ۇكىمەت اقتوبەدە سالىناتىن ەرەكشە بالالار بالاباقشاسىن كورسەتتى
استانا. KAZINFORM - مەملەكەت باسشىسىنىڭ تاپسىرماسى بويىنشا «زاڭسىز يەمدەنىلگەن اكتيۆتەردى مەملەكەتكە قايتارۋ تۋرالى» زاڭ شەڭبەرىندە قايتارىلعان قاراجات ەسەبىنەن الەۋمەتتىك نىسانداردىڭ قۇرىلىسىن قارجىلاندىرۋ جالعاسۋدا.
بۇل تۋرالى ۇكىمەتتىڭ باسپا ءسوز قىزمەتى حابارلايدى.
ۇكىمەت اقتوبە قالاسىندا ەرەكشە بالالارعا ارنالعان ارنايى بالاباقشا سالۋعا شامامەن 7,8 ميلليارد تەڭگە ءبولۋ تۋرالى شەشىم قابىلدادى. بالاباقشانىڭ اشىلۋى 300 ەرەكشە بالانى تاربيەمەن جانە تۇزەتۋ كومەگىمەن قامتاماسىز ەتەدى.
مەكەمە مەكتەپ جاسىنا دەيىنگى بالالارعا جايلى بولۋ، دامىتۋ جانە وقىتۋ ءۇشىن بارلىق قاجەتتى زاتتارمەن جابدىقتالادى. بۇگىنگى تاڭدا وبلىستا ەرەكشە ءبىلىم بەرۋدى قاجەت ەتەتىن 3 جاستان 6 جاسقا دەيىنگى 2523 تەن استام بالا بار، ولاردىڭ 1320 ى مەكتەپكە دەيىنگى بىلىممەن قامتىلعان. ءقازىر وبلىس بويىنشا 4 ارنايى تۇزەتۋ بالاباقشاسى جۇمىس ىستەيدى. جوبانى ىسكە اسىرۋ قاجەتتى ينفراقۇرىلىمدى قۇرۋعا جانە ەرەكشە قاجەتتىلىكتەرى بار بالالاردى دامىتۋ مەن تاربيەلەۋدى قامتۋدى كەڭەيتۋگە مۇمكىندىك بەرەدى.
بۇعان دەيىن اقمولا وبلىسىنىڭ زەرەندى اۋىلىندا سپورت كەشەنىن، تۇركىستان وبلىسىنىڭ تەمىرلان اۋىلىندا مۋزىكا مەكتەبىن، ارقالىق قالاسىندا دارىندى سپورتشى بالالارعا ارنالعان سپورت كەشەنىن، استانادا تىرەك-قيمىل اپپاراتى بۇزىلعان بالالارعا ارنالعان وڭالتۋ ورتالىعىن، الماتىدا ەرەكشە قاجەتتىلىكتەرى بار ادامدارعا ارنالعان جاتتىعۋ ورتالىعىن سالۋ جونىندەگى جوبالاردى قارجىلاندىرۋ تۋرالى شەشىم قابىلدانعان بولاتىن.
