ۇكىمەت دەنساۋلىق ساقتاۋ مينيسترلىگىنىڭ قۇزىرەتىن كەڭەيتتى

استانا. KAZINFORM - قازاقستان ۇكىمەتى 2025 -جىلعى 21-شىلدەدەگى قاۋلىمەن دەنساۋلىق ساقتاۋ مينيسترلىگى تۋرالى ەرەجەگە وزگەرىستەر مەن تولىقتىرۋلار ەنگىزدى.

قۇجاتقا سايكەس، مينيسترلىكتىڭ قۇزىرەتى كەڭەيتىلدى. اتاپ ايتقاندا، ۆەدومستۆوعا كەلەسى ەرەجەلەردى بەكىتۋ بويىنشا وكىلەتتىك بەرىلدى:

- مەديتسينالىق ماماندىقتار بويىنشا قوسىمشا ءبىلىم بەرۋ ۇيىمدارىنىڭ ءتىزىمىن قالىپتاستىرۋ؛

- دەنساۋلىق ساقتاۋ سالاسىنداعى اككرەديتتەۋ، اككرەديتتەۋدەن كەيىنگى مونيتورينگ جۇرگىزۋ جانە اككرەديتتەۋ تۋرالى كۋالىكتى قايتارىپ الۋ؛

- جۇكتى جانە بوسانعان ايەلدەردىڭ ءولىم جاعدايى، جوسپارلى مەديتسينالىق كومەك كەزىندە پاتسيەنتتەردىڭ كەنەتتەن قايتىس بولۋى تۋرالى شۇعىل اقپارات ۇسىنۋ؛

- تاۋەلسىز ساراپشىلار ءتىزىمىن جۇرگىزۋ؛

- ءبىرىڭعاي مەديتسينالىق اقپاراتتىق call-ورتالىقتىڭ قىزمەتىن ۇيىمداستىرۋ؛

- پاتسيەنت دەرتىنىڭ شۇعىلداناتىن كاسىبىمەن بايلانىسى بارىن ورناتۋ؛

- مەديتسينالىق قالدىقتاردى ەسەپكە الۋ جانە جۇقپالى اۋرۋلار مەن ۋلانۋ جاعدايى تۋرالى جەدەل حابارلاما؛

- بالا كۇتىمىنە بايلانىستى دەمالىستاعىلاردى گيگيەنالىق وقىتۋ؛

- سانيتاريالىق-ەپيدەمياعا قارسى ءىس-شارالار جۇرگىزۋ كەزىندە مەملەكەتتىك ورگانداردىڭ ءوزارا ارەكەتتەستىگى؛

- پاتوگەندى ميكرواعزالاردىڭ وندىرىستىك كوللەكتسيالارىن قالىپتاستىرۋ جانە پاتوگەندى بيولوگيالىق اگەنتتەرمەن جۇمىس ىستەۋگە رۇقسات بەرۋ؛

- تاۋەكەلدى ءتاسىلدى ەسكەرە وتىرىپ، دارىلىك زاتتار مەن مەديتسينالىق بۇيىمداردى ساپانى باقىلاۋ ءۇشىن نارىقتان ىرىكتەۋ؛

- ازاماتتاردى العاشقى كومەك كورسەتۋ داعدىلارىنا ۇيرەتۋ جانە شۇعىل جاعداي تىزبەسىن بەكىتۋ؛

- كامەلەتكە تولماعاندار مەن جاستاردىڭ رەپرودۋكتيۆتىك جانە پسيحيكالىق دەنساۋلىعىن قورعاۋ بويىنشا مەديتسينالىق كومەكتى ۇيىمداستىرۋ؛

- پسيحيكالىق بۇزىلىستارى بار ادامداردى ديناميكالىق باقىلاۋ؛

- ترانسپلانتاتسيا كەزىندە تىندەردىڭ يممۋنولوگيالىق سايكەستىگىن انىقتاۋ جانە HLA-زەرتحانالارىنىڭ قىزمەتى؛

- جاساندى ورگاندار مەن تىندەردى ترانسپلانتاتسيالاۋ؛

- كلينيكالىق بازالاردى، ۋنيۆەرسيتەتتىك اۋرۋحانالاردى جانە ينتەگراتسيالانعان مەديتسينالىق ورتالىقتاردى ۇيىمداستىرۋ.

سونداي-اق مينيسترلىك كەلەسى ماسەلەلەردى بەكىتەدى:

- ءدارى-دارمەكتى ساۋدا اتاۋلارى بويىنشا بولشەك جانە كوتەرمە ساۋداداعى شەكتى باعاسىن؛

- ۇزاق مەرزىمدى شارتتار اياسىندا ءبىرىڭعاي ديستريبيۋتور ارقىلى ساتىپ الىناتىن ءدارى- دارمەك پەن مەديتسينالىق بۇيىمدار تىزبەسىن؛

- العاشقى كومەكتى كورسەتۋ ستاندارتتارى جانە ءتيىستى فارماتسيەۆتيكالىق تاجىريبە ستاندارتتارىن؛

- ءدارى-دارمەك پەن مەديتسينالىق بۇيىمداردى كوتەرمە جانە بولشەك ساتۋ ەرەجەلەرىن؛

- فارماتسيەۆتيكالىق ينسپەكتورلاردى تىركەۋ جانە ينسپەكتسيالاۋ ەرەجەلەرىن.

ودان بولەك، ءبىرقاتار وكىلەتتىكتىڭ جاڭا رەداكتسياسى ۇسىنىلعان. ونىڭ ىشىندە:

- تەكسەرۋ پاراقتارىن، تاۋەكەل دارەجەسىن باعالاۋ كريتەريلەرىن جانە تەكسەرۋ كەستەلەرىن بەكىتۋ؛

- تەگىن مەملەكەتتىك كەپىلدەندىرىلگەن مەديتسينالىق كومەك پەن مىندەتتى الەۋمەتتىك مەديتسينالىق ساقتاندىرۋ جۇيەسى شەڭبەرىندە ءدارى-دارمەك پەن مەديتسينالىق بۇيىمداردىڭ باعاسىن رەتتەۋ؛

- مەديتسينالىق ۇيىمدار ءۇشىن ۇلگىلىك شتاتتار مەن شتاتتىق نورماتيۆتەردى بەكىتۋ؛

- مەديتسينا قىزمەتكەرلەرىنىڭ ۇزدىكسىز كاسىبي دامۋى ناتيجەلەرىن راستاۋ؛

- دەنساۋلىق ساقتاۋ قىزمەتكەرلەرىنىڭ ماماندىقتار نومەنكلاتۋراسى مەن بىلىكتىلىك سيپاتتامالارىن بەكىتۋ؛

- دەنساۋلىق ساقتاۋ ينفراقۇرىلىمىن دامىتۋدىڭ ءبىرىڭعاي پەرسپەكتيۆالىق جوسپارىن قالىپتاستىرۋ.

قاۋلى قول قويىلعان كۇنىنەن باستاپ كۇشىنە ەنەدى.

ايتا كەتسەك، بىرەر كۇن بۇرىن مەملەكەت باسشىسى قاسىم-جومارت توقايەۆ مەديتسينا قىزمەتكەرلەرىنە كۇش كورسەتكەنى ءۇشىن جازانى كۇشەيتۋدى تاپسىردى.