ەكى ادامنىڭ ولىمىنەن كەيىن ەمشارا كابينەتتەرىنە تەكسەرىس باستالدى - د س م

استانا. KAZINFORM - دەنساۋلىق ساقتاۋ مينيسترلىگى جەكە ەمشارا كابينەتتەرىندە كورسەتىلەتىن مەديتسينالىق قىزمەتتەردىڭ ساپاسى مەن قاۋىپسىزدىگىن باقىلاۋدى كۇشەيتەدى، دەپ حابارلايدى ۆەدومستۆونىڭ باسپا ءسوز قىزمەتى.

مينيسترلىك بيىلعى جىلدىڭ باسىنان بەرى جامبىل وبلىسىندا مەديتسينالىق كومەك كورسەتۋ ستاندارتتارىن بۇزعان مەديتسينالىق ۇيىمداردا ەكى ادام قايتىس بولعانىن ەسكە سالدى.

د س م مەديتسينالىق جانە فارماتسيەۆتيكالىق باقىلاۋ كوميتەتى وسى مەكەمەلەردى تەكسەرۋ كەزىندە ەلەۋلى بۇزۋشىلىقتاردى، ونىڭ ىشىندە شۇعىل مەديتسينالىق كومەك كورسەتۋ ءۇشىن ليتسەنزيالار مەن شارتتاردىڭ جوقتىعىن، ءدارى-دارمەكتەردى ساقتاۋ قاعيدالارىن ساقتاماۋدى انىقتادى. وڭىردە قوعامدىق مونيتورينگتىك توپتار قۇرىلدى. جۇرگىزىلگەن تەكسەرۋلەردەن كەيىن ولار مەديتسينالىق كومەك كورسەتۋ ستاندارتتارىن بۇزاتىن 133 ەمشارا كابينەتىن انىقتادى.

- جوسپاردان تىس تەكسەرۋلەردىڭ ناتيجەسىندە 14 ەمشارا كابينەتىنە جالپى سوماسى 2,1 ميلليون تەڭگەگە اكىمشىلىك ايىپپۇل سالىندى، 51 كابينەت ءوز ەركىمەن جۇمىسىن توقتاتتى، 68 مەكەمەدە تەكسەرۋلەر جالعاسىپ جاتىر، - دەپ حابارلادى م ف ب ك جامبىل وبلىسى بويىنشا دەپارتامەنتىندە.

وسىعان ۇقساس جۇمىس قازاقستاننىڭ باسقا وڭىرلەرىندە دە جۇرگىزىلەتىن بولادى.

جوسپاردان تىس تەكسەرۋلەر ازاماتتاردىڭ رەسمي وتىنىشتەرى، اكىمدىكتەردىڭ، دەنساۋلىق ساقتاۋ باسقارمالارىنىڭ، قۇقىق قورعاۋ ورگاندارىنىڭ تاپسىرمالارىنىڭ نەگىزىندە عانا جۇرگىزىلۋى مۇمكىن ەكەنىن ايتا كەتكەن ءجون.

دەنساۋلىق ساقتاۋ مينيسترلىگى تەك ليتسەنزيالانعان مەديتسينالىق ۇيىمدارعا جۇگىنۋدى، پەرسونالدىڭ بىلىكتىلىگىنە جانە مەديتسينالىق قىزمەتتى جۇزەگە اسىرۋعا ليتسەنزيانىڭ بولۋىنا قىزىعۋشىلىق تانىتۋدى، دارىگەرلىك باقىلاۋسىز ۇيدە ەمشارالار جۇرگىزبەۋدى ۇسىنادى.

بۇعان دەيىن قازاقستاندا جۇكتى ايەلدەردىڭ %90 پرەناتالدىق سكرينينگپەن قامتىلعانى حابارلاندى.

اۆتور

اينۇر تۋماكبايەۆا