ەكىباستۇز بيلىگى توتەنشە جاعداي رەجيمىن نە ءۇشىن جاريالادى

پاۆلودار. KAZINFORM - ەكىباستۇز قالاسىنىڭ اكىمدىگى ەكىباستۇز قالاسىندا وبەكتىلىك اۋقىمداعى تەحنوگەندىك سيپاتتاعى توتەنشە جاعداي رەجيمىنىڭ نە ءۇشىن جاريالانعانىن ءتۇسىندىردى. نەگىزگى سەبەپ - ەكىباستۇز ج ە و-داعى قازاندىق اگرەگاتتارىن جوندەۋگە قوسىمشا قاراجات ءبولۋ.

ەكىباستۇز قالاسىنىڭ بيلىگى Energy Solutions Center ج ش س-دەگى اۆاريالىق جاعدايعا بايلانىستى تەحنوگەندىك سيپاتتاعى توتەنشە جاعداي رەجيمىن جاريالاۋعا شەشىم قابىلداعانى تۋرالى حابارلاعان ەدىك.

اتالعان كاسىپورىن - «سامرۇق- ەنەرگو» ا ق-نىڭ ەنشىلەس كومپانياسى ءارى ەكىباستۇز جىلۋ- ەنەرگيا ورتالىعىن باسقارىپ وتىر. ەكىباستۇز قالاسىنىڭ اكىمدىگى توتەنشە جاعدايدىڭ سەبەبىن ءتۇسىندىردى.

«2023 -جىلى ەكىباستۇز ج ە و-دا نەگىزگى جانە قوسالقى جابدىقتاردى جوندەۋ بويىنشا اۋقىمدى جۇمىستار اتقارىلدى. قولدانىستاعى 10 قازاندىق اگرەگاتىنىڭ 8 ى (№ 6، 7، 8، 11، 12، 13، 14، 15) كۇردەلى جوندەلىپ، 2-قازاندىق اگرەگاتى (№5، 9) جوندەۋدەن ءوتتى. سونىڭ ناتيجەسىندە 2023-2024 -جىلعى جىلىتۋ ماۋسىمى شتاتتىق رەجيمدە ءوتتى. بيىلعى ماۋسىم ايىندا ەكىباستۇز ج ە و «سامۇرىق- ەنەرگو» ا ق-نىڭ ارنايى قۇرىلعان ەنشىلەس كومپانياسى «Energy Solutions Center» ج ش س-عا سەنىمگەرلىك باسقارۋعا بەرىلدى. وتكەن ماۋسىمارالىق كەزەڭدە جۇرگىزىلگەن جوندەۋ ناۋقانىن جانە «سامۇرىق- ەنەرگو» ا ق-مەن جۇرگىزىلگەن تالداۋدى ەسكەرە وتىرىپ، 2024 -جىلى «سامۇرىق- ەنەرگو» ا ق قاراجاتى ەسەبىنەن ەكىباستۇز ج ە و-دا № 5-قازاندىق اگرەگاتىنا كۇردەلى جوندەۋ جانە № 9-قازاندىققا اعىمداعى كەڭەيتىلگەن جوندەۋ جۇرگىزۋ قاجەت. سونىمەن قاتار وتكەن ماۋسىمدا №12-قازاندىقتاعى نەگىزگى جانە قوسالقى جابدىقتارعا %80 كۇردەلى جوندەۋ جۇرگىزىلدى. انىقتالعان تەحنولوگيالىق بۇزۋشىلىقتاردى ەسكەرە وتىرىپ، وسى جىلى № 12-قازاندىق اگرەگاتىنىڭ قالعان %20 جابدىعىن جاڭارتىپ، قوسىمشا جۇمىستار جۇرگىزۋ قاجەت. «سامۇرىق-ەنەرگو» ا ق-نان ەكىباستۇز قالاسىنىڭ اكىمدىگىنە تۇسكەن ءوتىنىش بويىنشا قولدانىستاعى زاڭناما شەڭبەرىندە جوندەلەتىن وبەكتىلەردى الداعى جىلىتۋ ماۋسىمىنا ۋاقىتىلى تاپسىرۋ ءارى جىل بويى ۇزدىكسىز ىستىق سۋمەن قامتاماسىز ەتۋ ءۇشىن تەحنوگەندىك سيپاتتاعى توتەنشە جاعداي جاريالاۋ تۋرالى شەشىم قابىلداندى»، - دەپ مالىمدەدى اكىمدىكتەن.

وسىلايشا، وسى جىلى «Energy Solutions Center» («سامۇرىق- ەنەرگو» ا ق ەنشىلەس كومپانياسى) قاراجاتى ەسەبىنەن №5 جانە №12-قازان اگرەگاتتارىن كۇردەلى جوندەۋ، № 9-قازاندىق اگرەگاتىن كەڭەيتىلگەن اعىمداعى جوندەۋ، قالعان قازاندىق اگرەگاتتارى مەن قوسالقى جابدىقتاردى، سونداي-اق ج ە و عيماراتتارى مەن قۇرىلىستارىن اعىمداعى جوندەۋ جوسپارلانعان.

اۆتور

مۇرات اياعان