ۇكىمەت الەۋمەتتىك ماسىلدىقپەن كۇرەستى جالعاستىرادى

استانا. KAZINFORM - پرەمەر- مينيستر ولجاس بەكتەنوۆ ەڭبەككە قابىلەتتى ءاربىر ازامات جۇمىس ىستەپ، مەملەكەتكە ماسىل بولماۋى كەرەكتىگىن ەسكە سالدى.

- الەۋمەتتىك ماسىلدىق پەن الەۋمەتتىك الاياقتىق فاكتىلەرى بار. قازىر بۇل تۇتاس ءبىر يندۋسترياعا اينالعان. ينتەرنەتتى قاراساڭىز، «مىناداي جاعداي بويىنشا مەملەكەتتەن ەڭ جوعارى جاردەماقى الىپ بەرۋگە كومەكتەسەمىن» دەگەن جارنامالار ءجۇر، - دەدى ولجاس بەكتەنوۆ ۇكىمەت ۇيىندە ءوتىپ جاتقان باسپا ءسوز ءماسليحاتىندا.

وسى ورايدا پرەمەر- مينيستر قازىر ءاربىر جاعداي جەكە قارالىپ جاتقانىن ايتىپ، ءجونسىز الەۋمەتتىك كومەككە توسقاۋىل قويىلاتىنىن جەتكىزدى.

- الەۋمەتتىك كومەك تەك ءوز- ءوزىن قامتاماسىز ەتە المايتىن ازاماتتارعا كورسەتىلۋى كەرەك، بۇل باستى قاعيدا. ەگەر ادام ەڭبەككە قابىلەتتى بولسا، ول جۇمىس ىستەۋى كەرەك. ءبىز نارىقتىق ەكونوميكادا ءومىر ءسۇرىپ جاتىرمىز، حالىققا اشىق ايتىپ، وسى ساياساتتى العا جىلجىتۋىمىز قاجەت، - دەپ ءتۇسىندىردى ۇكىمەت باسشىسى.

بۇعان دەيىن ۇكىمەت باسشىسى ولجاس بەكتەنوۆ اكىمدەر مەن مينيسترلەردى نەگە اشىق سىنعا المايدى دەگەن ساۋالعا جاۋاپ بەردى.

ايتا كەتسەك، بۇگىن ۇكىمەت وتىرىسىندا ولجاس بەكتەنوۆ ونەركاسىپ جانە قۇرىلىس ءمينيسترى ەرسايىن ناعاسپايەۆتى سىنعا الىپ، تاپسىرما بەردى.