ەكىباستۇزدا بالالار جازعى دەمالىسىن ەتنواۋىلداردا وتكىزىپ جاتىر
پاۆلودار. KAZINFORM - كەنشىلەر قالاسىنىڭ مەكتەپتەرىندە 16 كيىز ءۇي تىگىلگەن. وقۋشىلار مۇندا حالقىمىزدىڭ سالت-داستۇرىنەن سۋسىنداپ، ۇلتتىق قولونەردى ۇيرەنەدى.
ەكىباستۇز قالاسى وقۋشىلار ءۇشىن ءداستۇرلى ەتنواۋىل ناقىشىنداعى جازعى دەمالىستى ۇيىمداستىرۋعا ءمان بەرىپ وتىر. مەكتەپتەر جانىندا جانە «قاينار» شىعارماشىلىق ورتالىعىندا جالپى سانى 16 كيىز ءۇي تىگىلىپ، بالالار كۇن سايىن حالقىمىزدىڭ ۇلتتىق سالت-داستۇرىنەن سۋسىندايدى.
مۇندا «باسقۇر توقۋ» جوباسى باستالعان. قولونەر شەبەرلەرى مەكتەپ وقۋشىلارىنا ەجەلگى قازاق قولونەرىنىڭ قىر- سىرىن مەڭگەرۋگە مۇمكىندىك ۇسىنادى. باستامانىڭ اياسىندا كيىز باسۋ ونەرى مەن كيىز ۇيگە ارنالعان ءداستۇرلى ويۋلى باسقۇر توقۋدى ۇيرەنىپ جاتىر. مۇنداي ەرەكشە لاگەرلەر ۇلتتىق رۋحتى جاڭعىرتىپ، جاس ۇرپاققا اتا-بابامىزدىڭ اسىل مۇراسىن، باي سالت- ءداستۇرىن ناسيحاتتاۋدى ماقسات ەتەدى. بالالار ويۋ-ورنەك قيىپ، قازاقتىڭ ۇلتتىق تاعامدارىن دايىنداۋدى ۇيرەنەدى، قولونەر بۇيىمدارىن جاساپ، شەبەرلىگىن شىڭدايدى. كۇن سايىن دومبىرانىڭ كۇمبىرى ەستىلىپ، تەرمە مەن كۇي ارقىلى رۋحاني ازىق الۋعا مۇمكىندىك بەرىلەدى.
- ۇلتتىق ەتنوفەستيۆال جوباسى بويىنشا ءبىزدىڭ جازعى لاگەرلەرىمىزدىڭ جۇمىسى ءارالۋان باعىتتا قۇرىلعان. ماسەلەن، ەر بالالار قامشى ورۋمەن تانىسسا، قىز بالالار ءتۇرلى توقىما ونەرىن مەڭگەرەدى. بارلىق مەكتەپتە بەستەمشە ويىنىنا ءمان بەرىلىپ جاتىر. بەستەمشە - توعىزقۇمالاق سياقتى ماتەماتيكالىق ويىن. بالاباقشادان باستاپ ەنگىزىپ، بالالاردىڭ جىلدام ەسەپتەۋ زەيىنىن ارتتىرۋعا نازار اۋدارۋدامىز. ويىندى كەز كەلگەن جەردە ويناۋعا بولادى. بۇعان قوسا ەلىمىزدىڭ ۇلتتىق ويىندار اكادەمياسىمەن بايلانىسىپ، اسىقتىڭ بەس ءتۇرى بويىنشا اسىق جيىنتىقتارىن الدىرتتىق. وقۋشىلارىمىز دەمالىس كەزىندە بەس كەنەي، بەس اسىق، بايتەرەك جانە ت. ب. اسىق ويىندارىن وينايدى. تاعى ءبىر باعىت - زەرگەرلىك، قىش قۇمىرالار جاساۋ ونەرى. وعان قىزىعۋشىلار سانى دا كوپ ەكەنىن بايقايمىز. كۇن سايىن بالالارىمىز لاگەرلەردە قازاق اندەرى مەن بيلەرى، كۇيلەر، شەشەندىك سوزدەر، باتا بەرۋ بويىنشا سايىستارعا قاتىسادى، - دەيدى ەكىباستۇز قالالىق ءبىلىم بەرۋ ءبولىمىنىڭ باسشىسى لاۋرا ديسيۋپوۆا.
كەنشىلەر قالاسى مەن وعان قاراستى اۋىلداردا 40 مەكتەپ بار، ولاردىڭ بارلىعىندا جازعى لاگەرلەر جۇمىس ىستەپ تۇر. جالپى سانى 22 مىڭعا جۋىق بالا قىزىقتى دەمالىسپەن قامتىلعان. پەداگوگتار ءتارتىبى قيىن، وسال توپتاعى جاسوسپىرىمدەردى دە ۇمىتپاعان. ءار كۇنى كەشكىلىك ەسەپتە تۇرعان 100 دەن استام بالانى ويىن الاڭدارىنا شاقىرىپ، ءتۇرلى سايىستار ۇيىمداستىرادى. قالا بويىنشا 600 بالا ەڭبەك جاساقتارىنا تارتىلسا، 4 مىڭنان استام وقۋشى جەرگىلىكتى كاسىپورىنداردا جاز ايلارىندا ەڭبەك ەتىپ ءجۇر.
ماۋسىمنىڭ سوڭىنا تامان جازعى دەمالىستا جۇرگەن 200 دەن استام ەكىباستۇزدىق جاس ورەندى ەتنوساپار كۇتىپ تۇر. باياناۋىلداعى تورايعىر اۋىلىندا 15 كيىز ۇيدەن تۇراتىن ەتنواۋىل قۇرىلىپ، بالالار سوندا بىرنەشە كۇن تىنىعادى. ۇلتتىق ويىندار، تابيعات اياسىنداعى تانىمدىق سەرۋەندەر مەن شىعارماشىلىق باعىتتاعى ءىس-شارالار بالالار ءۇشىن ەستە قالارلىق ساپار بولماق.
وقۋشىلاردىڭ دەمالىسىن قىزىقتى وتكىزۋ باياناۋىل اۋدانىندا دا بارىنشا ەسكەرىلگەن. 26 مەكتەپتىڭ 23 ىندە جازعى مەكتەپ جانىنداعى الاڭدار جۇمىسىن باستاپ كەتتى. 1-10-سىنىپتاردا وقيتىن 3967 بالا تولىعىمەن قامتىلعان. جازعى دەمالىستى ۇيىمداستىرۋعا بيۋدجەتتەن 22 ميلليون تەڭگەدەن استام قاراجات ءبولىنىپ، باستاۋىش سىنىپتاردىڭ 1230 وقۋشىسى ىستىق تاماقپەن قامتاماسىز ەتىلگەن.
تورايعىر اۋىلىنداعى «بالداۋرەن» ساۋىقتىرۋ لاگەرى دە ەسىگىن ايقارا اشىپ، اۋدانداعى 160 وقۋشى، سونىڭ ىشىندە جوندەۋ ءجۇرىپ جاتقان مەكتەپتەردىڭ وقۋشىلارى، سونداي-اق كوپبالالى، از قامتىلعان وتباسىلاردىڭ، جەتىم جانە قامقورشىسىنان ايىرىلعان بالالار دەمالادى. ال وبلىستىق دەڭگەيدەگى «جاسداۋرەن» وقۋ- ساۋىقتىرۋ لاگەرىندە اۋداننان 80 وقۋشى دەمالادى.
اۋداندىق ءبىلىم بەرۋ ءبولىمىنىڭ ادىسكەرى گۇلدەن حابيبۋللينوۆانىڭ سوزىنشە، بالالار الداعى ۋاقىتتا باياناۋىلدىڭ كيەلى جەرلەرىنە ساپارلايدى. اتاپ ايتقاندا، ءماشھۇر ءجۇسىپ كەسەنەسىنە، ق. ساتبايەۆ پەن س. تورايعىروۆتىڭ مۇراجايلارىنا، جاسىباي باتىر بەيىتىنە، «قوڭىر اۋليە» ۇڭگىرىنە، «كەمپىر تاس» جارتاسىنا تانىمدىق ساياحاتقا شىعادى. ودان بولەك، جاس جەتكىنشىكتەر استانا، الماتى، قاراعاندى، پاۆلودار قالالارىنا، اباي قۇنانباي ۇلىنىڭ 180 جىلدىعىنا وراي جيدەبايعا قىزىقتى ساياحاتقا بارادى دەپ جوسپارلانىپ وتىر.
