ۇكىمەت كەلەسى جىلى ۇلتتىق قوردان 1,6 تريلليون تەڭگە ترانسفەرت تارتادى
بۇگىن سەناتتىڭ جالپى وتىرىسىندا «ۇلتتىق قوردان 2024-2026-جىلدارعا ارنالعان كەپىلدەندىرىلگەن ترانسفەرت تۋرالى» زاڭ ماقۇلداندى، دەپ حابارلايدى Kazinform.
«بيۋجەتتىڭ كىرىس بولىگىندەگى كەپىلدەندىرىلگەن جانە نىسانالى ترانسفەرت كولەمى ۇلتتىق قوردىڭ جيناق فۋنكتسياسىن قامتاماسىز ەتۋ جونىندەگى بيۋجەت كودەكسىنىڭ ەرەجەلەرىن ەسكەرە وتىرىپ ايقىندالعان. سىزدەردىڭ قاراۋىڭىزعا ۇسىنىلعان ۇلتتىق قوردان 2024-2026-جىلدارعا ارنالعان كەپىلدەندىرىلگەن ترانسفەرت تۋرالى زاڭى وسى تالاپتاردى ەسكەرە وتىرىپ ازىرلەندى. بۇل رەتتە ۇكىمەت كەپىلدەندىرىلگەن ترانسفەرتتىڭ مولشەرىن ەكىنشى جىل بيۋجەتتىك قاعيدالاردى قولدانا وتىرىپ انىقتاپ وتىر. بۇل قاعيدالار ۇلتتىق قور قاراجاتىنىڭ ساقتالۋىن قامتاماسىز ەتۋگە جانە ونىڭ ۆاليۋتا اكتيۆتەرىن 2030-جىلعا قاراي 100 ميلليارد ا ق ش دوللارىنا دەيىن جەتكىزۋگە ىقپال ەتەدى»، - دەدى ۇلتتىق ەكونوميكا ءمينيسترى الىبەك قۋانتىروۆ.
ونىڭ ايتۋىنشا، زاڭدا مۇنايدىڭ كەسىمدى باعاسى 2024-جىلى باررەلىنە 43,4 ا ق ش دوللارىن، 2025-2026-جىلدارى باررەلىنە 40,2-41,8 دوللار دەڭگەيىندە بەلگىلەنگەن.
وسىنى ەسكەرە وتىرىپ، ۇلتتىق قوردان كەپىلدەندىرىلگەن ترانسفەرتتىڭ مولشەرى 2023-جىلى 2,2 تريلليون تەڭگەدەن 2024-2026-جىلدارى جىل سايىن 2 تريلليون تەڭگەگە دەيىن تومەندەۋمەن ايقىندالدى.
«سونداي-اق 2024-جىلى ۇلتتىق اۋقىمداعى الەۋمەتتىك ماڭىزى بار جانە ستراتەگيالىق ماڭىزدى ينفراقۇرىلىمدىق جوبالاردى قارجىلاندىرۋ ءۇشىن ۇلتتىق قوردان 1,6 تريلليون تەڭگە كولەمىندە نىسانالى ترانسفەرت تارتۋ جوسپارلانىپ وتىر. جوسپارلى كەزەڭدە ۇلتتىق قوردىڭ ۆاليۋتالىق اكتيۆتەرى 2024-جىلى 68 ميلليارد ا ق ش دوللارىنا دەيىن قالپىنا كەلتىرىلىپ، ودان ءارى 2025-2026-جىلدارى 80,7-93,3 ميلليارد دوللارعا دەيىن وسەدى دەپ ەسكەرىلگەن»، - دەدى مينيستر.
