كوزىڭىزدەن بايقاۋعا بولاتىن قاتەرلى ىسىكتىڭ 11 بەلگىسى

كوزدىڭ قاتەرلى ىسىگى سيرەك كەزدەسەتىن اۋرۋ بولعانىمەن، ەرتە باستان نازار اۋدارۋ كەرەك بەلگىلەردىڭ قانداي ەكەنىن بىلگەن ءجون. ويتكەنى ولاردىڭ كەيبىرەۋلەرى قاتەرلى ىسىكتىڭ باسقا تۇرىنە قاراعاندا الدەقايدا ايقىن كورىنەدى.

قاتەرلى ىسىك ادەتتە وكپە، ءسۇت بەزدەرى جانە تەرىگە اسەر ەتەدى، سوندىقتان ونىڭ كوزگە اسەر ەتۋى مۇمكىن ەكەنىن ۇمىتۋ وڭاي. كوپتەگەن جاعدايدا كوزدىڭ قاتەرلى ىسىگى قاراپايىم تەكسەرۋ كەزىندە انىقتالادى، ءبىراق الدىن الۋ ءۇشىن كەيبىر بەلگىلەردى ءوزىڭىز بايقاپ ءجۇرۋىڭىز كەرەك.

تاۋەكەل فاكتورلارىنا جاسىنان باسقا ءناسىل مەن كوزدىڭ ءتۇسى جاتادى. مىسالى، كوز مەلانوماسىمەن اق ادامدار، سونداي-اق كوزىنىڭ ءتۇسى كوك، سۇر نەمەسە جاسىل ادامدار اۋىرادى. سونىمەن قاتار، كوزدىڭ قاتەرلى ىسىگى تۇقىم قۋالاۋى مۇمكىن، ونىڭ گەنەتيكالىق سەبەپتەرى ءالى دە زەرتتەلىپ جاتىر.

كوز قاتەرلى ىسىگىنىڭ بەلگىلەرىنە:

ءبىر كوزدىڭ دوڭەس بولۋى؛

كورۋ قابىلەتىنىڭ تولىق نەمەسە ءىشىنارا ناشارلاۋى نەمەسە كوزدەگى قارا داق، ول ۇلكەيەدى؛

كوزدىڭ نەمەسە ونىڭ اينالاسىنداعى اۋىرسىنۋ، ءبىراق بۇل كوزدىڭ قاتەرلى ىسىگىندە سيرەك كەزدەسەدى؛

كوزدىڭ بەتىندەگى بوزعىلت كوتەرىلگەن ماسسا؛

بۇلىڭعىر كورۋ؛

كوزدىڭ سىرتقى ءتۇرىنىڭ وزگەرۋى؛

قاباقتاعى نەمەسە كوزدىڭ اينالاسىنداعى تومپەشىكتەر؛

كوز الدىڭىزدان داك، جارىقتىڭ بىركەلكى ەمەس جىپىلىقتاۋى نەمەسە كوزدىڭ الدىندا ءجيى «قوزعالاتىن سىزىق» دەپ اتالاتىن ءبىرتۇرلى تولقىندى سىزىقتار كورۋ؛

پەريفەريالىق كورۋدەگى وزگەرىستەر - بۇل ءسىزدىڭ الدىڭىزدا تۇرعان نارسەنى عانا كورە الاتىنىڭىز، ياعني جانىڭىزداعى زاتتاردى كورە المايسىز؛

كوزدىڭ ءتۇرلى-ءتۇستى بولىگىندەگى قارا داقتار؛

كوزدىڭ تىتىركەنۋى، «قىزىل كوز» نەمەسە سوزىلمالى كونيۋنكتيۆيت.

دارىگەرگە قاشان بارۋ كەرەك؟

كوزدىڭ قاتەرلى ىسىگىنىڭ سيرەك كەزدەسەتىنى سونشالىق، بۇل بەلگىلەردىڭ بىرەۋى نەمەسە بىرنەشەۋىنىڭ پايدا بولۋى ادەتتە باسقا اۋرۋدىڭ بەلگىسى بولىپ، الاڭدايتىنداي ماسەلە بولىپ كورىنبەيدى. ءبىراق بويىڭىزداعى كەز كەلگەن وزگەرىستى ۋاقىتىلى تەكسەرىپ، انىقتاپ، ەمىن العان دۇرىس. سەبەبى كوزدىڭ قاتەرلى ىسىگى نەعۇرلىم ەرتە انىقتالسا، ونى ەمدەۋ سوعۇرلىم وڭايىراق بولادى.

ايتا كەتەيىك، بۇعان دەيىن كوزدىڭ اعى نەلىكتەن سارعاياتىنى حابارلانعان بولاتىن.