ەكى قىزدىڭ ولىمىنەن كەيىن الماتىدا شاتىرعا شىعۋعا تىيىم سالىندى

الماتى. KAZINFORM - الماتىدا ەكى جاسءوسپىرىم قىزدىڭ ءومىرىن قيعان جانتۇرشىگەرلىك وقيعادان كەيىن اكىمدىك كوپقاباتتى ۇيلەردىڭ شاتىرى مەن شارداعىنا كىرۋگە شەكتەۋ قويۋ جونىندە شەشىم قابىلدادى.

«كوممۋنالدىق ينفراقۇرىلىمدى دامىتۋ باسقارماسى كوپپاتەرلى تۇرعىن ۇيلەردى باسقارۋدىڭ بارلىق ورگاندارىنا قاۋىپسىزدىك شارالارىن كۇشەيتۋ، ونىڭ ىشىندە شاتىرعا كىرۋدى شەكتەۋ جونىندە حات جولدادى»، - دەپ حابارلادى اكىمدىكتىڭ باسپا ءسوز قىزمەتى.

سونداي- اق، ءبولىم اۋدان اكىمدىكتەرىمەن، ۇگىت-ناسيحات جەتەكشىلەرىمەن جانە بەلسەندى تۇرعىندارمەن بىرگە شاتىرعا كىرۋگە شەكتەۋدى تەكسەرۋ ءۇشىن كوپقاباتتى تۇرعىن ۇيلەردى ارالاۋدى باستادى.

تەكسەرۋ ناتيجەسى اكتىدە تىركەلەدى.

«بۇدان بىلاي شاتىرعا باسقارۋشى كومپانيانىڭ رۇقساتىمەن عانا كىرۋگە بولادى»، - دەپ قوستى اكىمدىكتەگىلەر.

بۇعان دەيىن الەۋمەتتىك جەلىلەردە ەكى قىزدىڭ كوپقاباتتى ءۇيدىڭ شاتىرىنان قۇلاپ كوز جۇمعانى جايلى اقپارات تاراعان ەدى. بۇل فاكتى بويىنشا المالى اۋداندىق پوليتسيا ءبولىمى قىلمىستىق ءىس قوزعادى.

سونداي-اق قايعىلى وقيعاعا وراي الماتىنىڭ ءبىلىم باسقارماسى مالىمدەمە جاسادى.

«ءبىلىم باسقارماسى ءتيىستى مەملەكەتتىك ورگانداردىڭ قىزمەتكەرلەرىن تارتا وتىرىپ، ءىستىڭ بۇكىل ءمان- جايىن زەردەلەۋ جونىندەگى كوميسسيا قۇردى» دەلىنگەن حابارلامادا.