كىسىنىڭ جەكە باس دەرەگى: كوپ جەر يەلەنگەردەردىڭ اتى- ءجونى نەلىكتەن جاريالانبايدى

  اۋىل شارۋاشىلىعى ءمينيسترىنىڭ ورىنباسارى باعلان بەكباۋوۆ لاتيفۋنديستەردىڭ اتى- ءجونىن قانداي جاعدايدا جاريالاي الاتىنىن ايتتى، دەپ حابارلايدى Kazinform.

«قازاقستانداعى ەڭ ءىرى لاتيفۋنديستىڭ يەلىگىندە نەشە گەكتار جەر بار؟ كوسمومونيتورينگ نەگە حالىق ءۇمىتىن اقتاماي جاتىر؟ » دەپ سۇرادى جۋرناليست Astana Hub عيماراتىندا وتكەن بريفينگىدە.

ءمينيستردىڭ ورىنباسارى بۇل سۇراققا جاناما جاۋاپ بەرىپ، ناقتى مالىمەت بەرۋدەن جالتاردى.

«لاتيفۋنديست دەپ كوپ كولەمدە جەر الىپ، ونى يگەرىپ نەمەسە جالعا بەرىپ وتىرعان تۇلعالاردى ايتۋعا بولاتىن شىعار. بۇل جەردە بىرەۋدىڭ اتىن اتاپ، كىنالاماي- اق قويايىق. بۇعان دەيىن ءبىر تۇلعاعا 100 مىڭ گەكتاردان استام كولەمدە جەر بەرىلەتىن بولعان. قازىرگى تاڭدا ونداي ءىرى كولەمدە جەر الۋ پروتسەستەرى توقتاتىلعان. زاڭدى تۇلعا 52 مىڭ گەكتاردان، جەكە تۇلعالار 35 مىڭ گەكتاردان ارتىق جەر الا المايدى. سونداي نورما بەكىتىلگەن. كەزىندە ۇلكەن كولەمدە اۋىل شارۋاشىلىق ماقساتتاعى جەردى باسىپ قالىپ، ەلگە بەرمەي جاتىر دەگەن ماسەلە كوتەرىلدى عوي. سول پروبلەمالار قايتالانباس ءۇشىن وسى نورمانى ەنگىزگەنبىز. 5,4 ملن گەكتار جەر ۇكىمەت مەنشىگىنە قايتارىلعانىن بىلەسىز. سونىڭ ىشىندە لاتيفۋنديستەرگە جاتقىزىلعان ادامداردىڭ دا جەرى بولدى» ، - دەدى ۆيتسە- مينيستر ب ا ق وكىلىنىڭ ساۋالىنا بەرگەن جاۋابىندا.

ونىڭ ايتۋىنشا، لاتيفۋنديستەردەن قولدانىلماي جاتقان نەمەسە دۇرىس قولدانىلماعان جەر تەلىمدەرى عانا قايتارىلادى.

ال زاڭنىڭ قازىرگى تالابى بۇرىن بەرىلىپ كەتكەن جەر تەلىمدەرىنە جۇرمەيدى.

«كىمنىڭ اتىندا نەشە گەكتار جەر بار ەكەنى تۋرالى ارنايى اشىق كارتا بار. سول رەسۋرستان جەردىڭ كاداسترى مەن يەسىنىڭ بيزنەس سايكەستەندىرۋ ءنومىرى ارقىلى كورۋگە بولادى. مەملەكەت مەنشىگىندەگى جەر تەلىمدەرىن jerkarta.gharysh.kz سايتىنداعى اشىق دەرەكتە جاريالادىق. سول ارقىلى قاي جەردىڭ كىمنەن قايتارىلعانىن كورۋگە بولادى. نەگىزى ول جەردە كىسىنىڭ اتى- ءجونى - جەكە باس دەرەگى سانالادى عوي. ءبىراق مەملەكەتتىڭ مەنشىگىنە قايتارۋ كەرەك دەگەن سوتتىڭ شەشىمى جاريالانعان جەر تەلىمدەرىنىڭ بۇرىنعى يەلەرىنىڭ بيزنەس سايكەستەندىرۋ ءنومىرى مەن جەكە سايكەستەندىرۋ نومىرلەرىن كورسەتتىك. ال اكىمدىكپەن مامىلەگە كەلىپ، ءوز ەركىمەن جەرىن قايتارعانداردىڭ جەكە دەرەكتەرىن كورسەتە المايمىز. ويتكەنى جەردى قايتارعان كەزدە قويعان تالاپتارىنىڭ ءبىرى سونداي بولدى. بۇعان دەيىن بەرىلىپ كەتكەن جەرلەردىڭ جالعا الۋ مەرزىمى بار. زاڭنىڭ قازىرگى تالابىن ولارعا قولدانايىق دەسەك تە، بىزدە كونستيتۋتسيا بار، زاڭ بار، نورمالار بار. ولارعا قايشى كەلە المايمىز. سوندىقتان ۇلكەن مولشەردە بەرىلىپ كەتكەن تەلىمدەردى يگەرىپ جاتسا، زاڭ بويىنشا ءارى قاراي جۇمىس ىستەۋى كەرەك. ەگەر يگەرىلمەي جاتسا، قايتارۋ ماسەلەسى كوتەرىلەدى»، — دەدى باعلان بەكباۋوۆ.