كورەيادا سۇيەگى قازاقستاننان جەتكىزىلگەن گەنەرالعا قاتىستى شۋ شىقتى

استانا. قازاقپارات - سەۋلدە كورەيدىڭ اتاقتى قولباسشىلارىنىڭ ءبىرى حون بوم دوعا ارنالعان كورمە ءوتىپ جاتىر. ءىس-شارا كورەي تاۋەلسىزدىگى ءۇشىن كۇرەستىڭ 105 جىلدىعىنا ارنالدى. بىلتىر گەنەرال حون ەسىمى ەلدەگى ەكى ءىرى ساياسي كۇشتەر اراسىندا داۋعا اينالدى.

حون بوم دو جاپون وككۋپاتسياسى كەزىندە كورەي تاۋەلسىزدىگى ءۇشىن كۇرەسكەن اسكەري قولباسشىلاردىڭ ءبىرى. حون قىتاي مەن رەسەيدە پارتيزاندار جاساقتارىن قۇرىپ، ءىرى جەڭىستەرگە قول جەتكىزدى. 1937-جىلى قولباسشى باسقا كورەيلەرمەن بىرگە قيىر شىعىستان قازاقستانعا جەر اۋدارىلادى.

كورمەنىڭ ءبىر بۇرىشى قازاقستانعا ارنالعان. ءومىرىنىڭ سوڭعى جىلدارى حون بوم دو قىزىلوردادا تۇرىپ، كورەي تەاترىندا جۇمىس ىستەگەن. كوزى تىرىسىندە ءوزى تۋرالى پەسا كورگەن دەگەن دەرەك بار. الماتىدا ءالى كۇنگە دەيىن كورەي تەاترى جۇمىس ىستەيدى. ال حون بوم دو تۋرالى قويىلىم، ءالى كۇنگە دەيىن تەاتر رەپەرتۋارىندا ماڭىزدى رولگە يە. 2021-جىلى قولباسشىنىڭ ءمايىتىنىڭ كۇلى قىزىلوردادان اكەلىنىپ، تەدجونداعى ۇلتتىق زيراتقا قايتا جەرلەندى. ۇلتتىق اسكەري اكادەميانىڭ الدىنا حون بوم دو مەن تاعى ءتورت ۇلتتىق باتىردىڭ بيۋستى ورناتىلدى. ءبىر جىلدان كەيىن ەلدەگى بيلىك ليبەرالداردان كونسەرۆاتورلارعا ءوتتى، ال 2023-جىلدىڭ تامىزىندا قولباسشىلارعا ارنالعان ەسكەرتكىشتەردى الىپ تاستاۋ تۋرالى شەشىم قابىلداندى. قورعانىس مينيسترلىگى اسكەري اكادەميادا «كوممۋنيستىك» گەنەرالدىڭ بيۋستىن ورناتۋ ورىنسىز دەپ سانايدى. بۇل شەشىمگە وپپوزيتسيالىق توبۋرو ليبەرالدىق پارتياسىنىڭ مۇشەلەرى قارسى بولدى.

ۋ ۆون سيك، كورەيا ۇلتتىق اسسامبلەياسىنىڭ دەپۋتاتى:

- مەن حون بوم دونىڭ كۇلىن قازاقستاننان تاسىمالداۋعا كومەكتەسكەن قازاقستاندىقتاردان قاتتى ۇيالامىن. ءبىراق وڭتۇستىك كورەيا ازاماتتارىنىڭ كوپشىلىگى بيۋستتى الىپ تاستاۋعا قارسى جانە ءبىز بۇل پروتسەستى توقتاتۋ ءۇشىن بارلىعىن جاساپ جاتىرمىز. حونگ بوم دو مەموريالى سول جەردە بولۋى كەرەك.

كيم سىن ين، ۇلتتىق ماسەلەلەر ينستيتۋتىنىڭ زەرتتەۋشىسى:

- ساۋالنامانى تولتىرۋ بارىسىندا حون بوم دو ساياسي ۇيىم نەمەسە پارتيا مۇشەسى ەمەسپىن مەن شارۋا جانە پارتيزانمىن دەپ جازدى. حون «رەسەيگە ساپاردىڭ ماقساتى قانداي؟» دەگەن سۇراققا «كورەيانىڭ تاۋەلسىزدىگى ءۇشىن كۇرەس» دەپ جاۋاپ بەردى. حون بوم دو تاۋەلسىزدىك ءۇشىن باسقا باتىرلارعا قاراعاندا حالىقپەن بىرگە ۇزاق كۇرەستى. بۇل قۇجاتتاردى كورگەن كەلۋشىلەر بيۋستتى جىلجىتۋ تۋرالى شەشىمنىڭ قاتە ەكەنىن تۇسىنەدى.

كورەيدىڭ حالىق باتىرى قازاقستان مەن وڭتۇستىك كورەيا اراسىنداعى بايلانىستاردى نىعايتۋعا سەبەپكەر بولدى. حون بوم دونىڭ سۇيەگى تەدجونعا جەتكىزىلگەننەن كەيىن ونىڭ قىزىلورداداعى زيراتىنىڭ ورنىنا مەموريالدىق ساياباق سالىندى. سولتۇستىك چوللا پروۆينتسياسى مەن قىزىلوردا وبلىسى اراسىندا اۋىل شارۋاشىلىعى سالاسى بويىنشا ىنتىماقتاستىق تۋرالى كەلىسىم بار. سونداي-اق قىزىلوردا مەن سەۋل ۋنيۆەرسيتەتتەرى قازاقستاندا جاساندى ينتەللەكت مەكتەبىن قۇرۋعا كەلىستى.

www.24.kz