كوستەنكو شاحتاسىنىڭ 27 كەنشىسى ءالى اۋرۋحانادا جاتىر

ەمحانا
Pixabay

 استانا. قازاقپارات - قاراعاندى وبلىسىنىڭ اكىمى ەرماعانبەت بولەكپايەۆ ۇكىمەت وتىرىسىندا پرەمەر-مينيستر ءاليحان سمايىلوۆقا كوستەنكو شاحتاسىنداعى اپاتتان امان شىققان كەنشىلەردىڭ دەنساۋلىعى تۋرالى مالىمەت بەردى. 

«كوستەنكو شاحتاسىنداعى جاعداي بويىنشا وبلىستىق جەدەل شتاب جۇمىس اتقارىپ جاتىر. بۇگىن تاڭەرتەڭ مەديتسينالىق مەكەمەلەردە 27 ادام جاتىر. بىرەۋىنىڭ جاعدايى اۋىرعا جاقىن، 24 ى ورتاشا جانە ەكەۋى ءبىرقالىپتى. بارلىق پاتسيەنتتەر قاجەتتى مەديتسينالىق كومەك الىپ، وڭالتۋدان ءوتىپ جاتىر. قازا تاپقان ءاربىر كەنشىنىڭ وتباسىنا مەمورگانداردىڭ باسشىلارى مەن دەپۋتاتتار بەكىتىلدى»، - دەدى وبلىس اكىمى.

سونداي-اق، وبلىس باسشىسى قازا تاپقان كەنشىلەر وتباسىلارىنىڭ الەۋمەتتىك پورتەرتى جاسالعانىن اتاپ ءوتتى.

«كوپبالالى وتباسىلار، سونداي-اق، جالعىز اسىراۋشىسى جانە كامەلەتكە تولماعان بالاسى بار وتباسىلار انىقتالدى. قازاق تاپقانداردىڭ يپوتەكا جانە باسقا دا نەسيەلەرى مەن تۇرعىن ءۇي جاعدايى تۋرالى اقپارات جينالدى. قازا تاپقانداردىڭ وتباسىنا مەملەكەت تاراپىنان ماتەريالدىق كومەكتىڭ بارلىق ءتۇرى ءتۇسىندىرىلىپ جاتىر. «ارسەلورميتتال تەمىرتاۋ» جەرلەۋ شىعىنىن ۇيىمداستىرۋ جانە تولەۋ بويىنشا مىندەتتەمەسىن ورىنداپ جاتىر. كومپانيانىڭ قالعان مىندەتتەمەلەرى كەزەڭ-كەزەڭىمەن ورىندالادى. ونى وبلىس اكىمدىگى باقىلاۋدا ۇستايدى. زارداپ شەككەندەر جانە ولاردىڭ وتباسىنا قاجەتتى كومەك دەرەۋ كورسەتىلىپ جاتىر»، - دەيدى ەرماعانبەت بولەكپايەۆ.

سوڭعى جاڭالىقتار