كورىكتى قالا قاتال ۇستازداي دۇرىس ءجۇرىپ-تۇرۋعا باۋليدى - توقايەۆ تازالىقتىڭ قوعامعا اسەرى تۋرالى

پرەزيدەنتتىڭ ايتۋىنشا، ءسانى مەن ساۋلەتى جاراسقان قالا كەڭىستىگى قاتال ۇستاز سياقتى ارتىق اقىل ايتىپ، دىلمارسىمەي-اق دۇرىس ءجۇرىپ-تۇرۋعا باۋليدى.

— تازالىق ازاماتتارىمىزدى ءوز قادىر-قاسيەتىن سەزىنۋگە ۇيرەتىپ، ەرتەڭگە دەگەن سەنىمىن كۇشەيتەدى. مۇنىڭ ءبارى — ءبىر-بىرىمەن بايلانىستى دۇنيە. كوشەدەگى تازالىق پەن ءتارتىپ قوعامدى جاسامپازدىققا قۇلشىندىرىپ، الەۋمەتتىك وپتيميزمدى وياتادى. سايىپ كەلگەندە، ەلدىڭ ءال-اۋقاتىنىڭ ارتۋىنا ىقپال ەتەدى، — دەدى قاسىم-جومارت توقايەۆ.

ءبىز الەۋمەتتىك ماسىلدىقتان ارىلىپ، جاۋاپتى سەرىكتەستىككە تۇبەگەيلى كوشۋگە جاعداي جاساۋىمىز كەرەك.

— ەلدەگى وزگەرىس قاراپايىم ىستەن باستالادى. تۇرعىندارى ىسكەر، بەلسەندى ءارى جاڭاشىل اكىمدى سايلاعان بەرەكەلى اۋىلدان، ءوز ءۇيىنىڭ ماسەلەسىنە بەي-جاي قارامايتىن مۇلىك يەلەرى بىرلەستىگىنىڭ تاتۋ-ءتاتتى تىرشىلىگىنەن، ازاماتتارعا شاراپاتى تيگەن ۆولونتەرلىك جانە قايىرىمدىلىق باستامالاردان كورىنەدى، — دەدى مەملەكەت باسشىسى.

بۇعان دەيىن قاسىم-جومارت توقايەۆ ەلدى كوركەيتۋگە ءاربىر ازامات اتسالىسۋى كەرەكتىگىن ايتقان ەدى.

سونداي-اق پرەزيدەنت تازالىقتى ۇلتتىق برەندكە اينالدىرۋ كەرەگىن ايتتى.

پرەزيدەنتتىڭ ايتۋىنشا، «ءۇشىنشى سەكتوردىڭ» باستى مىندەتى - قوعامدا زاڭ مەن ءتارتىپ، تازالىق پەن تابيعاتتى ايالاۋ قاعيداتتارىن ورنىقتىرۋ.

— بۇل جۇمىستىڭ ماڭىزىنا ءبىر سوزبەن باعا بەرۋ قيىن. سىزدەر وسىناۋ مەملەكەتتىك جانە قوعامدىق قاعيداتتاردىڭ ءمانى مەن ماقساتىن جاقسى تۇسىنەسىزدەر. وكىنىشكە قاراي، مادەنيەتسىزدىك فاكتىلەرىمەن ءجيى بەتپە-بەت كەلەمىز. تابيعاتتى، قوعامدىق ورىنداردى قاساقانا لاستايدى. قوعامعا، مەملەكەتكە قارسى مۇنداي بەيباستىق ارەكەتتەرگە جازانى كۇشەيتكەن دۇرىس دەپ ەسەپتەيمىن، — دەدى مەملەكەت باسشىسى.

«تازا قازاقستان» — ادامنىڭ اينالاسىنا جاۋاپكەرشىلىكپەن قاراۋ داعدىسى، ازاماتتىق كەمەلدىكتىڭ كورسەتكىشى، مەملەكەت وركەنيەتىنىڭ ماڭىزدى ولشەمى ەكەنى ايتىلدى.

— قالالارىمىز بەن اۋىلدارىمىزدىڭ ءبىرازىندا جوعارى ەكولوگيالىق مادەنيەت پەن قوعامدىق ءتارتىپ ۇلگىسىن كورىپ-بايقاپ ءجۇرمىز. بۇل ءبىزدى قۋانتادى. قازاقستاندى قوناقجاي ءارى قاۋىپسىز ەل رەتىندە تانيدى. ەندى وسى ارتىقشىلىقتارىمىزبەن قوسا، تازالىقتى دا ۇلتتىق برەندكە اينالدىرۋىمىز كەرەك، — دەدى قاسىم-جومارت توقايەۆ.

ەلىمىزگە كەلگەن قوناقتار قازىردىڭ وزىندە قالالارىمىزدىڭ كەلبەتىنە تامسانا قارايدى. بۇل قازاقستاننىڭ تۋريستىك ءارى ينۆەستيتسيالىق تارتىمدىلىعىن ەسەلەي تۇسەدى.

— وسىنداي جەتىستىكتەردى ەل اۋماعىندا تاراتۋىمىز كەرەك. «تازا قازاقستان» باستاماسىنىڭ ءمان-مازمۇنىن كۇشەيتىپ، تىڭ يدەيالارمەن، كرەاتيۆتى جوبالارمەن تولىقتىرعان ءجون، — دەدى پرەزيدەنت.