ۇكىمەت سۋ شارۋاشىلىعىنا قاتىستى ماسەلەلەردى تالقىلايدى
استانا. KAZINFORM - بۇگىن ۇكىمەت وتىرىسى وتەدى. وندا مينيسترلەر كابينەتىنىڭ مۇشەلەرى سۋ شارۋاشىلىعىنا قاتىستى ماسەلەلەردى ەگجەي- تەگجەيلى تالقىعا سالادى.
ناقتىراق ايتقاندا، وتىرىستىڭ كۇن تارتىبىنە شىعارىلعان ماسەلە بويىنشا سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ سۋمەن جابدىقتاۋ جانە سۋ تارتۋ جۇيەلەرىن دامىتۋ، سيفرلاندىرۋ مەن سۋ ۇنەمدەۋ تەحنولوگيالارىن ەنگىزۋ شارالارى جايلى بايانداما جاسايدى. مينيستر سۋ ينفراقۇرىلىمىن جاقسارتۋ ماقساتىندا ۆەدومستۆو اتقارىپ جاتقان جۇمىستارعا توقتالادى. سونداي-اق ول ۇلتتىق سۋ رەسۋرستارى اقپاراتتىق جۇيەسى تۋرالى دا ەسەپ بەرەدى.
ال ونەركاسىپ جانە قۇرىلىس ءمينيسترى ەرسايىن ناعاسپايەۆ مەملەكەت باسشىسىنىڭ جىل سوڭىنا دەيىن بارلىق ەلدى مەكەندى 100 پايىز اۋىز سۋمەن قامتاماسىز ەتۋ تاپسىرماسىن ورىنداۋ ءۇشىن ۆەدومستۆو تاراپىنان اتقارىلعان جۇمىستارعا توقتالادى. سونداي-اق ول پرەزيدەنتتىڭ ەرەكشە باقىلاۋىندا تۇرعان ماڭعىستاۋ ءوڭىرى حالقىن تازا اۋىز سۋمەن قامتاماسىز ەتۋ جوبالارىنا باسا نازار اۋدارتادى. مۇنان بولەك، سۋ جۇيەلەرىن باسقارۋ مەن تيىمدىلىگىن ارتتىرۋ ءۇشىن قولعا الىنعان سيفرلىق شەشىمدەردى اتايدى.
وتىرىس قورىتىندىسىندا باسپا ءسوز كونفەرەنتسياسى ۇيىمداستىرىلادى. وندا مىنا ۇكىمەت مۇشەلەرى ب ا ق وكىلدەرى تاراپىنان تۋىنداعان ساۋالدارعا جاۋاپ بەرەدى:
1. سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ؛
2. ونەركاسىپ جانە قۇرىلىس ۆيتسە-ءمينيسترى قۋاندىق قاجكەنوۆ.
ۇكىمەت وتىرىسىنىڭ تىكەلەي تاراتىلىمى PrimeMinister.kz سايتىنان، YouTube رەسمي ارناسىندا، Facebook الەۋمەتتىك جەلىسىندە، سونداي- اق UKIMET Telegram-كانالىندا جۇرەدى. ءباسپاسوز كونفەرەنتسياسىنىڭ تىكەلەي تاراتىلىمى YouTube رەسمي ارناسىندا جانە Facebook الەۋمەتتىك جەلىسىندە كورسەتىلەدى.
ەستەرىڭىزگە سالا كەتسەك، وتكەن اپتادا پرەمەر-مينيستر ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا مەملەكەت باسشىسىنىڭ «تازا قازاقستان» باستاماسىن جۇزەگە اسىرۋ ماسەلەسى قارالدى. وندا ەكولوگيا جانە تابيعي رەسۋرستار ءمينيسترى ەرلان نىسانبايەۆ نەگىزگى بايانداما جاساسا، مادەنيەت جانە اقپارات ءمينيسترى ايدا بالايەۆا ەكولوگيالىق جانە مادەني قۇندىلىقتاردى ىلگەرىلەتۋ، وقۋ-اعارتۋ ءمينيسترى عاني بەيسەمبايەۆ مەكتەپكە دەيىنگى جانە مەكتەپتەگى ەكولوگيالىق تاربيە، عىلىم جانە جوعارى ءبىلىم ءمينيسترى ساياسات نۇربەك ەكولوگيالىق ءبىلىم بەرۋ دەڭگەيىن ارتتىرۋ، تۋريزم جانە سپورت ءمينيسترى ەربول مىرزابوسىنوۆ ەكوتۋريزم مەن سالاۋاتتى ءومىر سالتىن ناسيحاتتاۋ تۋرالى ءسوز سويلەدى.
ەكولوگيا جانە تابيعي رەسۋرستار ءمينيسترى ەرلان نىسانبايەۆتىڭ ايتۋىنشا، بيىل «تازا قازاقستان» باستاماسى اياسىندا ەلىمىزدە رەسپۋبليكالىق جانە حالىقارالىق اكتسيالاردى قوسا العاندا بارلىعى 573 ءىس-شارا ءوتتى.
ءىس-شارالاردىڭ ناتيجەسىندە:
- 189 مىڭ توننا قوقىس جينالدى؛
- 735 مىڭ گا اۋماق تازارتىلدى؛
- 2 ميلليوننان استام اعاش وتىرعىزىلدى.
مادەنيەت جانە اقپارات ءمينيسترى ايدا بالايەۆا «تازا قازاقستان» باستاماسى از ۋاقىت ىشىندە جالپىۇلتتىق سيپات الىپ، حالقىمىزدى ورتاق مۇددەگە بىرىكتىرگەن ۇلكەن يدەولوگيالىق پلاتفورماعا اينالعانىن ايتادى.
- مينيسترلىك وتكەن جىلى كينو سالاسىنداعى يدەولوگيالىق باسىمدىقتاردى ناقتىلادى. قازىرگى كەزدە «زاڭ مەن ءتارتىپ»، «تازا قازاقستان» - باستى تاقىرىپتاردىڭ بىرىنە اينالۋدا. «تازا قازاقستان» يدەياسى شەتەلدەگى مادەني ءىس-شارالار، حالىقارالىق فورۋمدار مەن فەستيۆالدەر، مادەنيەت كۇندەرى اياسىندا دا كەڭىنەن تانىستىرىلىپ كەلەدى. تەلەارنالاردا «تازا قازاقستان» برەندىمەن سەريالدار، دەرەكتى فيلمدەر مەن ارنايى جوبالار قوسىلادى، - دەدى ول.
وقۋ-اعارتۋ ءمينيسترى عاني بەيسەمبايەۆ تاعىلىمى تەرەڭ «تازا قازاقستان» ۇعىمىن ءىس جۇزىندە جۇزەگە اسىرۋ - وزىق ويلى ۇرپاق تاربيەلەۋ ناتيجەسىندە مۇمكىن بولاتىنىنا نازار اۋدارتتى.
- مينيسترلىك مۇددەلى مەملەكەتتىك ورگاندارمەن، قوعامدىق ۇيىمدارمەن بىرلەسە وتىرىپ، اتالعان جۇمىستاردى الداعى ۋاقىتتا دا جالعاستىرادى، - دەدى مينيستر.
عىلىم جانە جوعارى ءبىلىم ءمينيسترى ساياسات نۇربەك پرەزيدەنتتىڭ «تازا قازاقستان» باستاماسىن جوعارى ءبىلىم سالاسىندا جۇيەلى تۇردە جۇزەگە اسىرۋ جايىنا توقتالدى.
- جالپى، مەملەكەت باسشىسى «تازا قازاقستان» اكتسياسىن جاريالاعاننان بەرى جوعارى وقۋ ورىندارىنىڭ ستۋدەنتتەرى مەن وقىتۋشىلارىنىڭ قاتىسۋىمەن 1500 عا جۋىق ءارتۇرلى ءىس- شارالار وتكىزىلدى. بۇل شارالارعا جوعارى وقۋ ورىندارىنان 240 مىڭنان اسا ادام قاتىستى. بارلىق جوعارى وقۋ ورىندارى ستۋدەنتتەرى اراسىندا «Taza Like» ءىس- شاراسى شەڭبەرىندە ەكوساعاتتار وتكىزىلدى، - دەدى ساياسات نۇربەك.
تۋريزم جانە سپورت ءمينيسترى ەربول مىرزابوسىنوۆ بولسا «تازا قازاقستان» رەسپۋبليكالىق ەكولوگيالىق ناۋقانى اياسىنداعى باستامالار «تازا ءتان، تازا جان، تازا سانا» قاعيداتتارىنا نەگىزدەلگەنىن اتاپ ءوتتى.
- قازاقستاندا ەكوتۋريزم سەرپىندى دامىپ كەلەدى. بۇعان تابيعي ارتۇرلىلىك، مەملەكەتتىك قولداۋ جانە حالىقتىڭ قىزىعۋشىلىعى اسەر ەتۋدە. 2024 -جىلى ۇلتتىق پاركتەرگە 2,8 ميلليوننان استام ادام باردى. بۇل - 2023 -جىلمەن سالىستىرعاندا %18 عا ارتىق. ەڭ تانىمال پاركتەر: ىلە- الاتاۋى، شارىن، التىن- ەمەل جانە كولساي. سوڭعى بەس جىلدا ۇلتتىق پاركتەردە 2,1 ميلليارد تەڭگە كولەمىندە جەكە ينۆەستيتسيا تارتىلىپ، 8 جوبا ىسكە اسىرىلدى، - دەدى ول.
ۇكىمەت وتىرىسىن قورىتىندىلاعان پرەمەر- مينيستر ولجاس بەكتەنوۆ مىناداي تاپسىرمالار بەردى:
- قورشاعان ورتانى لاستاعان ادامدارعا قاتىستى قاتاڭ شارالار قولدانا وتىرىپ، كەڭ اۋقىمدى ءتۇسىندىرۋ جۇمىسىن جۇرگىزۋ؛
- وسكەلەڭ ۇرپاقتىڭ بويىندا ەكولوگيالىق مادەنيەتتى تاربيەلەۋگە جۇرتشىلىقتى، قاۋىمداستىقتار مەن بىرلەستىكتەردى كەڭىنەن تارتۋدى قامتاماسىز ەتۋ؛
- وتباسىلىق ءداستۇرلى قۇندىلىقتاردى، قوعامداعى دۇرىس مىنەز- قۇلىقتى، مادەني مۇرالارعا ۇقىپتى كوزقاراستى، وتانشىلدىق قاسيەتتەردى ءسىڭىرۋ؛
- تۋريزم جانە سپورت مينيسترلىگىنە ءوڭىر اكىمدىكتەرىمەن بىرلەسىپ، ءاربىر ەلدى مەكەن بويىنشا بارلىق بۇقارالىق سپورتتىق ءىس-شارانىڭ ءبىرىڭعاي كۇنتىزبەسىن ازىرلەۋ؛
- جالپىعا بىردەي پايدالانۋعا ارنالعان نەگىزگى ەكوتۋريزم وبەكتىلەرىنىڭ كارتاسىن جاساپ، وندا ورنالاسقان جەرى، تۋريستىك وبەكتىلەر جانە باسقا دا قاجەتتى مالىمەتتەر كورسەتۋ؛
- مادەنيەت جانە اقپارات مينيسترلىگىنە مۇددەلى مەملەكەتتىك ورگاندارمەن بىرلەسىپ، ءبىر اي مەرزىمدە حالىق اراسىندا ەكولوگيالىق جانە رۋحاني مادەنيەتتى تاربيەلەۋ جونىندە ناقتى ۇسىنىستار ازىرلەۋ؛
- اتقارىلعان جۇمىستىڭ قورىتىندىسى بويىنشا ەكولوگيالىق مادەنيەتتى دامىتۋدىڭ «تازا قازاقستان» تۇجىرىمداماسىن وزەكتەندىرۋ.
- ەلىمىزدىڭ ەكولوگيالىق ماسەلەلەرىن شەشۋگە جانە تابيعي بايلىعىمىزدى ساقتاۋعا تۇرعىندار دا بارىنشا اتسالىسىپ كەلەدى. ءبىلىم وشاقتارىندا «ادال ازامات» ءبىرىڭعاي باعدارلاماسى اياسىندا بالالارعا ەكولوگيالىق تاربيە بەرۋ جۇمىستارى جۇرگىزىلىپ جاتىر. اتالعان باستاماعا اتا- انالار مەن ۇستازدار قاۋىمى دا قاتىسىپ جاتىر. مۇنداي ەكولوگيالىق مادەنيەت قازىرگى قازاقستان قوعامىنىڭ كۇندەلىكتى ءومىر سالتىنا اينالۋى قاجەت. تازالىق تازارتىلعان جەردە ەمەس، قوقىس تاستالماعان جەردە. ءبارىمىز وسى قاراپايىم عانا قاعيدانى ۇنەمى جادىمىزدا ۇستاعانىمىز ابزال، - دەيدى ولجاس بەكتەنوۆ.
