ۇكىمەتتە ەكونوميكاداعى ءوسىمدى قامتاماسىز ەتۋ جونىندەگى جەدەل شتاب وتىرىسى ءوتتى

استانا. KAZINFORM - پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى نۇرلان بايبازاروۆتىڭ توراعالىعىمەن وتكەن ەكونوميكاداعى ءوسىمدى قامتاماسىز ەتۋ جونىندەگى جەدەل شتاب وتىرىسىندا ءبىرىنشى جارتىجىلدىقتاعى ەكونوميكا سالالارىنىڭ دامۋ كورسەتكىشتەرى قارالدى.

بۇل تۋرالى ۇكىمەتتىڭ باسپا ءسوز قىزمەتى حابارلادى.

وتكەن جىلمەن سالىستىرعاندا اقپارات جانە بايلانىس سالاسىندا (8,7 پايىز)، قۇرىلىستا (8,6 پايىز)، كولىكتە (7,3 پايىز) تۇراقتى وسىمگە قول جەتكىزىلدى.

ايتا كەتۋ كەرەك، بيىلعى بەس ايدىڭ قورىتىندىسىمەن سالىستىرعاندا اۋىل شارۋاشىلىعى، قۇرىلىس جانە ساۋدا سالالارىندا ءوسۋ قارقىنى جاقسارعانى بايقالادى. سونىمەن قاتار وپەك+ مىندەتتەمەلەرى شەڭبەرىندە مۇناي ءوندىرۋ كولەمىنىڭ قىسقارۋىنا جانە سۋ تاسقىنى كەزەڭىنەن كەيىن جۇرگىزىلىپ جاتقان قالپىنا كەلتىرۋ جۇمىستارىنا بايلانىستى ءبىرقاتار سالادا ءبىرشاما ارتتا قالۋشىلىق بايقالىپ وتىر.

«4 ايلىق باسەڭدەۋدەن كەيىن ماۋسىم ايىنىڭ قورىتىندىسى ينۆەستيتسيالاردى جۇمىلدىرۋ، وتاندىق تاۋار وندىرۋشىلەردى قولداۋ، ىسكەرلىك بەلسەندىلىكتى ىنتالاندىرۋ شارالارى، سونداي-اق قۇرىلىس، اۆتوجول، اۋىل شارۋاشىلىعى سالالارىنداعى الداعى بەلسەندى كەزەڭ ەسەبىنەن ەكونوميكانىڭ ءوسۋ تراەكتورياسىنا شىعۋىنا نەگىز قالادى»، - دەپ نۇرلان بايبازاروۆ، بيىلعى ىسكەرلىك بەلسەندىلىك يندەكسى بەس اي قاتارىنان وڭ ايماقتا تۇرعانىن اتاپ ءوتتى.

وڭدەۋ ونەركاسىبى نىسانالى ينديكاتورلار شەگىندە (5,1 پايىزعا) ءوسىپ كەلەدى. وڭدەۋ ونەركاسىبى سالالارى ىشىندە مەتاللۋرگيا ءوندىرىسىنىڭ - 8,3 پايىزعا، ماشينا جاساۋدىڭ - 9,4 پايىزعا، حيميا ونەركاسىبىنىڭ - 5,3 پايىزعا، جيھاز جاساۋدىڭ - 28,3 پايىزعا، فارماتسيەۆتيكانىڭ - 14,8 پايىزعا ءوسۋى قامتاماسىز ەتىلدى. وسىمگە وتاندىق تاۋار وندىرۋشىلەردى قولداۋ شارالارىن جەتىلدىرۋ ناتيجەسىندە قول جەتكىزىلدى. بۇگىنگى تاڭدا ءو ت و- مەن جاسالعان شارتتاردىڭ سانى 2023-جىلعى 22,7 مىڭمەن سالىستىرعاندا 45,7 مىڭعا دەيىن ارتتى.

جەڭىل ونەركاسىپ، قۇرىلىس ماتەريالدارى ءوندىرىسىنىڭ كولەمىن ۇلعايتۋ، سونداي-اق ازىق-تۇلىك ونىمدەرى سالاسىندا جانە ت. ب. جۇمىستار جالعاسۋدا.

قۇرىلىستا جۇمىس كولەمى بەس ايداعى 8,1 پايىز كورسەتكىشپەن سالىستىرعاندا ءوسىپ، 8,6 پايىزدى قۇرادى. قاراستىرىلىپ وتىرعان كەزەڭدە 7,4 ميلليون شارشى مەتر تۇرعىن ءۇي پايدالانۋعا بەرىلدى، بۇل وتكەن جىلدىڭ سايكەس كەزەڭىنەن 1 پايىزعا ارتىق. قولدانىستاعى جەڭىلدىكتى جانە جالعا بەرىلەتىن باعدارلامالار مەن جاڭا تۇرعىن ءۇي باعدارلامالارى («وتاۋ»، «ناۋرىز») شەڭبەرىندە 54,2 مىڭ وتباسى وزدەرىنىڭ تۇرعىن ءۇي جاعدايىن جاقسارتۋى ءتيىس.

ينفلياتسيا ماسەلەسىنە ەرەكشە نازار اۋدارىلدى. 90 ءتۇرلى شارانى ىسكە اسىرۋدىڭ ناتيجەسىندە كورسەتكىشتەر 2023-جىلعى ماۋسىم ايىنداعى 14,6 پايىزدان اعىمداعى 8,4 پايىزعا دەيىن تومەندەدى. بۇل رەتتە ازىق- تۇلىك تاۋارلارى بويىنشا ينفلياتسيا 5,4 پايىز، ال وزگە تاۋارلار بويىنشا 7,4 پايىز قۇرادى. جالپى، بيىل نىسانالى ءدالىز 6-8 پايىز كولەمىندە. يمپورتتىق تاۋارلاردى الماستىرۋ بويىنشا ينۆەستيتسيالىق جوبالار بەلسەندى تۇردە ىسكە اسىرىلىپ جاتىر، باعا بەلگىلەۋدى باقىلاۋ، مونوپولياعا قارسى جانە سىرتقى ساۋدانى رەتتەۋ جۇمىستارى جالعاسۋدا.

ينۆەستيتسيالار اعىنى دا ەل ەكونوميكاسىنىڭ وسۋىنە اسەر ەتەدى. بۇل باعىتتا اقپارات جانە بايلانىس، كولىك، ءبىلىم بەرۋ جانە وڭدەۋ ونەركاسىبى سالالارى وڭ ديناميكا كورسەتۋدە. جارتى جىل ىشىندە جالپى سوماسى 151 ميلليارد تەڭگەگە 18 جوبا ىسكە قوسىلدى، ونىڭ 122,7 ميلليارد تەڭگەسى - شەتەلدىك قاتىسۋى بار ۇلەس. ينۆەستيتسيالىق شتابتىڭ جۇيەلى جۇمىسى اياسىندا شامامەن $30 ميلليارد سوماسىنا 65 ينۆەستيتسيالىق جوبا بويىنشا پروبلەمالىق ماسەلەلەر شەشىلدى، سونداي-اق زاڭناماعا 57 وزگەرىس ازىرلەندى، ونىڭ ىشىندە بۇگىندە 26 بۇيرىق قابىلداندى.

بۇعان قوسا، ت ك ش- نى جاڭعىرتۋ، اگروونەركاسىپتىك كەشەندى دامىتۋ جونىندەگى جۇمىس قارقىنى قارالدى.

وتىرىس قورىتىندىسى بويىنشا ەكونوميكانىڭ بارلىق سالاسىندا جوسپارلانعان كورسەتكىشتەردەن تومەن ەمەس دەڭگەيدە ءوسىمدى قامتاماسىز ەتۋ بويىنشا ناقتى تاپسىرمالار بەرىلدى. ەكونوميكاداعى ءوسىمدى قامتاماسىز ەتۋ جونىندەگى وڭىرلىك جەدەل شتابتار جۇمىس ىستەيدى. ولارعا اكىمنىڭ ءاربىر كورسەتكىش بويىنشا جاۋاپتى ورىنباسارلارى بەكىتىلگەن.