ەكىباستۇزدا فەرروقورىتپا، بولات جانە تەمىر ءوندىرۋ زاۋىتتارى سالىنادى

استانا. KAZINFORM - ەكىباستۇزدا فەرروقورىتپا، بولات جانە تەمىر ءوندىرۋ زاۋىتتارى سالىنادى. بۇل تۋرالى ۇكىمەت وتىرىسىندا ونەركاسىپ جانە قۇرىلىس ءمينيسترى قانات شارلاپايەۆ ايتتى.

«ەكىباستۇزدى دامىتۋ 3 ءىرى باعىتقا جۇرگىزىلەدى. ولار - ەنەرگەتيكا، مەتاللۋرگيا جانە تەمىر جول ونىمدەرىن ءوندىرۋ كلاستەرلەرى. ەنەرگەتيكا سالاسىن دامىتۋ - ەكىباستۇز گرەس- تەرىنىڭ قۋاتتىلىعىن ارتتىرۋمەن بايلانىستى. مەتاللۋرگيا سالاسىندا يندۋستريالدى ايماق قۇرۋ تۋرالى شەشىم قابىلدانىپ، سەرىكتەس رەتىندە «Mineral Product» كاسىپورنى تارتىلدى. بۇل جەردە فەرروقورىتپا، بولات جانە تەمىر ءوندىرۋ زاۋىتتارى سالىنادى»، - دەدى مينيستر.

ونىڭ اتاپ وتۋىنشە، اتالعان زاۋىتتاردىڭ قۇرىلىسى كەزىندە 800 جۇمىس ورنى، ال پايدالانۋ كەزەڭىندە 4 مىڭ جۇمىس ورنى اشىلادى. وعان 100 ميلليارد تەڭگەدەن استام ينۆەستيتسيا تارتىلادى. بۇل سالادا ىسكە قوسىلاتىن باسقا دا جوبانىڭ ەسەبىنەن 1200 جۇمىس ورنى قۇرىلادى.

«تەمىر جول كلاستەرىن قۇرۋ اياسىندا «RailCast Systems» كومپانياسىنىڭ «لوكوماتيۆتەرگە ارنالعان بانداجدار ءوندىرىسى» جوباسى باستالدى. 75 ميلليارد تەڭگە ينۆەستيتسيا تارتىلىپ، 700 جۇمىس ورنى اشىلادى»، - دەدى قانات شارلاپايەۆ.

اۆتور

مارلان جيەمباي