كوتەش اقىننىڭ ولەڭدەرى
اقىننىڭ « ابىلاي، بوتاقاندى سەن ءولتىردىڭ»، « ارقا ويىلدىڭ قۇبا جون تۇسەر قاقتار»، « كۇركەلىنىڭ باۋىرى كۇندە داۋىل»، « قارتايعاندا قاتىنىڭ دۇشپان بولدى» سەكىلدى جىرلارى بەرىلدى.
ابىلاي، بوتاقاندى سەن ءولتىردىڭ
ابىلاي، بوتاقاندى سەن ءولتىردىڭ،
ەسىل ەر جازىعى جوق نەگە ءولتىردىڭ؟
حان باسىڭ قاراشىڭمەن داۋلى بولىپ،
ۇستىنەاق وردانىڭ قول كەلتىردىڭ.
ابىلاي، كۇيىپ- كەتتى سالعان قالاڭ،
مەيرامعا نە ەدى سەنىڭ جاپقان جالاڭ؟
جانايدى ءدال بۇگىن كۇن بوساتپاساڭ،
بولادى ەرتەڭ جەسىر قاتىن- بالاڭ!!!
ارقا ويىلدىڭ قۇبا جون تۇسەر قاقتار
ارقا ويىلدىڭ قۇبا جون تۇسەر قاقتار،
سۋ ىشۋگە سول قاقتى قۇلان جاقتار.
اتادان التاۋ، جەتەۋ تۋعانمەنەن،
سونىڭ ىشىندە بىرەۋى- اق سۇتىن اقتار.
اي قاراڭعى، كۇن بۇلت، تۇن دەمەڭىز،
بىرەۋ جارلى، بىرەۋ باي، كۇندەمەڭىز.
اتا تىلىن الماعان ارام ۇلدى
اۋزى تۇكتى كاپىردەن كەم دەمەڭىز.
اي قاراڭعى، كۇن بۇلت، تۇن دەمەڭىز،
بىرەۋ جارلى، بىرەۋ باي، كۇندەمەڭىز.
اتا تىلىن سىيلاعان ادال ۇلدى
حات وقىعان مولدادان كەم دەمەڭىز.
بالاڭا ۇرسا بەرمە تاز بولسا دا،
مالىڭدى سول باعادى از دا بولسا.
جۇمىسكەر ەسىكتەگى تىنىشى كەتەر،
قوجايىن تۇردە وتىرعان قازبا بولسا.
كۇركەلىنىڭ باۋىرى كۇندە داۋىل
كۇركەلىنىڭ باۋىرى كۇندە داۋىل،
كوتەش قالدى جۇرتىندا جالعىز اۋىل.
اۋىرىپ جاتقان كوڭىلىمدى بىر سۇراماي،
شىن سەكسەننىڭ بالاسى قارا باۋىر.
بىر جانىمنىڭ قامى ۇشىن جۇردىم ساياق،
نە قىلامىن بۇل مالدى جاننان اياپ.
اۋىرىپ جاتقان كۇنىمدە بىر قايرىلماي،
ەت دەگەندە قالماپتى تايلى- تاياق.
ارعى اتامدى سۇراساڭ سەكسەن جۇملا،
رايىمبەك سەكسەننەن تۋعان ۇل ما؟!
رايىمبەكتى سەن دە ەش قويا المايسىڭ،
رايىمبەك بي بولسا، راي قۇل ما؟!
قارتايعاندا قاتىنىڭ دۇشپان بولدى
قارتايعاندا قاتىنىڭ دۇشپان بولدى،
بالاسىمەن بىرىگىپ قىسقان بولدى.
كەلىن دەگەن بىر دۇشپان تاعى شىعىپ،
بىرەۋى ىشتەن، بىرەۋى تىستان بولدى.
قارتايعاندا قاتىنىڭ قازبا دەيدى،
كەلىن مەنەن بالاعا جازبا دەيدى.
ات بولسا، ايعىر بولسا، سولار مىنىپ،
شولاق بايتال قاقباسقا از با دەيدى.
« بالا، بالا!» دەۋمەنەن مازالىمىز،
بالادان بولار بىلەم اجالىمىز.
بالامىزعا جالىنساق جان ساقتار ەك،
كەلىن دەگەن دايار تۇر تاجالىمىز!
كارىلىك، جىلى- جۇمساق اس جاراي ما،
قازى، قارتا، جال، جايا، باس جاراي ما؟
كارىلىك، مۇنىڭ ءبارىن جاقتىرمايسىڭ،
ۇيگەن توپىراق، قالاعان تاس جاراي ما؟!
الدىمنان التى پۇشىق انتالادى،
تىلگە كەلمەي بىرەۋى بالتالادى.
وسى اۋرۋدان، ءسىرا، جان قالماس بىلەم،
بالتاسى تيگەن جەرى قانتالادى.
ياپىر- اي، بۇل نە دەگەن ەل بولارسىڭ،
نە مالدان، نە پەرزەنتتەن كەم بولارسىڭ.
قاراپ جۇرگەن كوتەشكە تيەمىن دەپ،
بالاسىنا قۇلبولدىنىڭ جەم بولارسىڭ.
