ۇكىمەت وتاندىق ءوندىرىستى دامىتۋ ماسەلەسىن تالقىلايدى

استانا. KAZINFORM - بۇگىن ساعات 10:00 دە ۇكىمەتتىڭ كەزەكتى وتىرىسى وتەدى. كۇن تارتىبىنە وتاندىق ءوندىرىستى دامىتۋ مەن قولداۋ شارالارى شىعارىلىپ وتىر.

نەگىزگى باياندامانى ونەركاسىپ جانە قۇرىلىس ءمينيسترى ەرسايىن ناعاسپايەۆ جاسايدى. ول بيىل 4 ايداعى وڭدەۋ ونەركاسىبى كورسەتكەن ناتيجەلەرگە توقتالادى. سونداي-اق مەملەكەت باسشىسىنىڭ تاپسىرماسىمەن وتاندىق تاۋار وندىرۋشىلەردى قولداۋ ءۇشىن مينيسترلىك تاراپىنان اتقارىلىپ جاتقان جۇمىستاردى اتاپ وتەدى. وڭدەۋ ونەركاسىبىن قولداۋداعى ءتيىمدى قۇرالداردىڭ ءبىرى - رەتتەلەتىن ساتىپ الۋلار جايىندا ءسوز قوزعاپ، 5-ايداعى كورسەتكىشتەرگە باسىمدىق بەرەدى. مۇنان بولەك، وڭىرلەرگە ينۆەستيتسيا تارتۋ جانە شاعىن- ورتا بيزنەستى قولداۋعا باعىتتالعان شاعىن ونەركاسىپتىك ايماقتار باعدارلاماسىنا دا نازار اۋدارتادى.

ايتا كەتەيىك، بيىل شامامەن 1,5 تريلليون تەڭگەنىڭ 190 يندۋستريالىق جوباسىن ىسكە قوسۋ كوزدەلىپ وتىر. بۇل 22,5 مىڭ جاڭا جۇمىس ورنىن اشۋعا جانە وتاندىق ەكونوميكاداعى وڭدەۋ ونەركاسىبىنىڭ پوزيتسياسىن نىعايتۋعا مۇمكىندىك بەرەدى. باسىمدىق بەرىلەتىن سالالار - مەتاللۋرگيا، ماشينا جاساۋ، حيميا ونەركاسىبى جانە باسقا دا جوعارى قوسىلعان قۇنى بار ءونىم شىعاراتىن سالالار. ونەركاسىپ سالاسىنداعى بيزنەستى ىنتالاندىرۋ ءۇشىن مەملەكەت 800 ميلليارد تەڭگە ءبولۋدى قاراستىردى، ونىڭ ىشىنە ونەركاسىپ الاڭدارىن قۇرۋ جوبالارىنا جەڭىلدەتىلگەن قارجى ءبولۋ دە كىرەدى.

وتىرىس قورىتىندىسى بويىنشا وتەتىن باسپا ءسوز كونفەرەنسياسىنا ق ر ونەركاسىپ جانە قۇرىلىس ۆيتسە-ءمينيسترى ولجاس ساپاربەكوۆ، ق ر قارجى ۆيتسە-ءمينيسترى داۋرەن كەڭبەيىل، «QazIndustry» قازاقستاندىق يندۋستريا جانە ەكسپورت ورتالىعى» ا ق باسقارما ءتوراعاسىنىڭ ورىنباسارى ايدار قوجاحمەتوۆ قاتىسادى.

ۇكىمەت وتىرىسىنىڭ تىكەلەي تاراتىلىمى PrimeMinister.kz سايتىندا، YouTube رەسمي ارناسىندا، Facebook الەۋمەتتىك جەلىسىندە، سونداي-اق UKIMET Telegram-كانالىندا جۇرەدى.

باسپا ءسوز كونفەرەنسياسىنىڭ تىكەلەي تاراتىلىمى YouTube رەسمي ارناسىندا جانە Facebook الەۋمەتتىك جەلىسىندە كورسەتىلەدى.

ايتا كەتەيىك، 27-مامىردا وتكەن ۇكىمەت وتىرىسىندا وتكەن جىلىتۋ ماۋسىمىنىڭ قورىتىندىسى جانە الداعى جىلۋ بەرۋ ماۋسىمىنا دايىندىق ماسەلەسى پىسىقتالعان ەدى.

كۇن تارتىبىنە شىعارىلعان ماسەلە بويىنشا ونەركاسىپ جانە قۇرىلىس ءمينيسترى ەرسايىن ناعاسپايەۆ بايانداما جاسادى.

ونىڭ ايتۋىنشا، وتكەن جىلدىڭ قورىتىندىسى بويىنشا، شامامەن 110 ميلليون توننا كومىر ءوندىرىلدى. ونىڭ ىشىندە حالىق پەن كوممۋنالدىق- تۇرمىستىق سەكتور 8,6 ميلليون توننا، ەنەرگيا جانە جىلۋ ءوندىرۋشى كاسىپورىندار 66 ميلليون توننا، ونەركاسىپ سەكتورى 6 ميلليون توننامەن قامتاماسىز ەتىلدى. ەكسپورتقا 30 ميلليون توننا كومىر شىعارىلدى. وتكەن جىلى جىلىتۋ ماۋسىمىندا كوممۋنالدىق-تۇرمىستىق سەكتور 7,9 ميلليون توننا كومىر تۇتىنادى دەپ جوسپارلاندى جانە بارلىق تۇتىنۋشى تولىق كولەمدە كومىرمەن قامتىلىپ، جوسپار 101 پايىزعا ورىندالعان.

− رەسپۋبليكالىق شتابتىڭ «قازاقستان تەمىر جولى»، جەرگىلىكتى اتقارۋشى ورگاندارمەن جانە كومىر وندىرۋشىلەرمەن بىرلەسكەن جۇمىسى ارقىلى كومىر تۇراقتى جەتكىزىلدى. قويمالار مەن تەمىرجول تۇيىقتارىندا شامامەن 350 مىڭ توننا كومىر قورى بار. 2025-2026 -جىلدارعا ارنالعان جىلىتۋ ماۋسىمىنا كومىردى ۇزدىكسىز جەتكىزۋ جوسپارى ازىرلەنىپ، جەرگىلىكتى اتقارۋشى ورگاندارعا، قتج جانە كومىر كومپانيالارىنا جولداندى، − دەدى مينيستر.

سونىمەن قاتار وتىرىستا ەنەرگەتيكا ۆيتسە-ءمينيسترى سۇڭعات ەسىمحانوۆ ەلىمىزدە بيىل ىسكە قوسىلاتىن ەنەرگەتيكا سالاسىنداعى ءبىرقاتار قۋات كوزىنە توقتالدى.

- بيىل ءبىز 620 مۆت ەنەرگيا كولەمىن ىسكە قوسامىز: ونىڭ 166 م ۆت ءداستۇرلى ەنەرگەتيكا، «تۇلپار» ەلەكتروستانساسىندا 130 م ۆت، تەكەلى جىلۋ ورتالىعىندا 36 م ۆت. وعان قوسىمشا جاڭارتىلاتىن ەنەرگيا كوزدەرىنىڭ 9 وبەكتىسىن (455 م ۆت) بيىل ىسكە قوسامىز. بارلىق جوبا باقىلاۋدا، - دەدى ول.

وتىرىستى قورىتىندىلاعان ۇكىمەت باسشىسى ولجاس بەكتەنوۆ وبلىس باسشىلارى مەن مينيسترلەرگە مىنانداي 5 ناقتى تاپسىرما بەردى:

ءوڭىر اكىمدىكتەرى بارلىق كونكۋرستىق ءراسىمدى ەكى اپتا مەرزىمدە اياقتاپ، جوندەۋ جۇمىستارىنا ناقتى كىرىسۋى كەرەك. باسى ارتىق بيۋروكراتياعا جول بەرۋگە بولمايدى. بيىل ىسكە قوسۋ جوسپارلانىپ وتىرعان جاڭا جىلۋ نىساندارى بويىنشا بارلىق جۇمىستاردى تامىز ايىنان كەشىكتىرمەي اياقتاۋ قاجەت. اكىمدەر جىلۋ نىساندارىنا اپتا سايىن بارىپ، جاعدايدى جەكە باقىلاۋعا الۋى جانە بارلىق تۋىنداعان تاۋەكەل بويىنشا شۇعىل ارەكەت ەتۋى ءتيىس؛

ەنەرگەتيكا جانە ونەركاسىپ مينيسترلىكتەرى، ءوڭىر اكىمدىكتەرى 10-ماۋسىمعا دەيىن جىلىتۋ ماۋسىمىنا دايىندىق جوسپارلارىن ناقتىلاۋى قاجەت. سولتۇستىك، ورتالىق جانە شىعىس وڭىرلەردە بارلىق ينجەنەرلىك ينفراقۇرىلىم مەن تۇرعىن ءۇي-كوممۋنالدىق شارۋاشىلىق وبەكتىلەرى 15 قىركۇيەككە دەيىن، ال قالعان وڭىرلەردە 15- قازانعا دەيىن تولىقتاي ءازىر بولۋ كەرەك.

«KEGOC» كومپانياسى ەنەرگەتيكا مينيسترلىگىمەن بىرلەسىپ، 15 ماۋسىمعا دەيىن الداعى جىلىتۋ ماۋسىمىندا ۇلتتىق ماڭىزى بار ستانتسيالارعا ارنالعان جابدىقتاردىڭ جۇمىس رەجيمدەرىن بەكىتۋى قاجەت. جوندەۋ مەرزىمدەرىن اۋىستىرۋعا نەمەسە جۇمىس كولەمىن ازايتۋعا جول بەرىلمەيدى. ءاربىر فاكت بويىنشا مەنشىك يەلەرىنە، سول سياقتى باسقارۋشى كومپانيالارعا قاتىستى شارالار قابىلدانادى.

ەنەرگەتيكا مينيسترلىگى كولىك مينيسترلىگىمەن جانە اكىمدىكتەرمەن بىرلەسىپ، 1-قىركۇيەككە دەيىن جىلۋ كوزدەرى مەن تۇيىقتاردا وتىن قورىن الدىن الا جيناقتاۋدى قامتاماسىز ەتۋى ءتيىس.

ۇكىمەت اپپاراتى وڭىرلەردىڭ جىلىتۋ ماۋسىمىنا ازىرلىك بارىسىنا تۇراقتى نەگىزدە باقىلاۋ جاساپ، پرەمەر-مينيسترگە ءتيىستى اقپارات بەرىپ وتىرۋى كەرەك.

اۆتور

مارلان جيەمباي