ورالدا 17 جاستاعى قوستانايلىق جاس ءوسپىرىم ەسىرتكىمەن ۇستالدى
ورال. KAZINFORM - ورال قالاسىندا باتىس قازاقستان وبلىسى پوليتسيا دەپارتامەنتى ەسىرتكى قىلمىسىنا قارسى ءىس- قيمىل باسقارماسىنىڭ قىزمەتكەرلەرى جەدەل-ىزدەستىرۋ ءىس- شارالارى بارىسىندا دەركول كەنتىندە 2007 -جىلى تۋعان جاس ءوسپىرىمدى ۇستادى.
ب ق و پوليتسيا دەپارتامەنتىنىڭ باسپا ءسوز قىزمەتىنەن ءمالىم ەتكەنىندەي، جەكە ءتىنتۋ كەزىندە ودان 25 zip-پاكەت تاركىلەندى.
كەيىن جاس ءوسپىرىم ەسىرتكى جاسىرعان ورىندارىن كورسەتىپ، سول جەرلەردەن 109 zip-پاكەتكە سالىنعان ءۇش ۇلكەن وراما تابىلدى. ساراپتاما ناتيجەسىندە الىنعان زاتتاردىڭ جالپى سالماعى 249 گرامم، ياعني شامامەن 1245 دوزالىق «الفا PVP» پسيحوتروپتىق زاتى ەكەنى انىقتالدى.
«تەرگەۋ بارىسىندا قولعا تۇسكەن جاس ءوسپىرىمنىڭ قوستاناي وبلىسىنىڭ تۇرعىنى ەكەنى بەلگىلى بولدى. ول ورال قالاسىنا Telegram-ارنا ارقىلى جۇمىسقا شاقىرىلعان. جۇمىس بەرۋشىلەر جول ءجۇرۋ جانە تۇرۋ شىعىندارىن وتەگەن. قازىرگى ۋاقىتتا كۇدىكتى ۋاقىتشا ۇستاۋ يزولياتورىنا قامالدى. اتالعان دەرەك بويىنشا ەسىرتكى زاتتارىنىڭ زاڭسىز اينالىمى بويىنشا سوتقا دەيىنگى تەرگەۋ امالدارى جۇرگىزىلۋدە. پوليتسيا زاڭسىز ەسىرتكى ساقتاۋ جانە تاراتۋدىڭ قىلمىستىق جاۋاپكەرشىلىككە اكەپ سوعاتىنىن ەسكە سالادى. باتىس قازاقستان وبلىسى پوليتسيا دەپارتامەنتى وڭىردەگى ەسىرتكى قىلمىسىنا قارسى كۇرەستى كۇشەيتىپ، «ورال - ەسىرتكىسىز قالا» باعدارلاماسى اياسىندا ەسىرتكى زاتتارىنىڭ زاڭسىز اينالىمىنا توسقاۋىل قويۋ جۇمىستارىن بەلسەندى تۇردە جالعاستىرۋدا» ، دەپ حابارلادى ۆەدومستۆودان.
ەسكە سالا كەتەيىك، بۇدان بۇرىن ورالدا ماس كۇيىندە ايالدامانىڭ تەرەزەسىن سىندىرعان ەر ادامنىڭ ۇستالعانىن جازعان بولاتىنبىز.
