كىنالى جوق، كولىك زاقىمدالعان: جۇرگىزۋشى قانداي ارەكەتكە بارۋى ءتيىس

استانا. KAZINFORM - كىم كىنالى بولۋىنا قاراماستان، شىعىندى ازايتىپ، ءوز قۇقىعىڭىزدى قورعاۋ ءۇشىن دۇرىس ارەكەت ەتۋ وتە ماڭىزدى. Kazinform اگەنتتىگى وسىنداي جاعدايدا قالاي ارەكەت ەتۋ كەرەكتىگىن تۇسىندىرەدى.

سۋپەرماركەتتەن نەمەسە كەزدەسۋدەن قايتىپ كەلە جاتىپ كولىگىڭىزدە سوعىلعان، سىزات نەمەسە سىنعان فارا كوردىڭىز دەلىك. جان- جاعىڭىزدا جازبا دا، كىنالى ادام دا جوق. مۇنداي جاعداي جاعىمسىز، ءبىراق كوپ كەزدەسەتىن جايت. اسىرەسە قالالاردا، كولىكتەر تىعىز تۇرىپ، ءبارى ءتيىستى تۇراق جاساي بەرمەيتىنى سەبەبىنەن تۇراقتاعى زاقىمدانۋ ەڭ ءجيى كەزدەسەتىن جول- كولىك وقيعالارىنىڭ ءبىرى سانالادى.

وسى كەزدە قالاي ارەكەت ەتۋ كەرەك ەكەنىن ءبىلۋ ماڭىزدى. كىمگە قوڭىراۋ شالۋ، نەنى قۇجاتتاۋ، قانداي دالەل جيناۋ جانە وتەماقى الۋ جولدارى تۋرالى وسى ماقالادا تولىق ايتامىز. بۇل سىزگە سابىرلى بولىپ، قۇقىعىڭىزدى قورعاۋعا، ءجيى بولاتىن قاتەلىكتەردەن اۋلاق بولۋعا كومەكتەسەدى.

الدىمەن زاقىمدالعان جەردى جاقىننان جانە جالپى كولىك تۇرعىسىنان سۋرەتكە ءتۇسىرىڭىز. سودان كەيىن تۇراقتاعى كولىگىڭىزدىڭ ورنالاسۋىن، كورشى كولىكتەردى، جول سىزىقتارىن، بوياۋ ىزدەرى، اينەك سىنىقتارى، شينانىڭ ءىزى سياقتى بەلگىلەردى دە فوتوعا ءتۇسىرىڭىز.

پوليتسيا كەلگەنگە دەيىن كولىكتى قوزعاۋعا بولمايدى. بۇل كولىكتىڭ قاي جەردە جانە قالاي زاقىمدانعانى تۋرالى داۋلى جاعدايلاردىڭ الدىن الادى جانە زاڭعا ساي، سونداي-اق وقيعا ورنىنان قوزعالعانىڭىز ءۇشىن ايىپپۇل سالىنباۋى ءۇشىن قاجەت. جول ەرەجەسىنە سايكەس، وقيعا ورنىنان از دا بولسا قوزعالۋ - «وقيعا ورنىن تاستاپ كەتۋ» بولىپ سانالادى.

102 نومىرىنە حابارلاسىڭىز. وقيعا ورنىن تەكسەرىڭىز: ماڭايدا بەينەباقىلاۋ كامەرالارى، كۇزەتشى، تۇراق قىزمەتكەرى بار ما؟ كورشىلەس كولىكتە وتىرعان جۇرگىزۋشى وقيعانى كورگەن بولۋى مۇمكىن. كۋاگەر تاپساڭىز، ونىڭ اتى-ءجونىن جانە بايلانىس اقپاراتىن جازىپ الىڭىز.

سونىمەن قاتار كورشى كولىكتەردى دە تەكسەرىڭىز. جاقىندا سوعىلعان، بوياۋ ءتۇسى ءسىزدىڭ كولىگىڭىزدىڭ تۇسىنە ساي كولىكتەر بار ما؟ ولاردى دا سۋرەتكە ءتۇسىرىڭىز. كوبىنەسە كىنالى جۇرگىزۋشى وقيعا ورنىنان الىستاماي، باسقا جاققا جاي عانا تۇراقتاۋى مۇمكىن. سوندىقتان جاقىن ماڭداعى قاتارلاردى دا قاراپ شىعىڭىز.

ەگەر تۇراقتا كامەرالار بولسا، ولاردىڭ يەسى نەمەسە اكىمشىلىگىمەن بايلانىسىڭىز. پوليتسيا ارقىلى ۆيدەو سۇراتۋ قاجەت بولادى، ويتكەنى مۇنداي جازبالار كوبىنە ءبىر اپتادان ارتىق ساقتالمايدى. ەگەر كامەرا كىنالى ادامنىڭ مەملەكەتتىك ءنومىرىن تۇسىرسە، ونى تابۋ وڭاي بولادى.
پوليتسيا كەلگەن جاعدايدا، ولارعا كىنالى ادام بەلگىسىز ەكەنىن جانە وقيعا ورنىنان كەتىپ قالعانىن حابارلاڭىز. بۇل جاعدايدا 610-باپ بويىنشا - كولىككە زاقىم كەلتىرۋ (2025 -جىلى ايىپپۇل - 20 م ر پ، ياعني 78640 تەڭگە، جانە جۇرگىزۋشى كۋالىگىن 6 ايعا دەيىن ايىرۋى مۇمكىن). سونداي-اق 611-باپ بويىنشا - وقيعا ورنىن تاستاپ كەتۋ بويىنشا (جۇرگىزۋشى كۋالىگىن 1 جىلعا دەيىن ايىرۋ جانە 50 م ر پ، ياعني 196600 تەڭگە ايىپپۇل) اكىمشىلىك ءىس قوزعالادى.

بۇل جاعدايدا زاڭگەرلەر بەلسەندى تۇردە پوليتسيامەن جانە قارسى تاراپپەن ىنتىماقتاستىق تانىتىپ، ماسەلەنى بەيبىت جولمەن شەشۋگە كەڭەس بەرەدى. زاقىمدى وتەپ، سوتقا دەيىن بارماۋعا كۇش سالىڭىز - بۇل ءسىزدىڭ جاۋاپكەرشىلىكتى جەڭىلدەتەدى.

كىنالى ەكەنىڭىزدى بايقاماساڭىز دا، جاۋاپكەرشىلىكتەن قاشىپ قۇتىلا المايسىز. كامەرالار ءسىزدىڭ كولىككە سوققان ءساتىڭىزدى تۇسىرسە جانە وقيعا ورنىنان كەتسەڭىز، ايىپپۇل مىندەتتى تۇردە كەلەدى. ءتىپتى ەگەر ءسىز زارداپ شەككەن بولساڭىز دا، پوليتسيا شاقىرماي كەتسەڭىز - جاۋاپكەرشىلىكتەن قۇتىلمايسىز.

سونىمەن قاتار پوليتسيادان كولىگىڭىزدىڭ زاقىمدالعانى تۋرالى قۇجات الىڭىز. ونى ساقتاندىرۋ كومپانياسىنا تاپسىرۋ كەرەك بولادى. ەگەر كاسكو ساقتاندىرۋىڭىز بولسا جانە ول مۇنداي جاعدايدى قامتىسا، كىنالى ادام بولماسا دا، شىعىن وتەلەدى. ەگەر تەك مىندەتتى ساقتاندىرۋ (وساگو) بولسا، الدىمەن كىنالى ادام تابىلۋى كەرەك، ويتكەنى ونىڭ ساقتاندىرۋى شىعىندى وتەيدى.

زاقىمدى باعالاپ، كىنالى تابىلسا، بەيبىت جولمەن شەشىڭىز. ەگەر ەكىنشى جۇرگىزۋشى وقيعا ورنىندا قالسا، پوليتسيا شاقىرماي تۇرىپ، ەۋروپروتوكول تولتىرۋعا بولادى. ول ءۇشىن زاقىم 100 م ر پ (393200 تەڭگە) اسپاۋى، ەشكىم جاراقات الماۋى، ەكى تاراپ كەلىسۋى جانە ساقتاندىرۋى بولۋى ءتيىس.
ەگەر كىنالى ءسىز بولساڭىز ەۋروپروتوكول جاقسى شەشىم. ونى تولتىرساڭىز، اكىمشىلىك ايىپپۇل سالىنبايدى. ال بولماسا دا، كولىكتىڭ كىشكەنە سىزاتىن تولەۋ ايىپپۇلدان ارزانىراق بولادى.
شىعىن 100 م ر پ- دەن اسىپ، كەلىسپەۋشىلىك بولسا، پوليتسيانى شاقىرعانىڭىز ءجون. ەگەر جاعداي كۇردەلى بولسا، وقيعانى دەرەۋ زاڭ اياسىندا تىركەۋ ماڭىزدى. زاڭ بويىنشا، كىشىگىرىم سىزات تا جول-كولىك وقيعاسى بولىپ ەسەپتەلەدى.

كىنالى ادام شىعىندى تولىعىمەن وتەۋگە مىندەتتى: ءوز كۇشىمەن نەمەسە ساقتاندىرۋ ارقىلى، سوت شەشىمىمەن.

قاۋىپسىزدىكتى ارتتىرۋ ءۇشىن تۇراق رەجيمى بار ۆيدەورەگيستراتور ورناتىڭىز (كولىككە سوققى تيگەن كەزدە اۆتوماتتى تۇردە جازبا باستالادى). كامەرالار كورەتىن جانە قوزعالىس از جەرلەردە تۇراقتاڭىز. تىعىز جانە كۇردەلى تۇراقتاردان اۋلاق بولىڭىز.

بۇعان دەيىن، جول اپاتىنا كىنالى ادام وقيعا ورنىنان ءىز سۋىتىپ كەتكەن جاعدايدا نە ىستەۋ كەرەكتىگىن جانە قاشىپ كەتكەن ادامنىڭ قانداي جازاعا تارتىلاتىنىن انىقتاپ كورگەنبىز.

اۆتور

تاستان تويانوۆ