كەيبىرەۋلەردىڭ قۇلاعى ەستىمەيدى: بوزىمبايەۆ تاسقىندا كومەكتەسپەگەن وليگارحتار جايلى

Канат Бозумбаев
Фото: Солтан Жексенбеков / Kazinform

استانا. قازاقپارات – ۇكىمەت باسشىسىنىڭ ورىنباسارى قانات بوزىمبايەۆ سۋ تاسقىنى كەزىندە كومەكتەسكەن جانە ءۇنسىز قالعان وليگارحتار جايلى پىكىرىن ءبىلدىردى، دەپ حابارلايدى Ulysmedia.kz.

- پرەزيدەنت سۋ تاسقىنى كەزىندە كومەكتەسكەن كاسىپكەر جايلى ءسوز قوزعاعاندا كومەكتەسكەندەرگە العىس ايتىپ، قالىس قالعاندار كىم ەكەنىن جاقسى بىلەمىز دەدى. بۇل ءسوزى نەنى بىلدىرەدى؟ قالىس قالعان كاسىپكەرلەر مەملەكەتتەن الىپ كەلگەن كومەك، قولداۋلارىنان قاعىلا ما؟ ال كومەكتەسكەندەر قانداي دا ءبىر مىندەتتەمەلەردەن بوساتىلىپ، قوسىمشا جەڭىلدىكتەرگە يە بولۋى مۇمكىن بە؟ - دەپ سۇرادى Ulysmedia.kz ءتىلشىسى قانات بوزىمبايەۆتان.

بۇل سۇراققا جاۋاپ بەرگەن قانات بوزىمبايەۆ كومەكتەسكەن كاسىپكەرلەرگە وتكەن اپتادا پرەزيدەنت العىسىن بىلدىرگەنىن ايتتى.

- ولاردىڭ فاميليالارى مىنا جەردە بار. ۇلكەن دارەجەدە پرەزيدەنتتىڭ العىسى بولدى. مەنىڭ ويىمشا، بۇل كىسىلەر، دەمەۋشىلەر قاراجاتتى ماراپات ءۇشىن بەرىپ وتىرعان جوق. تەك ءبىزدىڭ حالقىمىزدى اياپ، «قانداي كومەك كورسەتە الامىز» دەپ، تازا ويمەن وسى قاراجاتتى ءبولىپ وتىر. مەن بۇل كىسىلەردىڭ بارىمەن 100 پايىز بايلانىستامىن. وزدەرى كەلىپ، قاي وڭىردە قانشا پاتەر ساتىپ الامىز دەپ قاداعالاپ ءجۇر. «ساپاسى قانداي بولادى، قانداي ۇيلەدى سالامىز» دەپ ءجۇر. بۇل كىسىلەردى تەك ماقتاۋ كەرەك، - دەيدى ول.

قانات بوزىمبايەۆ قالىس قالعاندار وزدەرى ءبىلسىن دەيدى.

- بىزگە كومەكتەسە مە، كومەكتەسپەي مە… حالىق ۇنىنە قۇلاق اساتىن مەملەكەت. كەيبىرەۋلەردىڭ قۇلاعى ەستيدى، كەيبىرەۋلەرىننىڭ قۇلاعى ەستىمەيدى، - دەيدى ول.

بوزىمبايەۆ كومەكتەسكەن كاسىپكەرلەرگە ەشقانداي ارتىقشىلىق بەرىلمەيتىنىن، ولار «اسارعا» ارالاسقانىن ايتادى. سونىمەن بىرگە، بوزىمبايەۆ كوپ قاراجات بولگەن كاسىپكەرلەر قاراجاتىن قاداعالاپ وتىرعانىن ايتادى.

ەسكە سالا كەتەيىك، بيىل بىرنەشە ءوڭىردى سۋ تاسىپ، ونداعان اۋداندا توتەنشە جاعداي جاريالاندى. سۋ تاسقىنى ەڭ ۇلكەن قاۋىپ تۋعىزىپ وتىرعان وڭىرلەر قاتارىندا اتىراۋ، باتىس قازاقستان، سولتۇستىك قازاقستان، قوستاناي وبلىستارى بار. رەسەيدىڭ ور قالاسىندا دامبىنىڭ جارىلۋى قوسىمشا قيىندىق تۋعىزعان. قۇلسارى قالاسىندا ەڭ كۇردەلى جاعداي تىركەلىپ، ادام شىعىنى تىركەلدى.

سوڭعى جاڭالىقتار