ۇكىمەت الەۋمەتتىك ماڭىزدى تاۋارلار باعاسىن تەجەۋ شارالارىن قابىلدايدى

استانا. KAZINFORM - ۇكىمەت الەۋمەتتىك ماڭىزدى تاۋارلار باعاسىن تەجەۋ شارالارىن قابىلدايدى. بۇل تۋرالى ۇكىمەتتە ءوتىپ جاتقان بريفينگتە پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى نۇرلان بايبازاروۆ ايتتى.

- تۇتىنۋ تاۋارلارى باعاسىنىڭ تۇراقتىلىعىن ساقتاۋ ماڭىزدىلىعىن جەتە تۇسىنەمىز جانە ۇلتتىق بانكپەن، جەرگىلىكتى اتقارۋشى ورگاندارمەن بىرلەسىپ، ينفلياتسيانى تەجەۋ جونىندەگى شارالار كەشەنىن ىسكە اسىرۋدى، ونىڭ ىشىندە ىشكى نارىقتى تاۋارلارمەن تولىقتىرۋ، باسەكەلەستىكتى قورعاۋ، سىرتقى ساۋدا مەن تاريفتەردى رەتتەۋدى جالعاستىرامىز. وسىنداي ارەكەتتەردىڭ ارقاسىندا قازاقستاندا 2023-جىلى جىلدىق ينفلياتسيا 20 پايىزدان 9,8 پايىزعا دەيىن تومەندەگەن بولاتىن. 2024-جىلدىڭ 11 ايىنىڭ قورىتىندىسىندا 8,4 پايىزدى قۇرادى، - دەدى ول.

ۆيتسە-پرەمەردىڭ ايتۋىنشا، ۇكىمەت جاعدايدى قاداعالاپ وتىر جانە الەۋمەتتىك ماڭىزدى تاۋارلارعا قاتىستى ەكونوميكاداعى باعالاردى تەجەۋگە باعىتتالعان شارالار قابىلدايدى.

- الەۋمەتتىك ماڭىزى بار ازىق-تۇلىك تاۋارلارىنىڭ باعاسىن ۇستاپ تۇرۋ ءۇشىن جاڭا ەگىننىڭ قورى پايدالانىلادى. قىسقى جانە كوكتەمگى ماۋسىمارالىقتا ازىق-تۇلىكتىڭ ايتارلىقتاي قورى قالىپتاستى. تۇراقتاندىرۋ قورلارى، ساۋدا نىساندارى مەن اۋىل شاۋراشىلىعى تاۋارلارىن وندىرۋشىلەرىنىڭ قويمالارىندا 820 مىڭ توننادان استام نەگىزگى ازىق-تۇلىكتىڭ 29 ءتۇرى بار. بۇل قورلار ساقتاۋ مەرزىمىن ەسكەرە وتىرىپ، جۇيەلى تۇردە تولىقتىرىلادى جانە ەلدىڭ بىرنەشە ايلىق قاجەتتىلىگىن وتەۋگە قابىلەتتى، - دەدى نۇرلان بايبازاروۆ.

اۆتور مارلان جيەمباي