كينولوگيا ورتالىعىندا ءيىسشىل يتتەر قالاي دايارلانادى
الماتى. KAZINFORM - الماتىدا ءيىسشىل يتتەردى دايىندايتىن ەلىمىزدىڭ باستى كينولوگيا ورتالىعى ورنالاسقان. بۇل مەكەمە ناشاقورلىققا جانە ەسىرتكى بيزنەسىنە قارسى كۇرەستىڭ مەملەكەتتىك باعدارلاماسى شەڭبەرىندە 2002 -جىلى قۇرىلعان.
پوليتسەي يتتەردىڭ دايىندىعى مەن قىرىن-سىرىن ءبىلۋ ءۇشىن مەگاپوليستىڭ تومەنگى جاعىندا ورنالاسقان كينولوگيا ورتالىعىنا باردىق. وندا ءبىزدى ارنايى دايىندىق ءبولىمىنىڭ باستىعى، پوليتسيا مايورى رۋسلان كانافين قارسى الدى.
تاجىريبەلى كينولوگتىڭ بۇل سالادا جۇمىس ىستەپ جۇرگەنىنە 15 جىل بولعان.
- 2011 -جىلى شىعىس قازاقستان وبلىسى زىريانسك قالاسىندا پاترۋلدىك-كۇزەت قىزمەتىندە جۇمىس جولىمدى باستاپ، كەيىن كينولوگ قىزمەتىنە ءوز ەركىممەن اۋىستىم. جۇمىسقا كىشى ينسپەكتور-كينولوگ رەتىندە كىرىپ، مۇندا 6 جىلعا جۋىق جۇمىس ىستەدىم. ءارى قاراي تاجىريبەلى مامان رەتىندە الماتى قالاسىنان جاس كينولوگتاردى دايىنداۋعا ارنايى شاقىرتۋ الدىم. 2016 -جىلدان بەرى 8 جىلعا جۋىق ۋاقىت وسىندا جۇمىس ىستەيمىن. 15 جىلعا جۋىق قىزمەتىمدە ءبىراز ءيتتى دايىندادىم. ونىڭ ىشىندە ەرەكشە ەسىمدە قالعاندارى - شىعىس قازاقستان وبلىسىندا ادامداردى يىسپەن تابۋعا ۇيرەتىلگەن فريدجە اتتى نەمىس وۆچاركاسى. ونىمەن بىرگە 300-گە جۋىق قىلمىستىڭ بەتىن اشتىق. ال الماتىعا كەلگەن سوڭ بەرتا ەسىمدى بەلگيالىق وۆچاركانى دايىندادىم. ەكەۋمىز ەسىرتكى جانە وزگە دە تىيىم سالىنعان زاتتاردى ىزدەۋمەن اينالىستىق. قازىر ارنايى دايىندىق ءبولىمىنىڭ باستىعى قىزمەتىنە اۋىستىم جانە ەلىمىزدىڭ تۇكپىر-تۇكپىرىنەن كەلگەن ءيىسشىل يتتەردى ۇيرەتەتىن مامانداردى دايىندايمىن، - دەدى رۋسلان كانافين.
پوليتسيا مايورى كينولوگتار مەن قىزمەتتىك يتتەرى دايىندايتىن ورتالىقتىڭ بىرنەشە نەگىزگى مىندەتى بار ەكەنىن ايتادى. ولاردىڭ قاتارىندا قىزمەتتىك يتتەردى دايىندايتىن مامانداردى وقىتۋ، اسىل تۇقىمدى يتتەردى ءوسىرۋ، جەدەل- ىزدەستىرۋ ءىس-شارالارىنا قاتىسۋ بار.
- كينولوگيا ورتالىعى تۇركسىب اۋدانىندا ورنالاسقان، جالپى اۋماعى - 4 گەكتار. ىشكى ىستەر مينيسترلىگىنىڭ نەگىزگى ورتالىعى. نەگە الماتى دەيتىن بولساق، سەبەبى وسى ءوڭىردىڭ اۋا رايى جىل بويى ءتيىمدى جۇمىس ىستەۋگە مۇمكىندىك بەرەدى. كينولوگتار مەن يتتەر 6 باعىت بويىنشا دايىندالادى. ول - ەسىرتكى ىزدەۋ، جارىلعىش زات ىزدەۋ، شابۋىلداۋ ارقىلى ۇستاۋ، ءيىستى ودورولوگيالىق انىقتاۋ، ادامدى ءيىس ىزىمەن ىزدەۋ، پاترۋلدىك قىزمەت، - دەيدى كينولوگ-مامان.
ارنايى دايىندىق ءبولىمى باستىعىنىڭ ايتۋىنشا، قىزمەتكە ورتالىقتىڭ وزىندە تۋىپ-وسكەن كۇشىكتەر عانا الىنادى. ولاردىڭ دايىندىعى مەن دەنساۋلىعىن ارنايى كوميسسيا تەكسەرەدى.
- 2013 -جىلدىڭ 19-قازانىنداعى بۇيرىققا سايكەس، قىزمەتكە دايىندالاتىن كۇشىكتەرگە قويىلاتىن تالاپتار بەكىتىلگەن. كۇشىك قوعامعا بەيىمدەلگەن، ياعني ءۇي- جاي، كولىككە قورىقپاي كىرۋى قاجەت. ونىڭ ويىن رەاكسياسى جانە دەنساۋلىعى وتە جاقسى بولۋى كەرەك. كوميسسيا جينالىپ، كۇشىكتىڭ بارلىق تالاپتارعا ساي ەكەنىن انىقتاعان سوڭ عانا ول قىزمەتكە الىنادى. بىزدە اسىل تۇقىمدى ءوسىرۋ ءبولىمى بار. وندا ءوز باسشىسى مەن قىزمەتكەرلەرى جۇمىس ىستەيدى. ارنايى بلوكتا كۇشىكتەر دۇنيەگە كەلەدى دە، سوندا قاداعالانىپ، وسىرىلەدى. ۆەتەريناريا قىزمەتى ولاردىڭ دەنساۋلىعىن قاداعالايدى. بۇگىنگە دەيىن كوميسسيادان وتپەي قالعان جاعداي بولعان جوق. سەبەبى كۇشىكتەر تۋا سالىپ ۇيرەتىلەدى. ال كوشەدەن يت الىنبايدى، - دەيدى رۋسلان اسحات ۇلى.
سونداي- اق مامان كينولوگيا ورتالىعىندا تەك اسىل تۇقىمدى يتتەر دايىندالاتىنىن ايتتى. ءيىسشىل يتتەردىڭ اراسىندا نەگىزگى ۇلەس - نەمىس وۆچاركاسى مەن بەلگيالىق وۆچاركاعا تيەسىلى. ودان بولەك لابرادور- رەتريۆەر، ورىس سپانيەلى تۇقىمدى يتتەر دە بار.
رۋسلان اسحات ۇلىنىڭ سوزىنشە، كوميسسيادان وتكەن ءيت ناقتى ءبىر قىزمەتكەرگە بەكىتىلەدى. جانۋارلار دوپ ارقىلى ۇيرەتىلەدى جانە ءاردايىم شۇعىل شاقىرتۋعا شىعۋعا دايىن جۇرەدى. ال ولاردىڭ قىزمەت سالاسى مىنەز-قۇلقىنا قاراي بولىنەدى.
ءتوزىمدى، كوپ قوزعالاتىن يتتەر - ەسىرتكى ىزدەۋگە، مىقتى، اشۋشاڭدارى - شابۋىلداۋعا، ال سابىرلى مىنەزدى يتتەر - جارىلعىش زات ىزدەۋگە ۇيرەتىلەدى.
- كوميسسيادان وتكەننەن كەيىن ءيت ناقتى ءبىر ادامعا بۇيرىق بويىنشا بەكىتىلەدى. قىزمەتكەر ونى ارى قاراي دايىنداپ، كۇندەلىكتى قارايدى. ەگەر ءيت ءوز مىندەتىن دۇرىس اتقارمايتىن بولسا، جاۋاپكەرشىلىك بەكىتىلگەن ادامنىڭ موينىندا بولادى. مىسالى، باسقا وڭىردەن بىزگە كينولوگ ءوز يتىمەن بىرگە كەلەدى دە قاجەتتى ءبىلىم العان سوڭ وسىندا كۋالىك بەرىلەدى. ءبىر جىلدان كەيىن قايتا كەلىپ، سول يتپەن جۇمىس ىستەۋگە رۇقسات بەرەتىن رەسمي سەرتيفيكات الادى. ءبىر ايتا كەتەرلىگى، ءبىر مامان ەكى- ءۇش ءيتتى دايىنداي الادى. ءبىراق كينولوگ وزىنە بەكىتىلمەگەن باسقا يتپەن تاپسىرماعا شىعا المايدى. بىزدە ۇيرەتۋدىڭ نەگىزگى ءادىسى ويىن دوبى ارقىلى جۇرەدى. جاۋاپتى قىزمەتكەر ونى مىندەتتى تۇردە قاراپ، تاماعىن بەرەدى، تازالايدى. ۋاقىتىمەن شىعارىپ، جاتتىعۋ جاساتۋ ارقىلى كاسىبي قاسيەتتەرىن دامىتادى. جاردەمدەسۋ تۋرالى ءوتىنىش تۇسكەن كەز كەلگەن ۋاقىتتا بىرگە شىعىپ، ىسكە كىرىسە الادى، - دەيدى ول.
كينولوگيالىق جۇمىستىڭ قىر-سىرىن بولىسكەن مامان ءيىسشىل يتتەر تۋرالى تالاي اڭىز اڭگىمە، الىپ-قاشپا سوزدەردىڭ بار ەكەنىن ايتتى.
ونىڭ ايتۋىنشا، ەل اۋزىندا كينولوگتار يتتەرگە ەسىرتكى بەرەدى دەگەن قاۋەسەت تە تاراعان.
- ءيىسشىل يتتەر تۋرالى كوپتەگەن الىپ-قاشپا ءسوز بار. ونىڭ ىشىندە ەڭ تانىمالى - ەسىرتكى ىزدەيتىن يتتەر وزدەرى ەسىرتكى قولدانادى دەگەن ءسوز. بۇل - تولىعىمەن وتىرىك. ويتكەنى ءيت ەسىرتكىنى جەي المايدى. ادام اعزاسى مىقتى، ءومىر بويى ءىشىپ-شەگىپ جۇرە بەرەدى. ءبىراق يتتەردىڭ دەنەسى بىزگە ۇقسامايدى. ەگەر ولارعا ەسىرتكى بەرەتىن بولساق، 1 اپتادان ارتىق ءومىر سۇرمەيدى. ءبىز يمميتاتور، ياعني زاتتىڭ بالاماسىن قولدانامىز. دوپ پەن يمميتاتوردى قاتار قويامىز. ءيت ءوزىنىڭ دوبىن ىزدەپ جاتىرمىن دەپ تىيىم سالىنعان زاتتاردى تابادى، - دەيدى كينولوگ.
پوليتسيا مايورى كينولوگ قىزمەتىنە كەلگىسى كەلەتىن ادامدارعا ارنايى تالاپتار قويىلاتىنىن اتاپ ءوتتى.
- كينولوگتاردى العان كەزدە دە ارنايى تالاپتار بار. ياعني، كەز كەلگەن ادام كينولوگ بولا المايدى. وسى ماماندىققا كەلەمىن دەگەن ادامنىڭ جانۋارلارعا دەگەن سۇيىسپەنشىلىگى، ىنتاسى بولۋى كەرەك. ءيتتى دايىنداۋ ءۇشىن ونى ءتۇسىنۋ جانە ءارقايسىسىنا جەكە جول تابۋ قاجەت. سوندىقتان بۇل جۇمىسقا الار كەزدە ادامنىڭ جۇمىس تاجىريبەسىنە دە قارايمىز. كينولوگقا جوعارى ءبىلىمسىز تاپسىرۋعا بولادى، ءبىراق وندا سەرجانتتىق قىزمەت جۇرەدى. ال وفيتسەرلەرگە زاڭ نە ۆەتەريناريا ماماندىعى بويىنشا جوعارى ءبىلىمى بولۋى مىندەتتى. جاس بويىنشا قاتىپ قالعان شەكتەۋ جوق، - دەدى ول.
اۆتور
دوسبول اتاجان
