ۇكىمەت نەمىس ينۆەستورلارىمەن بىرگە جەتىسۋدا حالىقارالىق اۋەجاي سالادى

استانا. KAZINFORM - پرەمەر-مينيستر ولجاس بەكتەنوۆ Skyhansa كومپانياسىنىڭ نەگىزىن قالاۋشى جانە ديرەكتورلار كەڭەسىنىڭ مۇشەسى، دوكتور كريستين گرەتتسباحپەن كەزدەسۋ وتكىزدى.

وندا جەتىسۋ وبلىسىنداعى «قورعاس» شەكارا ماڭى ىنتىماقتاستىعى حالىقارالىق ورتالىعى ماڭىندا جۇك جانە جولاۋشىلار اۋەجايىن سالۋ جوباسىن جۇزەگە اسىرۋ ماسەلەلەرى تالقىلاندى. بۇل تۋرالى ۇكىمەتتىڭ باسپا ءسوز قىزمەتى مالىمدەدى.

«قورعاس-شىعىس قاقپاسى» ا ە ا- داعى حالىقارالىق جۇك جانە جولاۋشىلار اۋەجايىنىڭ جوباسى ICAO حالىقارالىق ۇسىنىمدارىنا سايكەس اۆياتسيالىق ينفراقۇرىلىم سالۋدىڭ ءۇش كەزەڭدى باعدارلاماسىن كوزدەيدى.

ءبىرىنشى كەزەڭ شەڭبەرىندە 2027-جىلعا دەيىن: وتكىزۋ مۇمكىندىگى ساعاتىنا 50 ادامعا دەيىن جولاۋشىلار تەرمينالىن (2032-جىلعا قاراي - ساعاتىنا 500 ادامعا دەيىن)؛

JET A-1 اۆياوتىنى جاڭا ءتۇرىنىڭ زاماناۋي وتىن قويماسىنىڭ كولەمى جىلىنا 200 مىڭ تونناعا دەيىن (2032-جىلعا قاراي - 550 مىڭ تونناعا دەيىن)؛

اۆتوتۇراعى جانە جىلىنا 50 مىڭ توننا تەمىرجول تۇيىعى بار جۇك تەرمينالىن (2032-جىلعا قاراي - جىلىنا 250 مىڭ تونناعا دەيىن) سالۋ جوسپارلانىپ وتىر.

ەكىنشى جانە ءۇشىنشى كەزەڭدەر شەڭبەرىندە 2032-جىلعا دەيىن تۋريستىك جانە ويىن-ساۋىق ينفراقۇرىلىمى دا قۇرىلادى. ينۆەستيتسيالاردىڭ جالپى كولەمى شامامەن 250 ميلليارد تەڭگە. سونداي-اق جوبادا Air- Rail- Auto-Air جۇك تاسىمالدارىنىڭ مۋلتيمودالدى سىزباسىن ازىرلەۋ جانە ازيا-تىنىق مۇحيتى ايماعى باعىتىنداعى كولىك جانە لوگيستيكالىق مارشرۋتتاردىڭ تۇيىسكەن جەرىندە ەكونوميكالىق ءوسۋدىڭ جاڭا مۇمكىندىكتەرىن اشۋ كوزدەلگەن.

- پرەزيدەنت قاسىم-جومارت توقايەۆ قازاقستان ەكونوميكاسى قۇرىلىمىن ءارتاراپتاندىرۋ جونىندەگى اۋقىمدى جۇمىس شەڭبەرىندە كولىك- لوگيستيكا سالاسىن باسىم باعىتتاردىڭ ءبىرى رەتىندە اتادى. جەتىسۋ وبلىسىندا زاماناۋي اۋەجاي سالۋ جوباسىن جۇزەگە اسىرۋ ينفراقۇرىلىمدى دامىتۋعا ەلەۋلى سەرپىن بەرەدى جانە قازاقستاننىڭ قىتاي، ورتالىق ازيا جانە ەۋروپا اراسىنداعى ترانزيتتىك حاب رەتىندەگى ءرولىن نىعايتادى، - دەپ اتاپ ءوتتى پرەمەر-مينيستر ولجاس بەكتەنوۆ.

ءوز كەزەگىندە Skyhansa كومپانياسىنىڭ نەگىزىن قالاۋشى، ديرەكتورلار كەڭەسىنىڭ مۇشەسى، دوكتور كريستين گرەتتسباح جوبانىڭ اۆياتسيالىق ينفراقۇرىلىمدى دامىتۋعا عانا ەمەس، سونىمەن قاتار وڭىردە زاماناۋي لوگيستيكالىق جانە ىسكەرلىك ورتالىق قالىپتاستىرۋعا باعىتتالعانىن اتاپ ءوتتى.

- ءبىز جاي عانا اۋەجاي ەمەس، حالىقارالىق دەڭگەيدەگى دامىعان ينفراقۇرىلىمى: جۇك جانە جولاۋشىلار تەرمينالدارى، جانارماي قۇيۋ كەشەنى، اۋە كەمەلەرىنە اۆياتسيالىق-تەحنيكالىق قىزمەت كورسەتۋ ورتالىعى (MRO)، بيزنەس ورتالىعى، مۋلتيمودالدى لوگيستيكالىق مۇمكىندىكتەرگە ارنالعان قوناق ۇيلەرى بار كوپفۋنكتسيونالدى وڭىرلىك حاب قۇرىپ جاتىرمىز. ونىڭ قىتايمەن شەكاراعا جاقىن ورنالاسۋى «قورعاس - شىعىس قاقپاسى» ا ە ا شەڭبەرىندە حالىقارالىق ساۋدانى دامىتۋعا قولايلى جاعداي جاسايدى. ال ونىڭ تەمىرجول جانە اۆتوجول جەلىلەرىنە قوسىلۋى جاڭا جىبەك جولىنداعى كەلەشەگى زور لوگيستيكالىق توراپتاردىڭ بىرىنە اينالدىرادى، - دەپ اتاپ ءوتتى دوكتور كريستين گرەتتسباح.

كەزدەسۋ سوڭىندا قر كولىك مينيسترلىگى مەن Skyhansa اراسىندا ينۆەستيتسيالار تۋرالى كەلىسىمگە قول قويىلدى. قۇجاتقا سايكەس، ينۆەستور قاجەتتى اۆياتسيالىق ينفراقۇرىلىم قۇرىلىسىن، نەگىزىنەن وتاندىق ماتەريالدار مەن قىزمەتتەردى پايدالانۋدى، سونداي- اق جوبانى جۇزەگە اسىرۋعا قىزمەتكەرلەردىڭ كەمىندە %90 قازاقستان ازاماتتارى بولۋىن قامتاماسىز ەتۋگە مىندەتتەلەدى.

قازاقستاندىق تاراپ ينجەنەرلىك جانە كولىك ينفراقۇرىلىمىن تارتىپ، سونداي-اق ارنايى ەكونوميكالىق ايماققا قاتىسۋشىلارعا ماقساتتى جەڭىلدىكتەر بەرەدى.

ايتا كەتەيىك، جوبا Skyhansa بىرلەسكەن قازاقستاندىق-گەرماندىق كاسىپورنىنىڭ قاتىسۋىمەن جۇزەگە اسىرىلىپ جاتىر. گەرمانيا تاراپىنان سەرىكتەس رەتىندە اۆياتسيالىق تەرمينالدار مەن ينفراقۇرىلىمدى دامىتۋ بويىنشا جوعارى قىزمەت كورسەتەتىن The Hansa Consortium كومپانياسى، قازاقستان تاراپىنان - قازاقستان، ورتالىق ازيا جانە كاۆكاز نارىعىنداعى اۋەجايلار ءۇشىن كەشەندى قىزمەتتەر مەن ينجينيرينگتىك شەشىمدەر ۇسىناتىن Skymax Technologies كومپانيالار توبى ارەكەت ەتەدى.

ايتا كەتەيىك، جەتىسۋ وبلىسىندا سەگىز جاڭا سۋ قويماسى سالىنادى.