ۇكىمەت باسشىسى: پەريزات قايرات ءىسى — زاڭنامالىق وزگەرىستەر ءۇشىن مۇمكىندىك

استانا. KAZINFORM - ۇكىمەت باسشىسى ولجاس بەكتەنوۆ ميللياردتاعان قارجىنى جىمقىردى دەپ كۇدىككە ىلىنگەن قايىرىمدىلىق قورىنىڭ جەتەكشىسى پەريزات قايراتتىڭ ىسىنە قاتىستى پىكىر ءبىلدىردى.

ۇكىمەت وتىرىسىنان كەيىن وتكەن باسپا ءسوز ءماسليحاتىندا پرەمەر- مينيستر ولجاس بەكتەنوۆكە:

- قازىر پەريزات قايراتقا قاتىستى ميللياردتاعان قاراجاتتىڭ جىمقىرىلۋىنا بايلانىستى رەزونانستى ءىس ءجۇرىپ جاتىر. وسى ورايدا قايىرىمدىلىق قورلارى مەن قاراجات جيناۋمەن اينالىساتىن ۇيىمدارعا قويىلاتىن تالاپتار مەن ولاردىڭ جۇمىسىنا قانداي ءدا بىر وزگەرىستەر ەنگىزىلە مە؟ - دەگەن ساۋال قويىلدى.

- ءيا، مەن بۇل جاعدايدان حابارىم بار. وكىنىشكە قاراي، ءومىر كورسەتىپ وتىرعانداي، تەك بيۋدجەت قاراجاتى عانا ەمەس، ازاماتتاردان قايىرىمدىلىق رەتىندە جينالعان قاراجات تا ماقساتسىز جۇمسالىپ جاتىر. بۇل كەيس - سونىڭ ايقىن مىسالى. بۇل - جالعىز وقيعا ەمەس، باسقا دا مىسالدار بار. ءبىراق، بۇل ءىستى ەڭ رەزونانستى دەۋگە بولادى، - دەپ جاۋاپ بەردى ولجاس بەكتەنوۆ.

ۇكىمەت باسشىسى قارجى مەحانيزمدەرىن زاڭنامالىق تۇرعىدان قايتا قاراۋ قاجەتتىگىن اتاپ ءوتتى.

- قاراجاتتىڭ جۇمسالۋى تۋرالى ەسەپ باقىلاۋدا ءارى اشىق بولۋى كەرەك. سوندىقتان بۇل جەردە، مەنىڭشە، ۇكىمەت تاراپىنان دا، قۇقىق قورعاۋ ورگاندارىنىڭ نەگىزىندە دە، ۇرلىقتىڭ ناقتى قالاي جۇزەگە اسقانىن انىقتاۋ كەرەك. بۇل - ءتيىستى زاڭنامالىق تۇزەتۋلەردى قابىلداۋعا مۇمكىندىك. بولاشاقتا وسى سەكىلدى قۇقىقبۇزۋشىلىقتاردىڭ الدىن الۋعا باعىتتالادى، - دەيدى ول.

ايتا كەتەيىك، بۇگىنگى سوت وتىرىسىندا «اسار- ۇمە» قورىنىڭ پرەزيدەنتى پەريزات قايراتقا 200 ميلليون تەڭگە اۋدارعانىن ايتتى. پەريزات قايرات قاراجاتقا گازا سەكتورى تۇرعىندارىنا قاجەتتى تاۋاردىڭ ساتىپ الىنعانى جونىندە ەسەپ بەرۋى ءتيىس بولعان. الايدا، قور پرەزيدەنتىنىڭ ايتۋىنشا، ۋادە ەتىلگەن ەسەپ بەرىلمەگەن.

كەشەگى سوت وتىرىسىندا بەلگىلى بولعانداي، Biz birgemiz قورىنىڭ قۇرىلتايشىلارى قوردى قۇرۋ تۋرالى حاتتاماعا قول قويماعان.

سونداي-اق مەملەكەتتىك ايىپتاۋشى پەريزات قايرات پەن ونىڭ اناسىنا تاعىلعان ايىپتاردى تىزبەكتەپ شىقتى.