ۇكىمەت وتىرىسىندا قانداي ماسەلە قارالماق

استانا. KAZINFORM - بۇگىن ساعات 10:00-دە ۇكىمەتتىڭ كەزەكتى وتىرىسى وتەدى. كۇن تارتىبىنە وتكەن جىلىتۋ ماۋسىمىنىڭ قورىتىندىسى جانە الداعى جىلۋ بەرۋ ماۋسىمىنا دايىندىق ماسەلەلەسى شىعارىلىپ وتىر.

مينيسترلەر كابينەتى وتىرىسىنىڭ كۇن تارتىبىنە شىعارىلعان ماسەلە بويىنشا نەگىزگى مالىمەتتەردى ونەركاسىپ جانە قۇرىلىس ءمينيسترى ەرسايىن ناعاسپايەۆ ۇسىنادى. مينيستر وتكەن جىلعى جىلىتۋ ماۋسىمىندا كوممۋنالدىق- تۇرمىستىق سەكتوردىڭ كومىردى تۇتىنۋ جوسپارىنا توقتالىپ، الداعى جىلىتۋ ماۋسىمىنا كومىردى ۇزدىكسىز جەتكىزۋ جوسپارى ازىرلەنىپ، جەرگىلىكتى اتقارۋشى ورگاندارعا، ق ت ج جانە كومىر كومپانيالارىنا جولدانعانىن اتاپ وتەدى. سونداي-اق ول جىل سايىن جىلۋ جانە سۋ جابدىقتارى مەن سۋ بۇرۋ جۇيەلەرىنىڭ توزۋىنا بايلانىستى تەحنولوگيالىق اپات تۋىنداۋ قاۋپى بار وڭىرلەردى اتايدى. مۇنان بولەك، ەرسايىن ناعاسپايەۆ الداعى جىلۋ ماۋسىمىنا دايىندالۋ ماقساتىندا مينيسترلىكتىڭ ءىس-شارالار جوسپارى دايىندالعانىن اتاپ ءوتىپ، جەرگىلىكتى اتقارۋشى ورگاندارعا جۇكتەلگەن مىندەتتەرگە توقتالادى.

ال وتىرىس قورىتىندىسى بويىنشا وتەتىن باسپا ءسوز كونفەرەنسياسىنا:

 . ونەركاسىپ جانە قۇرىلىس ءمينيسترى ەرسايىن ناعاسپايەۆ؛
 .  ەنەرگەتيكا ۆيتسە- ءمينيسترى سۇڭعات ەسىمحانوۆ قاتىسادى.
ولار ب ا ق وكىلدەرى تاراپىنان تۋىنداعان ساۋالدارعا جان-جاقتى جاۋاپ بەرەدى.

ۇكىمەت وتىرىسىنىڭ تىكەلەي تاراتىلىمى PrimeMinister.kz سايتىندا، YouTube رەسمي ارناسىندا، Facebook الەۋمەتتىك جەلىسىندە، سونداي-اق UKIMET Telegram-كانالىندا جۇرەدى.

ءباسپاسوز كونفەرەنسياسىنىڭ تىكەلەي تاراتىلىمى YouTube رەسمي ارناسىندا جانە Facebook الەۋمەتتىك جەلىسىندە كورسەتىلەدى.

ايتا كەتەيىك، 20-مامىردا وتكەن ۇكىمەت وتىرىسىندا وقۋ جىلىنىڭ اياقتالۋى جانە بالالاردىڭ جازعى دەمالىسىن ۇيىمداستىرۋ ماسەلەلەسى تالقىلانعان ەدى.

سول ۋاقىتتا وقۋ- اعارتۋ ءمينيسترى عاني بەيسەمبايەۆ 2024-2025 وقۋ جىلىنىڭ اياقتالۋى، مەكتەپ جانە تەحنيكالىق ءبىلىم بەرۋ جۇيەسىندەگى ناتيجەلەر، سونداي-اق بالالاردىڭ جازعى دەمالىسى مەن جۇمىسپەن قامتىلۋىن ۇيىمداستىرۋ جونىندەگى شارالار تۋرالى باياندادى.

ءمينيستردىڭ ايتۋىنشا، بيىلعى وقۋ جىلىن 3,9 ميلليون وقۋشى اياقتايدى. ونىڭ ىشىندە باستاۋىش سىنىپتى - 391 مىڭ، نەگىزگى مەكتەپتى - 364 مىڭ بالا بىتىرەدى.

عىلىم جانە جوعارى ءبىلىم ۆيتسە- ءمينيسترى تالعات ەشەنقۇلوۆ قازاقستانداعى جوعارى ءبىلىم بەرۋ جۇيەسىنىڭ جاي-كۇيى، ۇلتتىق ءبىرىڭعاي تەستىلەۋدىڭ (ۇ ب ت) باستالۋى، ستۋدەنتتەردى قولداۋ شارالارى جانە بولىنەتىن گرانتتار تۋرالى ايتتى. قازىرگى ۋاقىتتا رەسپۋبليكادا 122 جوعارى وقۋ ورنى، ونىڭ ىشىندە 10 زەرتتەۋ جوعارى وقۋ ورنى جانە 23 فيليال جۇمىس ىستەيدى. 2024-2025 وقۋ جىلىندا ازاماتتىق جوعارى وقۋ ورىندارىندا 680 مىڭنان استام ستۋدەنت وقيدى، ونىڭ ىشىندە 624,5 مىڭى باكالاۆرياتتا، 39,2 مىڭى ماگيستراتۋرادا، 7,6 مىڭى دوكتورانتۋرادا جانە 8,9 مىڭى رەزيدەنتۋرادا ءبىلىم الىپ جاتىر.

دەنساۋلىق ساقتاۋ ءمينيسترى اقمارال ءالنازاروۆا مەكتەپ مەديتسيناسىنىڭ دامۋى، سانيتارلىق باقىلاۋدىڭ كۇشەيۋى جانە بالالار لاگەرلەرىنىڭ ساۋىقتىرۋ ماۋسىمىنا دايىندىعى تۋرالى ايتتى. ەلىمىزدە 7 مىڭنان استام مەكتەپ جۇمىس ىستەيدى. ءار مەكتەپ ەمحاناعا بەكىتىلگەن جانە مەيىرگەرمەن %95 قامتاماسىز ەتىلگەن.

ال تۋريزم جانە سپورت ۆيتسە-ءمينيسترى ەرجان ەركىنبايەۆ ۇكىمەت وتىرىسىندا دەمالىس كەزەڭىندە بالالاردىڭ ساۋىقتىرۋ دەمالىسىن، بوس ۋاقىتىن جانە جۇمىسپەن قامتىلۋىن ۇيىمداستىرۋ بويىنشا جۇرگىزىلىپ جاتقان جۇمىستارعا توقتالدى.

ىشكى ىستەر ءمينيسترى ەرجان سادەنوۆ ۇكىمەت وتىرىسىندا بالالاردىڭ قاۋىپسىزدىگىن قامتاماسىز ەتۋ جانە كامەلەتكە تولماعاندار اراسىنداعى قۇقىق بۇزۋشىلىقتاردىڭ الدىن الۋ تۋرالى باياندادى.

توتەنشە جاعدايلار ءمينيسترى شىڭعىس ءارىنوۆ جىل سايىن ءورت قاۋىپسىزدىگىنە بايلانىستى ءبىلىم بەرۋ نىساندارى تەكسەرىلىپ، تاجىريبەلىك جاتتىعۋلار وتكىزىلەتىنىن اتاپ ءوتتى.

وتىرىستى قورىتىندىلاعان پرەمەر-مينيستر ولجاس بەكتەنوۆ مەملەكەتتىك ورگاندارعا جازعى كەزەڭدە بالالاردىڭ تولىققاندى دەمالۋى مەن ساۋىعۋى ءۇشىن قاجەتتى جاعدايلار جاساۋدى تاپسىردى.

- بىردە-ءبىر بالا نازاردان تىس قالماۋعا ءتيىس. كوپبالالى، از قامتىلعان جانە تۇرمىسى تومەن وتباسىلاردان شىققان بالالاردى قولداۋعا باسىمدىق بەرىلسىن، - دەپ اتاپ ءوتتى ولجاس بەكتەنوۆ.

پرەمەر-مينيستر اكىمدەرگە جانە ءبىرقاتار مينيسترلىككە مىناداي تاپسىرما بەردى:

  . بالالار لاگەرلەرىنىڭ اشىلۋىن جانە ولاردىڭ سانيتاريالىق-ەپيدەميولوگيالىق، ورتكە، تەرروريزمگە قارسى قاۋىپسىزدىك تالاپتارىنا سايكەستىگىن جەكە باقىلاۋعا الۋ؛
  . دەنساۋلىق ساقتاۋ مينيسترلىگى جازعى دەمالىس كەزىندە بالالاردىڭ تاماقتانۋىن تۇراقتى سانيتاريالىق-ەپيدەميولوگيالىق باقىلاۋدى قامتاماسىز ەتۋ؛
  . توتەنشە جاعدايلار مينيسترلىگى اكىمدىكتەرمەن بىرلەسىپ، سۋ ايدىندارى مەن باسسەيندەردە قۇتقارۋ جابدىقتارىنىڭ بولۋىن تەكسەرىپ، پەرسونالدى سۋدا جانە ءورت كەزىندە بالالاردى قۇتقارۋ داعدىلارىنا وقىتۋ ۇيىمداستىرۋ؛
  . ىشكى ىستەر مينيسترلىگى قوعامدىق ءتارتىپتى ساقتاۋدى قامتاماسىز ەتۋ ءۇشىن ءاربىر بالالار ورتالىعى مەن لاگەرىنە، كوپشىلىك ءىس-شارالار وتەتىن ورىندارعا ۋچاسكەلىك پوليتسيا ينسپەكتورلارىن بەكىتۋ؛
  . بالالاردىڭ جول-كولىك جاراقاتىنىڭ پروفيلاكتيكاسى ماسەلەسىن نازاردا ۇستاۋ؛
  . ۇيىمداستىرىلماعان جيىنداردا سپورتشى- وقۋشىلار مىنگەن كولىكتەردىڭ ءجيى جول اپاتىنا ءتۇسۋ جاعدايلارىنا بايلانىستى ولاردىڭ ءتيىستى كەلىسۋلەر، رۇقساتتارسىز جانە پاترۋلدىك پوليتسيا باستاپ جۇرمەسە، ءوز ەلدى مەكەندەرىنەن تىس جەرلەرگە شىعۋىنا جول بەرمەۋ؛
  . ىشكى ىستەر، توتەنشە جاعدايلار، وقۋ-اعارتۋ، دەنساۋلىق ساقتاۋ مينيسترلىكتەرى مەن ءوڭىر اكىمدىكتەرى جازعى دەمالىس كەزىندە ءتيىستى قىزمەتتەردىڭ ۇزدىكسىز جۇمىسىن قامتاماسىز ەتۋ؛
بارلىق ۇيىمداستىرۋ ماسەلەسى 1-ماۋسىمعا دەيىن شەشىمىن تابۋى كەرەك.

مۇنان بولەك، پرەمەر-مينيستر كەلەسى تاپسىرمالارعا جەكە توقتالدى:

  . وڭىرلەردىڭ اكىمدىكتەرى مەن وقۋ- اعارتۋ مينيسترلىگى - مەملەكەت باسشىسىنىڭ ساۋىقتىرۋ لاگەرلەرى مەن بالالاردىڭ يننوۆاتسيالىق شىعارماشىلىق ورتالىقتارىن سالۋ جونىندەگى تاپسىرماسىن ىسكە اسىرۋدى جەدەلدەتسىن. بارلىق نىسان بەلگىلەنگەن مەرزىمدە پايدالانۋعا بەرىلۋگە ءتيىس؛
  . تۋريزم مينيسترلىگى - بالالار تۋريزمىنىڭ گەوگرافياسىن كەڭەيتۋ ءۇشىن اكىمدىكتەرمەن ءوڭىرارالىق ءوزارا ءىس-قيمىلدى جولعا قويۋى قاجەت.
- باتىس وڭىرىندەگى بالالارعا ەلىمىزدىڭ شىعىس ايماقتارىن كورىپ- ءبىلۋ قىزىقتى بولماق. ال وڭتۇستىك وبلىستارداعى وقۋشىلاردىڭ سولتۇستىك ايماقتارعا جانە كەرىسىنشە ساياحاتتاپ بارۋىن ۇيىمداستىرۋ قاجەت. بالالار ەلىمىزدىڭ كورىكتى جەرلەرى مەن باي مادەني مۇراسىن تانىپ-بىلۋگە ءتيىس، - دەپ اتاپ ءوتتى ولجاس بەكتەنوۆ.

اۆتور

مارلان جيەمباي