ەكىنشى نومەرلى بوكسشىلارمەن-اق قازاقستاندى باسىپ وزدىق - وزبەكستاندىق ب ا ق

استانا. قازاقپارات - چەمپيونات الدىندا قازاقستان قۇراماسى فاۆوريت سانالعانىمەن، وزبەكتەردەن مىقتى ەمەس ەكەنىن كورسەتتى. 

وزبەكستاننىڭ Upl.uz سايتى بوكستان تايلاندتا اياقتالعان ازيا چەمپيوناتىن قورىتىندىلادى. سايتتا جارىق كورگەن ماقالادا بوكستان وزبەكستان قۇراماسى الەمدەگى ەڭ ۇزدىك كوماندالاردىڭ ءبىرى رەتىندە كورسەتىلىپ، قازاق بوكسشىلارىنا قاتىستى دا پىكىر ايتىلعان.

ەسكە سالساق، ازيا چەمپيوناتىندا ەرلەر اراسىندا قازاقستان بوكسشىلارى 5 التىنعا قول جەتكىزسە، وزبەكستان 7 التىن مەدال جەڭىپ الىپ، جالپىكوماندالىق ەسەپتە ءبىرىنشى ورىن الدى.

«بوكستان وزبەكستان قۇراماسى تايلاندتا وتكەن ازيا چەمپيوناتىندا جالپىكوماندالىق ەسەپتە ءبىرىنشى ورىن الىپ، الەمدەگى ەڭ ۇزدىك كوماندا ەكەنىن دالەلدەدى. ءبىز بۇل جارىسقا نەگىزگى قۇرامداعى بوكسشىلاردى، ونىڭ ىشىندە وليمپيادا چەمپيوندارىن الىپ بارماعانىمىزدى دا ەسكەرۋ كەرەك. ال، ەكىنشى ورىندى قازاقستان قۇراماسى يەلەنىپ، ءوزىنىڭ مىقتى دايىندىقپەن كەلگەنىن كورسەتتى.

چەمپيونات الدىندا وزبەكستان قۇراماسى ءبىرىنشى نومەرلى بوكسشىلارىن اپارمايتىنى بەلگىلى بولىپ، جارىستىڭ باستى فاۆوريتى رەتىندە قازاقستان قۇراماسى قاراستىرىلعان. قازاقستان قىزدارىنىڭ ءساتتى ونەر كورسەتۋى دە وسى بولجامدى نىعايتا ءتۇستى. دەگەنمەن، فينالدىق باسەكەلەردە وزبەك بوكسشىلارىنىڭ جاپپاي جەڭىسكە جەتۋى وزبەكستان بوكسىنىڭ الدەقايدا مىقتى ەكەنىن تاعى ءبىر كورسەتىپ وتىر»، - دەلىنگەن اتالعان ماقالادا.

وزبەك ساراپشىلارى سونداي-اق قازاقستان بوكسشىلارىنداعى ەڭ باستى پروبلەما دەپ فيزيكالىق دايىندىعىن اتاعان.