ۇكىمەت بۇرىن-سوڭدى بولماعان ينفراقۇرىلىمدىق جاڭعىرۋ جوسپارىن ازىرلەيدى

پرەزيدەنت وڭدەۋ ونەركاسىبى دە قارقىندى دامىپ كەلە جاتقانىن ايتتى. ونىڭ جالپى ىشكى ونىمدەگى ۇلەسى 14 پايىزدان استى. بۇل - ۇلتتىق ەكونوميكانى ءارتاراپتاندىرۋ باعىتىندا جۇرگىزىلگەن جۇيەلى جۇمىستىڭ ناقتى ناتيجەسى.

- التىن-ۆاليۋتا رەزەرۆى مەن ۇلتتىق قور اكتيۆتەرىنىڭ كولەمى 130 ميلليارد دوللاردان استى. ەندى وسى قۋاتتى الەۋەتىمىزدى ينفراقۇرىلىمدى جاڭعىرتۋعا، ەلىمىزدىڭ ءار ايماعىن كوركەيتۋگە باعىتتاۋىمىز قاجەت. سوندىقتان مەن بۇعان دەيىن ايتقان اۋقىمدى قۇرىلىس باستاماسىن بەلسەندى تۇردە جۇزەگە اسىرۋدى تاپسىرامىن. سوعان سايكەس بۇكىل ەل بويىنشا اسا قاجەتتى الەۋمەتتىك، كولىك جانە ينجەنەرلىك ينفراقۇرىلىم نىساندارى سالىنادى. ۇكىمەت بۇرىن-سوڭدى بولماعان ينفراقۇرىلىمدىق جاڭعىرۋ جوسپارىن ازىرلەيدى. بۇل اۋقىمدى جۇمىستى ىسكە اسىرۋ ءۇشىن 2029 -جىلدىڭ سوڭىنا دەيىن ۇلتتىق قوردان شامامەن 6,5 تريلليون تەڭگە بولىنەدى. بيىل جانە 2027 -جىلدىڭ العاشقى ەكى ايى ىشىندە الەۋمەتتىك جوبالاردى ىسكە قوسۋ ءۇشىن 1,5 تريلليون تەڭگە كولەمىندە قاراجات قاراستىرۋ قاجەت، - دەدى مەملەكەت باسشىسى.

بيىل ەلىمىزدىڭ جالپى ىشكى ءونىمى 400 ميلليارد دوللارعا جۋىقتايدى 

- وسى ورايدا الەۋمەتتىك-ەكونوميكالىق ماڭىزى بار نىساندار سالۋعا جانە ونى جاڭعىرتۋعا ەرەكشە ءمان بەرەمىز. بۇعان ءبىزدىڭ كۇشىمىز دە، مۇمكىندىگىمىز دە جەتەدى. حالىقارالىق ۆاليۋتا قورى ۇسىنعان بولجامعا سايكەس، بيىل ەلىمىزدىڭ جالپى ىشكى ءونىمى 400 ميلليارد دوللارعا جۋىقتايدى. ونىڭ جان باسىنا شاققانداعى ۇلەسى 19 مىڭ دوللاردان اساتىن بولدى، — دەدى قاسىم-جومارت توقايەۆ.

بۇل رەتتە پرەزيدەنت ەلىمىز ەكونوميكاسىنىڭ كولەمى جاعىنان الەمدە 47 -ورىنعا كوتەرىلگەنىن ايتتى.

- بۇل - حالقىنىڭ سانى بىزدەن الدەقايدا كوپ ءبىرقاتار ەلدىڭ كورسەتكىشىنەن جوعارى دەڭگەي دەگەن ءسوز، - دەدى مەملەكەت باسشىسى.

بۇعان دەيىن پرەزيدەنت قاسىم-جومارت توقايەۆ قۇرىلتاي وتىرىسىندا «جاڭا تاريحي كەزەڭدەگى قازاقستاننىڭ وزەكتى مىندەتتەرى» اتتى جولداۋىن جاريالاپ جاتقانىن جازعان ەدىك.