءبىرشاما ازايىپتى. سەبەبى ەلدە كىتاپ شىعارۋ ءىسى باسەڭدەگەن.
دەگەنمەن ءتۇرلى باسپادان شىققان ەڭبەكتەردى ساتىپ الىپ وقيتىندار كوبەيىپتى. ەڭ بەلسەندى وقىرماندار الماتىدا تۇرادى. ءار وتباسى ءبىر توقساندا 2 جارىم مىڭ تەڭگەسىن كىتاپقا جۇمساعان. ءتىزىمدى استانا مەن قىزىلوردا وقىرماندارى جالعايدى.
24.kz
