كورەيادا 75 جاستان اسقان جۇرگىزۋشىلەر VR- تەستتەن وتەدى
استانا. قازاقپارات - وڭتۇستىك كورەيادا ەگدە جاستاعى ادامداردىڭ كولىك جۇرگىزۋ قابىلەتى ەندى ۆيرتۋالدى شىندىق كومەگىمەن تەكسەرىلمەك. 75 جاستان اسقان قارت كىسىلەر جۇرگىزۋشى كۋالىگىن ۇزارتۋ كەزىندە ارنايى تەست تاپسىرادى.
ەگەر ونىڭ ناتيجەسى تەرىس بولسا، قارت ادامدارعا كولىك جۇرگىزۋدەن باس تارتۋعا كەڭەس بەرىلەدى. بۇل جاڭاشىلدىق نە ءۇشىن ەنگىزىلگەلى جاتىر جانە تەست قالاي وتەدى؟
وڭتۇستىك كورەيادا 65 جاستان اسقان جۇرگىزۋشىلەر سانى 5 ميلليوننان اسادى. بۇل ەل حالقىنىڭ شامامەن %10- ءى. ۇلتتىق پوليتسيا اگەنتتىگىنىڭ مالىمەتىنشە، جول اپاتى جاستارعا قاراعاندا ءدال وسى جاستاعى جۇرگىزۋشىلەردىڭ كەسىرىنەن ءجيى تۋىندايدى. قارت ادامدار ءۇشىن تەستىلەۋدى ەنگىزۋ تۋرالى شەشىم سەۋلدەگى ءىرى جول وقيعاسىنان كەيىن قابىلداندى. ول اپاتتان 9 ادام قازا تاپتى. قايعىلى وقيعانىڭ سەبەبى: جۇرگىزۋشى تەجەگىش پەن گاز پەدالدارىن شاتاستىرىپ العان. رۋلدە 68 جاستاعى جۇرگىزۋشى بولعان.
وڭتۇستىك كورەيادا جۇرگىزۋشى كۋالىگىن الۋ وڭاي ەمەس. الدىمەن اۆتومەكتەپتە وقىپ، ارنايى مەملەكەتتىك ورتالىقتا بەس كەزەڭنەن تۇراتىن ەمتيحان تاپسىرۋ قاجەت. العاشقىسى - جولداعى قاۋىپسىزدىك ەرەجەلەرى بويىنشا ءبىر ساعاتتىق ءدارىس. كەيىن ەستۋ جانە كورۋ قابىلەتى تەكسەرىلەدى. ودان سوڭ ۇمىتكەر كومپيۋتەرلىك سىنىپتا تەوريالىق ەمتيحان تاپسىرادى. سودان كەيىن جۇرگىزۋ ورتالىعىنداعى پراكتيكالىق تەستكە جىبەرىلەدى. ۇمىتكەر مۇنارادان بەرىلەتىن كوماندالاردى ورىنداۋى ءتيىس. كولىكتىڭ مونيتورىنان جۇرگىزۋشى ءوز قاتەلەرىن بىردەن كورە الادى. ەگەر تەستىلەۋدەن وتە الماسا، كۋالىك بەرىلمەيدى.
ال ورتالىقتاعى جۇرگىزۋ تەستىن ءساتتى تاپسىرعان ادام ۋاقىتشا جۇرگىزۋشى كۋالىگىن الادى. وسىدان كەيىن ول ءبىر جىل ىشىندە سوڭعى كەزەڭنەن ءوتۋى كەرەك. بۇل تەكسەرۋدە نۇسقاۋشىمەن بىرگە جولدا كولىك جۇرگىزۋ شەبەرلىگىن كورسەتەدى. جۇرگىزۋشى كۋالىگى 10 جىل مەرزىمگە بەرىلەدى. ونى تاعى 10 جىلعا ۇزارتۋ ءۇشىن ەستۋ جانە كورۋ قابىلەتى تەكسەرىلەدى.
65 جاستان اسقان ازاماتتار بولسا جۇرگىزۋشى كۋالىگىن ءار 5 جىل سايىن جاڭارتۋى كەرەك. ال 75 جاستان اسقان ادامدار ءۇش جىل سايىن جاڭارتىپ وتىرۋعا ءتيىس. ولارعا دا VR- تەستىلەۋ ەنگىزىلەدى. بۇل سىناق كومپيۋتەرلىك ويىنعا ۇقسايدى.
دجي يەن حۆان، كورەيا ۇلتتىق پوليتسيا اگەنتتىگىنىڭ جۇرگىزۋشى كۋالىكتەرى ءبولىمىنىڭ باسشىسى:
- ەگەر تەست ناتيجەسى تومەن بولسا، جۇرگىزۋشى كۋالىگىنەن بىردەن ايىرىلمايدى. بولاشاقتا وسىنداي جۇيەنى ەنگىزۋىمىز مۇمكىن. ءبىراق قازىرگى ماقساتىمىز - قارت ادامداردىڭ كولىك جۇرگىزۋدە ساقتىق شارالارىنا ءمان بەرۋىن ارتتىرۋ. قارت جۇرگىزۋشىلەرگە ارنالعان VR- تەستىلەۋدى پوليتسيا بيىلعى جىلدىڭ ەكىنشى جارتىسىنان باستاپ ەنگىزۋدى جوسپارلاپ وتىر. تەستتەر كورەيانىڭ بارلىق 17 ءىرى قالاسىندا وتەدى.
24.kz
