كيم چەن ىننىڭ رەسەيگە 6 كۇندىك ساپارى اياقتالدى
سولتۇستىك كورەيا باسشىسى كيم چەن ىن جەكسەنبى كۇنى رەسەيدەگى 6 كۇندىك ساپارىن اياقتاپ، ءوزىنىڭ بروندالعان پويىزىمەن ۇيىنە قايتتى، دەپ حابارلايدى قازاقپارات Yonhap اگەنتتىگىنە سىلتەمە جاساپ.
رەسەيلىك ب ا ق- تىڭ مالىمەتىنشە، كيم چەن ىن مىنگەن پويىز رەسەيدىڭ الىس شىعىسىنداعى ارتەم قالاسىنان جولعا اتتانعان. پويىزدى ءبىرقاتار رەسەيلىك شەنەۋنىك شىعارىپ سالدى، دەپ جازدى ريا نوۆوستي.
ك. ىن قوشتاساردا قول بۇلعاپ، قۇرمەتىن ءبىلدىردى.
ەسكە سالايىق، كحدر كوشباسشىسى رەسەي پرەزيدەنتى ۆلاديمير پۋتيننىڭ شاقىرۋىمەن رەسەيگە بارعان بولاتىن. ەكى ەل اراسىندا اسكەري سەرىكتەستىك ورناۋى مۇمكىن دەگەن الاڭداۋ ۇدەپ تۇرعان ساتتە، ولار سارسەنبى كۇنى «ۆوستوچنىي» عارىش ايلاعىندا سامميت وتكىزدى. پۋتين رەسەيدىڭ امۋر وبلىسىنداعى عارىش ورتالىعىندا جوعارى دارەجەدە وتكەن كەلىسسوزدەن كەيىن جەرگىلىكتى جاڭالىقتار ارناسىنا ك ح د ر- مەن اسكەري-تەحنيكالىق بايلانىس ورناۋى مۇمكىن ەكەنىن ايتتى. سونىمەن قاتار ول كيم چەن ىن رەسەيدىڭ راكەتالىق تەحنولوگيالارىنا اسا قىزىعۋشىلىق تانىتقانىن ءمالىم ەتىپ، ك ح د ر- گە دەربەس سپۋتنيگىن قۇراستىرۋعا كومەكتەسۋگە ۋادە بەردى.
ك ح د ر مامىر، تامىز ايلارىندا وربيتاعا اسكەري تىڭشى-سپۋتنيكتى ۇشىرۋعا تالپىندى، ءبىراق ەكەۋى دە ءساتسىز اياقتالدى. ال ءۇشىنشى تىڭشى- سپۋتنيكتى قازاندا ۇشىرۋعا بەل بۋىپ وتىر.
ايتا كەتەيىك، بۇل - كيم چەن ىننىڭ بيلىككە كەلگەلى شەت مەملەكەتكە جاساعان ەڭ ۇزاق ساپارى. جولعا كەتكەن ۋاقىتتى ەسەپتەسەك، سولتۇستىك كورەيا كوشباسشىسى رەسەيدە 8 كۇن بولعان.
