كىشكەنتاي قارابۇلاقتىڭ حيكاياسى
استانا. قازاقپارات - باياعىدا ءبىر كىشكەنتاي عانا قارابۇلاق وزىنە شاق جىلعا تاۋىپ، تۇمادان ۇزاپ شىعىپتى دا، جازىقپەن ەكپىندەي اعا جونەلىپتى. بار ماقساتى - ۇشى-قيىرى جوق دارياعا بارىپ قوسىلۋ ەكەن. اۋەلى ارىنداي شاۋىپ، تىلەگەن تەڭىزىنە كوپ ۇزاماي-اق قوسىلاتىن كۇيدە شابىتتانا جوڭكىلىپتى.
ازدان سوڭ ەكپىنى ازايىپ، ءوزى تارتىلا باستاپتى. تۇنىق سۋىنا ءار تۇستان باس قويىپ، سوراپتاي تارتقان اڭ-قۇس پەن جاندىك تە جىڭىشكەرە تۇسۋىنە سەبەپ بولىپتى.
تاۋلى-قىراتتى ولكەگە كەز كەلىپ، ارناسى ءتىپتى تارىلا بەرىپتى. سوندا دا العان بەتىنەن قايتپاي سوڭعى ءالىن جيىپ، ءبىر بيىك اسۋعا شىعىپتى دا، قۋانعانىنان ءوزىن ءبىر ساتكە قاسقابۇلاق سەزىنىپ، الاقايلاپ تومەن قاراي قۇلديلاي جونەلىپتى. ءبىراق كوپ ۇزاماي قۋانىشى سۋ سەپكەندەي باسىلىپتى.
ويتكەنى الدىنان شەتسىز-شەكسىز، ۇستىنەن ۇشقان قۇستىڭ قاناتى تالاتىن، كوكجيەگىن ساعىم جاسىرعان ءشول دالا شىعىپتى. قايناپ تۇرعان توسىنە جەتى كوكتىڭ سۋى توگىلسە دە، قۇمىنىڭ ءبىر ءتۇيىرىن دىمداي المايتىن قورقىنىشتى الاپقا شوشىنا قاراعان كىشكەنتاي بۇلاق بويىنداعى سوڭعى تامشىلارىن جيناپ تەجەلە قالىپتى.
«قايناردان كەتىپ نەڭ بار ەدى، ەندى، مىنە، قۇردىمعا كەتپەكسىڭ!» دەگەن ويدى قۋىپ تاستاپ، اۋەلگى ماقساتىنان اينىماعان كۇيى تاۋەكەل ەتىپ، دەمى وت شاشقان قۇمعا قويىپ كەتىپتى. سول ساتتە ناعىز عاجايىپتىڭ ءوزى تۋىپتى. قۇممەن جاناسپاي جاتىپ بۇلاقتىڭ سۋى بۋلانىپ ۇلگەرىپتى دە، ءاپ-ساتتە كوككە كوتەرىلىپ، ءبىر شاربى بۇلتقا قوسىلىپتى. جەل ايداعان الگى شاربى بۇلت بۋعا اينالعان بۇلاقتى وزىنەن بيىكتەگى اقشا بۇلتقا جەتكىزىپتى.
اقشا بۇلت ەش قيىندىقسىز ءشول دالانىڭ ۇستىمەن قالقىپ ءوتىپتى دە، ۇشى-قيىرى جوق ءبىر مۇحيتتىڭ جاعاسىنا ءىلىنىپ، الىپ ءزىلماۋىر بۇلتقا قوسىلىپتى. ءزىلماۋىر بۇلت ابدەن ۇلعايعان كەزدە ىلعالىن ىشىنە تارتىپ، سۇرلانىپ بارىپ بۇلاقتى قايتا سۋعا اينالدىرىپتى دا، مۇحيتقا توگىپ جىبەرىپتى.
ماقساتى ايقىن، جىگەرى كۇشتى، تاۋەكەلى زور ادام ءوزى كۇتپەگەن جەردەن جاقسىلىق كورەدى. جىل قۇتتى بولسىن! جاقسىلىعى مول بولسىن! كىشكەنتاي قارابۇلاق قۇساعان قازاقستانىمىز قىرقىنان امان شىعىپ، بۋىنى بەكىپ، بويى تۇزەلىپ، قارىشتاي ادىمدايتىن كۇندى كورۋ بارشامىزعا بۇيىرسىن! التى الاشتى اللا تاعالا جارىلقاپ، ەل-جۇرتىمىز «كۇن سونگەنشە سونبەسىن!»
عالىم بوقاش
