ەكى قازاقستاندىق يندونەزيادا ءولىم جازاسىنا كەسىلە مە
استانا. KAZINFORM - يندونەزيانىڭ بالي ارالىندا ەسىرتكىگە بايلانىستى قىلمىس جاسادى دەگەن كۇدىكپەن ۇستالعان ەكى قازاقستان ازاماتىنا ءولىم جازاسى تاعايىندالۋى مۇمكىن.
يندونەزيادا ەسىرتكى تاسىمالداۋ مەن ساۋداسىنا قاتىستى قاتاڭ جازا قاراستىرىلعان. بۇعان دەيىن بۇل ەلدە شەتەل ازاماتتارىنا قاتىستى ءولىم جازاسى بىرنەشە رەت ورىندالعان، الايدا 2017-جىلدان بەرى اتالعان جازاعا موراتوري ەنگىزىلگەن.
يندونەزيا ب ا ق- ىنىڭ مالىمەتىنشە، قازاقستاننىڭ ەكى ازاماتى ءساۋىر ايىندا ۇستالعان. ولاردىڭ جانىنان شامامەن 49 گرام مەتامفەتامين تاركىلەنگەن، بۇل ءۇشىن ولار ءولىم جازاسىنا كەسىلۋى مۇمكىن.
قازاقستان رەسپۋبليكاسى سىرتقى ىستەر مينيسترلىگى بۇل جاعدايعا قاتىستى رەسمي تۇسىنىكتەمە بەردى:
- قازىرگى ۋاقىتتا اتالعان ازاماتتارعا قاتىستى يندونەزيانىڭ قۇزىرلى ورگاندارى سوتقا دەيىنگى تەرگەپ-تەكسەرۋ جۇمىستارىن جۇرگىزىپ جاتىر، سوندىقتان وزگە اقپارات جاريا ەتۋگە جاتپايدى. قازاقستاننىڭ دجاكارتاداعى ەلشىلىگى تەرگەۋ ورگاندارىمەن جانە كۇدىكتىلەردىڭ تۋىستارىمەن بايلانىستا جۇمىس ىستەۋدە. بۇل ماسەلە قازاقستاندىق ديپلوماتتاردىڭ ەرەكشە باقىلاۋىندا، - دەلىنگەن س ءى م مالىمدەمەسىندە.
ايتا كەتەيىك، يراندا 2023-جىلى ازەربايجان ەلشىلىگىنە شابۋىل جاساعان ادام ءولىم جازاسىنا كەسىلدى.
