كەيبىر مەكتەپتىڭ سمارتفونعا شەكتەۋ قويۋ شەشىمى عىلىمي نەگىزدەلگەن قادام - ايماعامبەتوۆ

استانا. KAZINFORM - ءماجىلىس دەپۋتاتى اسحات ايماعامبەتوۆ ءبىلىم بەرۋ وشاقتارىندا گادجەت قولدانۋعا تىيىم سالۋ يدەياسىن قولدايدى.

— اندجەلا داكۆورتتىڭ ويلارى ۇنادى. بۇل ۆيدەودا ول تابىس پەن تيىمدىلىكتىڭ سىرى — تەمىردەي ەرىك-جىگەردە ەمەس، الاڭداتاتىن فاكتورلاردان ارىلعان دۇرىس ورتادا ەكەنىن ايتادى. دەمەك، ءوزىڭدى ۇنەمى باقىلاپ، تىيۋدىڭ ورنىنا، سول جاعدايدىڭ الدىن الىپ، الاڭداتاتىن فاكتورلاردان الىس بولۋ الدەقايدا ءتيىمدى. مىسالى، گادجەت - قازىر ەڭ باستى نازار بۇزۋشى قۇرالداردىڭ ءبىرى. داكۆورت كەلتىرگەن زەرتتەۋگە سۇيەنسەك، ءتىپتى ءوشىرۋلى بولعانىمەن، قول استىندا جاتقان تەلەفوننىڭ ءوزى IQ تەست ناتيجەسىنە كەرى اسەر ەتەدى. ال تەلەفونى كوزدەن تاسا جەردە جاتقان ستۋدەنتتەردىڭ ۇلگەرىمى الدەقايدا جوعارى، — دەپ جازدى اسحات ايماعامبەتوۆ Telegram پاراقشاسىندا.

حالىق قالاۋلىسىنا The Anxious Generation كىتابىن وقىعاننان كەيىن، مەكتەپ جاسىنداعى بالالارعا سمارتفوننىڭ اسەرى مەن تىيىم سالۋ تۋرالى وي كەلگەن.

— وسى تۇرعىدا نازاربايەۆ زياتكەرلىك مەكتەپتەرى مەن كەيبىر مەكتەپتىڭ جاڭا وقۋ جىلىنان باستاپ سمارتفون قولدانۋعا شەكتەۋ قويۋ تۋرالى شەشىمى - ورىندى ءارى عىلىمي دالەلدەرگە نەگىزدەلگەن قادام. زەرتتەۋلەر مۇنداي شەشىمنىڭ قاجەتتىلىگىن ناقتى كورسەتىپ وتىر، — دەيدى دەپۋتات.

ايتا كەتەيىك، اسحات ايماعامبەتوۆ وسكەلەڭ ۇرپاقتى ءىلىم-بىلىمگە باۋلۋ ماسەلەسىن ۇنەمى كوتەرىپ كەلەدى. دەپۋتات ءماجىلىستىڭ جالپى وتىرىسىندا «سمارتفون كىتاپتان ارزان بولماۋى كەرەك» دەگەن ەدى.