ەكىباستۇزدا جىلقىشى ءوزى باعىپ جۇرگەن مالدى ۇرلاپ، بازارعا وتكىزىپ جىبەرگەن

پاۆلودار. KAZINFORM - پوليتسيا مال ۇرلىعى دەرەگى بويىنشا قىلمىستىق ءىس قوزعاپ، تەرگەۋ جۇرگىزىلۋدە.

ەكىباستۇزدا جەكەنىڭ جىلقىسىن جايىلىمنان ۇرلادى دەگەن كۇدىككە ىلىنگەن جىلقىشى ۇستالدى. ول بارىمتالاپ العان ءۇي جانۋارىن بازارعا اپارىپ ساتىپ جىبەرگەن. ارام جولمەن تاپقان اقشاسىن جەكە ماقساتىنا جۇمساپ تا ۇلگەرگەن.

- مال ۇرلىعى دەرەگى بويىنشا قىلمىستىق ءىس قوزعالدى، تەرگەۋ جۇرگىزىلىپ جاتىر. پوليتسيا اۋىل تۇرعىندارىن ءوز مالدارىن قاراۋسىز قالدىرماۋعا، اۋىل شارۋاشىلىعى جانۋارلارىن مۇمكىندىگىنشە سايكەستەندىرۋگە (چيپتەۋ، تاڭبالاۋ جانە بيركىلەۋ)، مۇمكىندىگىنشە مالعا GPS- ترەكەر ورناتۋعا شاقىرادى، - دەپ حابارلادى وڭىرلىك پوليتسيا دەپارتامەنتىنەن.

پوليتسيا بۇعان قوسا قازىرگى ۋاقىتتا «مال ۇرلاۋشى» رەسپۋبليكالىق جەدەل-پروفيلاكتيكالىق ءىس-شاراسى وتكىزىلىپ جاتقانىن جەتكىزدى. ءتارتىپ ساقشىلارى 400 دەن استام اۆتوكولىكتى، ەت ساتاتىن 219 ورىندى جانە 510 شارۋا قوجالىعىن تەكسەرىپ شىققان. ناتيجەسىندە ءتيىستى قۇجاتتارسىز مال مەن ەت ونىمدەرىن تاسىمالداۋدىڭ 23 دەرەگى جانە ىلەسپە قۇجاتتارسىز ەت ونىمدەرىن وتكىزۋدىڭ 6 دەرەگى تىركەلگەن. بارلىق قۇقىق بۇزۋشىلار اكىمشىلىك جاۋاپكەرشىلىككە تارتىلعان. مالى يەسىز جۇرگەن 52 تۇرعىنعا ايىپپۇل سالىنىپ، 800 گە جۋىق باس مال مامانداندىرىلعان مال قورالارىنا قامالدى.

ەسكە سالا كەتەيىك، الماتى وبلىسىندا 20 ميلليون تەڭگەنىڭ مالىن ۇرلاعان بارىمتاشىلار ۇستالدى.

اۆتور

مۇرات اياعان