كەيدە 10-15 ساعاتتاپ دايىندالدىم - شەتەلدىك 8 ۋنيۆەرسيتەتتىڭ گرانتىن جەڭىپ العان وقۋشى
قونايەۆ. KAZINFORM - الماتى وبلىسىنداعى №39 گيمنازيانىڭ 11-سىنىپ وقۋشىسى المات ساقيدۋللا شەتەلدىك وقۋ ورىندارىنان شاقىرتۋ الدى.
جاس تۇلەككە University of Miami, Elmhurst, Caldwell, Augustana, UNO، FIU سىندى ا ق ش- تىڭ بەدەلدى 7 ۋنيۆەرسيتەتىنەن شاقىرتۋ كەلسە، ونىڭ 6 ۋى گرانت ۇسىنعان. سونداي-اق مالايزياداعى Xiamen University Malaysia وقۋ ورداسى ونى تولىق گرانتپەن قابىلداعان.
Kazinform ءتىلشىسى باعى دا جانىپ، بابى دا شاپقان بولاشاق ستۋدەنتپەن تىلدەستى.
ونىڭ ايتۋىنشا، شەتەلدىك وقۋ ورىندارىنا ءتۇسۋدى بالا كەزدەن ارمانداعان جانە سول ءۇشىن كوپ جىلدار بويى ەڭبەك ەتكەن.
- مەن بورالدايدا تۇرامىن، جاسىم - 17 دە. وتباسىمدا بەسەۋمىز. ەڭ ۇزدىك وقۋ ورىندارىندا ءبىلىم الۋ مەنىڭ بالا كەزدەن ارمانىم بولعان. اكەم ەكەۋمىز، اسىرەسە ا ق ش-تا وقىپ كورۋدى ارماندادىق. كەيىن ارمان ماقساتقا اينالدى، - دەدى ول.
المات ارمانىنا جەتكىزەتىن العاشقى قادام رەتىندە 6-سىنىپتا نازاربايەۆ زياكەرلىك مەكتەبىنە تاپسىرعان. الايدا مەكتەپكە تۇسە الماعان. ودان كەيىن 9-سىنىپتا ا ق ش پەن قازاقستان اراسىندا وقۋشى الماسۋعا مۇمكىندىك بەرەتىن Flex باعدارلاماسىنا تاپسىرىپ، ونىڭ فينالدىق كەزەڭىنە دەيىن وتكەن. ءبىراق بۇل جولى دا سوڭعى ساتتە سۇرىنگەن. دەسە دە، ول ساتسىزدىكتەرگە مويىماي، ەڭبەكتەنە بەرگەن.
- ەشتەڭەگە قاراماي، ماقساتىما جەتەمىن دەپ شەشتىم. 11- سىنىپتا ا ق ش پەن مالايزيانىڭ باكالاۆر دەڭگەيىنە تاپسىرۋعا بەل بۋدىم. 6-سىنىپتان باستاپ پورتفوليو جيناي باستادىم. وعان ۆولونتەرلىك قىزمەت، ءارتۇرلى جارىستارداعى جەڭىستەر، جەتىستىكتەرىمدى قوسىپ وتىردىم. 10-سىنىپتا 10-15 ساعاتتاپ دايىندالىپ، IELTS تاپسىردىم جانە 7.0 ۇپاي الدىم. ودان كەيىن حالىقارالىق ۇ ب ت دەۋگە كەلەتىن SAT تەستىن 3 رەت تاپسىرىپ، سوڭعىسىنان 1420 بالل الدىم. سوسىن جەلتوقسان ايىنان باستاپ وقۋ ورىندارىنا ەسسە جىبەردىم، - دەدى ول.
الماتتىڭ بۇل ەڭبەگى ەش كەتپەگەن. ول وسى جىلدىڭ قاڭتارىنان باستاپ شەتەلدىك ۋنيۆەرسيتتەردەن شاقىرتۋ الدى. قازىرگى ۋاقىتتا ول ا ق ش پەن مالايزيادان كەلگەن شاقىرتۋدان بولەك، نازاربايەۆ ۋنيۆەرسيتەتىنىڭ جاۋابىن كۇتىپ وتىر.
- بولاشاعىم تۋرالى ءالى ناقتى شەشىم قابىلدامادىم. ا ق ش- تا شەتەلدىك ستۋدەنتتەردىڭ وقۋىن توقتاتۋ سەكىلدى دەرەكتەر بولىپ جاتىر. سوندىقتان قازىر وي ۇستىندە ءجۇرمىن. مالايزياعا بارۋىم دا مۇمكىن. قايدا بارسام دا، IT سالاسىن تاڭدايمىن، - دەدى تۇلەك.
ول مۇنداي مۇمكىندىكتەرگە يە بولۋىنىڭ سىرى - ەڭبەك پەن شىنايى ماقساتتا ەكەنىن اتاپ ءوتتى.
دوسبول اتاجان
