كورەيادا زاڭدى تۇردە جۇمىس ىستەۋ ءۇشىن نە ىستەۋ كەرەك - مينيستر جاۋاپ بەردى
استانا. KAZINFORM - بۇگىندە وڭتۇستىك كورەيادا 22 مىڭ قازاقستاندىق ءجۇر، ونىڭ 6 مىڭىندا ۆيزا مەرزىمى ءوتىپ كەتكەن. ق ر ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا كورەيادا زاڭدى جۇمىسقا بارۋ ءۇشىن نە ىستەۋ كەرەگىن ايتىپ بەردى.
قازاقستان باسقا ەلدەردە جۇمىس ىستەيتىن وتانداستاردىڭ ەڭبەك جانە الەۋمەتتىك قۇقىقتارىن قامتاماسىز ەتۋ بويىنشا 8 ۇكىمەتارالىق كەلىسىم بەكىتەدى.
«وڭتۇستىك كورەيا بويىنشا مەملەكەتتىك ورگاندارمەن كەلىسىمشارت كەلىسىلدى، ماقۇلداندى جانە سىرتقى ىستەر مينيسترلىگى ارقىلى كورەيا تاراپىنا جىبەرىلدى. قازىر كورەيا تاراپى بۇل كەلىسىمدى قاراستىرىپ جاتىر. ەندى ءبىز الماتى قالاسىندا ءال-فارابي ۋنيۆەرسيتەتىنىڭ نەگىزگى سەرتيفيكاتسيالاۋ ورتالىعىندا كورەياعا شىعاتىن ازاماتتاردىڭ ءبىلىم ساپاسىن تەكسەرۋ مەن اۋديت جاساۋ ورنىن ازىرلەدىك»، - دەدى س. جاقىپوۆا مينيسترلىكتىڭ القا وتىرىسىندا.
سونىمەن بىرگە، قونايەۆ قالاسىندا وندىرىستىك بازالار دايىندالدى، وندا كورەياعا بارعىسى كەلەتىن قازاقستاندىقتار 2-4 ايعا دەيىن تىلدىك جانە ماماندىعىنا قاراي وندىرىستىك دايىندىقتان وتە الادى.
«دايىندىقتان وتكەن ادام كورەي ءتىلى مەن بىلىكتىلىگى بويىنشا تەست تاپسىرادى. ونى كورەيادان ارنايى كەلگەن اۋديتور قاداعالايدى. بارلىق سىناق كەزەڭىنەن وتكەن ادام كورەياعا بارىپ، زاڭدى تۇردە ەڭبەك ەتە الادى»، - دەپ ءتۇسىندىردى ەڭبەك ءمينيسترى.
