كونستيتۋتسياعا 30 جىل: العاش راقىمشىلىققا ىلىككەن كىم
استانا. KAZINFORM - قازاقستان رەسپۋبليكاسى كونستيتۋتسياسىنىڭ 30 جىلدىعىنا وراي راقىمشىلىق جاساۋ تۋرالى زاڭى اياسىندا العاشقى سوتتالۋشى بوستاندىققا شىقتى. بۇل تۋرالى ىشكى ىستەر مينيسترلىگى قىلمىستىق-اتقارۋ جۇيەسى كوميتەتى حابارلادى.
- ەر ادام ۇرلىق جاساعانى ءۇشىن جازاسىن وتەپ جاتقان، بۇعان دەيىن سوتتالماعان. ونى ۇيىندە ءۇش بالاسى مەن جۇبايى كۇتىپ وتىر. قوستاناي وبلىسى بويىنشا قىلمىستىق-اتقارۋ جۇيەسى دەپارتامەنتىنە قاراستى مەكەمەلەردە شامامەن 2000 ادام جازاسىن وتەپ جاتىر. قازاقستان رەسپۋبليكاسى كونستيتۋتسياسىنىڭ 30 جىلدىعىنا وراي، 300 سوتتالعان ادامعا راقىمشىلىق قاراستىرىلعان. بۇگىن وسى زاڭعا سايكەس العاشقى سوتتالعاندار بوستاندىققا شىقتى. بۇل جازاسىن وتەۋشىلەردىڭ ومىرىندەگى ماڭىزدى كەزەڭ، جاڭا ءومىردى تازا پاراقتان باستاۋعا، قوعامعا تولىققاندى ورالۋعا مۇمكىندىك بەرەدى، - دەلىنگەن حابارلامادا.
كوميتەتتەن تۇسىندىرگەندەي، راقىمشىلىق - جاي عانا كەشىرىم اكتىسى ەمەس، ءاربىر ازاماتتىڭ تۇزەلىپ، ەل دامۋىنا ءوز ۇلەسىن قوسۋعا مۇمكىندىگى بار بولاشاققا سالىنعان ينۆەستيتسيا.
- راقىمشىلىق اياسىندا بوساتىلعان ادامدارعا جاڭا ءومىر جاعدايىنا بەيىمدەلۋ ءۇشىن قاجەتتى قولداۋ كورسەتىلىپ جاتىر. ولار جۇمىسقا ورنالاسۋعا، الەۋمەتتىك بايلانىستى قالپىنا كەلتىرۋگە جانە قاجەتتى قۇجاتتى الۋعا كومەك الادى. مامان- پسيحولوگتار پسيحولوگيالىق كومەك كورسەتىپ، جاڭا داعدىنى مەڭگەرۋگە جانە قوعامعا تەز ءسىڭىپ كەتۋىنە جاردەمدەسىپ جاتىر. قوعام مۇنداي ادامدارعا تۇسىنىستىكپەن قاراپ، ولارعا قالىپتى ومىرگە ورالۋعا جانە قوعامعا پايدالى مۇشە بولۋعا مۇمكىندىك بەرۋى ماڭىزدى. تەك بىرلەسكەن كۇش-جىگەر ارقىلى ءبىز ولاردىڭ قايتا الەۋمەتتەنۋىنە جانە قۇقىق بۇزۋشىلىقتىڭ الدىن الۋعا قولايلى ورتا جاساي الامىز. راقىمشىلىق - بۇل اقىلمەن جانە جاۋاپكەرشىلىكپەن پايدالانۋعا ءتيىس مۇمكىندىك.
ايتا كەتسەك، 2025 -جىلعى 23 -ماۋسىمدا پرەزيدەنت راقىمشىلىق تۋرالى زاڭعا قول قويدى.
سونداي-اق راقىمشىلىققا قىلمىستىق جازاسىنىڭ سوڭعى جىلى قالعاندار بوساتىلاتىنى تۋرالى جازعان ەدىك.
