كيبەرشاۋبىل يراننىڭ ءىرى بانكتەرىنىڭ ءبىرىنىڭ جۇمىسىنا نۇقسان كەلتىردى
استانا. KAZINFORM - يراننىڭ جەتەكشى مەملەكەتتىك بانكتەرىنىڭ بىرىنە اۋقىمدى كيبەرشابۋىل جاسالدى. سونىڭ سالدارىنان كليەنتتەرگە قىزمەت كورسەتۋ جۇمىسى اقساپ، بانك جۇيەسىنە كىرۋ مۇمكىن بولماي قالدى، دەپ حابارلايدى Kazinform مەنشىكتى ءتىلشىسى.
سەيسەنبى كۇنى Sepah بانكىنىڭ ونلاين-سەرۆيستەرى ءوشىپ، بانك مالىمەتتەرىنە قول جەتكىزۋ مۇمكىن بولماي قالدى. تەگەران مەن وزگە دە ءبىرقاتار قالاداعى بانك بولىمشەلەرى جابىلدى.
ازاماتتار وزدەرىنىڭ قارجىلارىنا قول جەتكىزە الماي وتىرعاندارىن ايتتى، ال يراننىڭ اسكەري تۇلعالارىمەن بايلانىستى Kosar مەن Ansar بانكتەرى مۇلدەم جۇمىس ىستەمەي قالعان.
بۇل ءۇشىن جاۋاپكەرشىلىكتى وسىعان دەيىن يران ينفراقۇرىلىمى مەن بولات وڭدەۋ كاسىپورنى، جانارماي قۇيۋ ستانسالارىنا قارسى وپەراتسيا جۇرگىزگەندەرى تۋرالى مالىمدەگەن Predatory Sparrow حاكەرلىك توبى ءوز موينىنا الدى.
الەۋمەتتىك جەلىگە جاريالاعان مالىمدەمەلەرىندە حاكەرلىك توپ وكىلدەرى Sepah بانكىنىڭ مالىمەتتەرىن تولىق جويعانىن جەتكىزگەن. ولاردىڭ ايتۋىنشا، شابۋىلعا بانكتەردىڭ حالىقارالىق سانكسيالاردان جالتارىپ، اسكەري باعدارلامالاردى قارجىلاندىرۋى سەبەپ بولعان.يران بيلىگى بۇل وقيعاعا ازىرگە رەسمي تۇردە پىكىر بىلدىرگەن جوق.
كۋاگەرلەردىڭ مالىمدەۋىنشە، بانك وپەراتسيالارىمەن بايلانىستى پروبلەما كۇنى بويى بولعان. ال بانك وكىلدەرى بولسا جۇمىستىڭ الداعى ساعاتتاردا قايتا جانداناتىنىن ايتقان.
Sepah - يراننىڭ كونە قارجى مەكەمەلەرىنىڭ ءبىرى. ونىڭ يران بويىنشا 1800 بولىمشەدەن تۇراتىن جەلىسى بار. سونداي-اق ونىڭ ۇلى بريتانيا، فرانسيا، گەرمانيا مەن يتاليادا وكىلدىكتەرى بار. ال ا ق ش اتالعان بانككە 2019 -جىلى، ياعني يران يادرولىق كەلىسىمنەن شىققان سوڭ سانكتسيا ەنگىزگەن.
كەيبىر ب ا ق وكىلدەرى Sepah بانكىن يسلام ريەۆوليۋتسياسى ساقشىلار كورپۋسى مەن يراننىڭ قارۋلى كۇشتەرىمەن بايلانىستىرادى.
