ەكونوميكانى ىرىقتاندىرۋ تۋرالى جارلىقتى ازىرلەۋدى تاپسىرامىن - پرەزيدەنت

استانا. KAZINFORM - ەكونوميكانى كەشەندى تۇردە ىرىقتاندىرۋ ءۇشىن جۇيەلى شارالار قابىلداۋ قاجەت. بۇل تۋرالى ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقايەۆ ايتتى.

«ەكونوميكانى كەشەندى تۇردە ىرىقتاندىرۋ ءۇشىن جۇيەلى شارالار قابىلداۋ قاجەت. بۇل - مەملەكەتتىڭ ەكونوميكالىق ۇدەرىستەرگە تىم ارالاسۋىنان بىرتىندەپ باس تارتۋعا مۇمكىندىك بەرەتىن وتە ماڭىزدى رەفورما. مىسالى، وتىن-ەنەرگەتيكا نارىعىنداعى باعانى شەكتەن تىس رەتتەۋ مۇناي ءوندىرىسىن تومەندەتىپ، ءونىم تاپشىلىعىن تۋىنداتتى. ۇكىمەت بۇل جاعدايدان ءتيىستى قورىتىندى جاسادى، احۋال بىرتىندەپ تۇزەلىپ جاتىر. سونىمەن بىرگە، ۇيالى بايلانىس نارىعىندا ولقىلىقتار كوپ. قىزمەت ساپاسىن ءالى دە جاقسارتا ءتۇسۋ كەرەك. مەملەكەتتىڭ ۇلەسىن بىرتىندەپ ازايتىپ، باسى ارتىق شەكتەۋ جانە رەتتەۋ شارالارىن الىپ تاستاۋ قاجەت. بۇلار ەكونوميكانىڭ بارلىق سالاسىنا قاتىستى ماڭىزدى مىندەتتەر»، - دەدى قاسىم- جومارت توقايەۆ.

پرەزيدەنتتىڭ اتاپ وتۋىنشە، باقىلاۋسىز مونوپوليانى، رەسۋرستاردى ادىلەتسىز ءبولۋدى، باسەكەنىڭ زاڭسىز تاسىلدەرىن قولدانۋدى تۇبىرىمەن جويۋ قاجەت.

اۆتور

مارلان جيەمباي