كوروناۆيرۋس قايتا ۋشىعا ما؟
الەمدى ابىگەرگە سالعان كوروناۆيرۋس قايتا كەلسە قايتەمىز؟ ازيا ەلدەرىندە بەلگىسىز ۆيرۋس تاراپ، ناۋقاس كوبەيگەن، دەپ حابارلايدى 24kz.
پاندەميانىڭ جاڭا تولقىنى الەمدە الاڭداۋشىلىق تۋعىزىپ وتىر. COVID-19-دان كەيىن التى جىلعا جۋىق ۋاقىت وتكەندە ازيانىڭ كەيبىر ايماقتارىندا ۆيرۋستىڭ بۇل ءتۇرى قايتا قىلاڭ بەرە باستادى.
فاريزا جانعانايەۆا، ءتىلشى:
- ءيا، قازىر ازيانىڭ ءبىرقاتار ەلىندە ۆيرۋس جۇقتىرىپ، اۋرۋحانادا جاتقانداردىڭ قاتارى كۇننەن كۇنگە ارتىپ كەلەدى. ازيا ەلدەرىندە كوروناۆيرۋس تەز تاراپ جاتىر. اسىرەسە، گونكونگ، سينگاپۋر، قىتاي جانە تايلاندتاعى جاعداي الاڭداتارلىق.
گونكونگ دەنساۋلىق ساقتاۋ قىزمەتكەرلەرى COVID-19 ىندەتىنىڭ جاڭا تولقىنى باستالعانىن راستادى. 3-مامىرداعى جاعداي بويىنشا 81 ادام ۆيرۋس جۇقتىرىپ، 30 ى قايتىس بولدى. سينگاپۋردە دە اي باسىنان بەرى 14200 ادام اۋرۋ جۇقتىرىپ، ءبىر اپتا ىشىندە كوۆيدقا شالدىققاندار سانى %28 كە ارتقان. كوبىنىڭ اۋرۋى اسقىنىپ، اۋرۋحانادا جاتىر.
«ۆيرۋستىڭ تەز تاراۋىنا جەرگىلىكتى حالىقتىڭ يممۋنيتەتىنىڭ السىرەۋى سەبەپ»، - دەيدى دارىگەرلەر. قىتايدا دا جاعداي ءماز ەمەس. ال، تايلاندتا جاعداي ءساۋىر ايىنداعى سونگكران مەرەكەسىنەن كەيىن ۋشىققان. قازىر ەكى كلاستەرلىك ىندەت انىقتالىپ، دەنساۋلىق ساقتاۋ ورگاندارى جاعدايدى مۇقيات باقىلاۋدا ۇستاپ وتىر.
يونگ پۋۆوراۆان، ۆيرۋسولوگ (چۋلالونگكورن ۋنيۆەرسيتەتى):
- زەرتتەۋ ناتيجەسى COVID-19 ۆيرۋسىنىڭ تۇرلەرى تەز كوبەيىپ جاتقانىن كورسەتتى. سايكەسىنشە، بۇل ۆيرۋستىڭ ءتۇرلى جاڭا شتامدارىنىڭ پايدا بولۋىنا اكەلەدى. جاڭا شتامدار جىلدام تارالۋى مۇمكىن، ءبىراق ولاردىڭ بەلگىلەرى جەڭىل وتەدى. دەگەنمەن، دەر كەزىندە ۆاكسينا الۋ ماڭىزدى.
امەريكالىق عالىمداردىڭ پىكىرىنە سۇيەنسەك، ۆيرۋسپەن كۇرەسۋدەگى باستى فاكتور - ۆاكسيناتسيا ناۋقانىنىڭ تولىق قامتىلۋى مەن ونىڭ ساپاسى. دەگەنمەن، قازىرگى قولدانىستاعى ۆاكسينالار ۇزاق مەرزىمگە جارامايدى.
ارتۋر رەينگولد، پروفەسسور (كاليفورنيا ۋنيۆەرسيتەتى):
- قازىر بۋستەرلىك ەكپەلەر سيرەك سالىنادى. ادامدار ولاردىڭ تيىمدىلىگىنە، اسىرەسە، ۆيرۋستىڭ تارالۋىن بولدىرماۋ قابىلەتىنە كۇمانمەن قارايدى. كوپشىلىگى ۇزاق مەرزىمدى قاۋىپسىزدىككە دە الاڭدايدى، ءبىراق بۇل - نەگىزسىز ماسەلە. بىزدە قانداي دا ءبىر ۆاكسينا نەمەسە ءدارى-دارمەك بويىنشا تولىققاندى ۇزاق مەرزىمدى دەرەكتەر بولعان ەمەس جانە بولۋى دا مۇمكىن ەمەس.
ا ق ش- تا جاڭا ۆاكسينا ماقۇلداندى ا ق ش- تىڭ ازىق- تۇلىك جانە ءدارى- دارمەك اكىمشىلىگى (FDA) كوروناۆيرۋسقا قارسى جاڭا ۆاكتسينانى ماقۇلدادى. دەگەنمەن، شەكتەۋلەر بار. ياعني، پرەپاراتتى تەك 65 جاستان اسقان ەرەسەكتەرگە، سونداي- اق 12 جاستان اسقان جەتكىنشەكتەرگە عانا قولدانۋعا رۇقسات. ۆاكسينا 30000 ادام قاتىسقان كلينيكالىق زەرتتەۋ كەزىندە ءوزىنىڭ قاۋىپسىزدىگى مەن تيىمدىلىگىن دالەلدەگەن. دۇنيەجۇزىلىك دەنساۋلىق ساقتاۋ ۇيىمى COVID-19 پاندەمياسىن رەسمي جاريالاعالى بەس جىل ءوتتى. وسى ۋاقىت ىشىندە الەمدە 700 ميلليوننان استام ادام ۆيرۋس جۇقتىرىپ، 7 ميلليونى كوز جۇمعان. وسىلايشا، COVID-19 پاندەمياسى ادامزات تاريحىنداعى ەڭ قاتەرلى ىندەتتەردىڭ بىرىنە اينالدى. بۇرىن- سوڭدى بولماعان شەكتەۋ شارالارى قابىلدانىپ، حالىق بىرنەشە اي بويى مىندەتتى كارانتيندە بولعان ەدى. سول سەبەپتى كوپشىلىكتىڭ الاڭداۋى زاڭدى قۇبىلىس. دەسە دە، دۇنيەجۇزىلىك دەنساۋلىق ساقتاۋ ۇيىم ازىرگە رەسمي مالىمدەمە بەرگەن جوق.
https://24.kz
