كونگرەسس ترامپتىڭ اسكەري وكىلەتتىكتەرى تۋرالى قاراردى بۇعاتتادى

استانا. KAZINFORM - ا ق ش وكىلدەر پالاتاسىنىڭ سپيكەرى مايك دجونسون (لۋيزيانا شتاتىنان رەسپۋبليكاشىل) ا ق ش-تىڭ يرانعا ارالاسۋىنا جول بەرمەۋگە باعىتتالعان اسكەري وكىلەتتىكتەر تۋرالى ەكى پارتيالى قارارعا قارسى شىقتى، بۇل پرەزيدەنت دونالد ترامپتى قولداۋدىڭ كورىنىسى بولدى، دەپ حابارلايدى The Hill.

وتكەن اپتادا توماس مەسسي (كەنتۋككي شتاتىنان رەسپۋبليكاشىل) جانە رو حاننا (كاليفورنيادان دەموكرات) ترامپتى كونگرەسس رۇقساتىنسىز شەتەلدە ا ق ش اسكەري كۇشتەرىن «پايدالانۋدى توقتاتۋعا» باعىتتايتىن سوعىس وكىلەتتىكتەرى تۋرالى قاراردى ۇسىندى.

- قازىر اسكەري وكىلەتتىك تۋرالى شەشىم قابىلداۋدىڭ وڭتايلى ۋاقىتى ەمەس دەپ سانايمىن جانە بۇل قاجەت دەپ ويلامايمىن، - دەپ مالىمدەدى مايك دجونسون.

سپيكەر 80 جىل بويى ەكى پارتيانىڭ دا پرەزيدەنتتەرى اسكەري سوققىلاردى كونگرەستىڭ ماقۇلداۋىنسىز سانكسيالاپ كەلگەنىن اتاپ ءوتتى. پرەزيدەنت دجو بايدەن تاياۋ شىعىستا ءۇش مارتە اسكەري وپەراتسيالار جۇرگىزدى. باراك وباما بولسا رەجيمدى تاقتان تايدىرۋ ءۇشىن ليۆياعا قارسى 8 ايلىق ناۋقاندى باستادى.

- مەن دەموكراتتاردىڭ بۇعان قارسى بولعانىن بۇرىن-سوڭدى ەستىگەن ەمەسپىن، ال بۇگىن ولار بۇلقان-تالقان بولىپ اشۋلانىپ جاتىر. مۇنىڭ ءبارى ساياسات. قازىر ساياساتتىڭ ۋاقىتى ەمەس، - دەپ قوسىپ ءوتتى سپيكەر.

دجونسوننىڭ ۇستانىمىنا قاراماستان، مەسسي مەن حاننا زاڭ جوباسى 17- ماۋسىمدا ۇسىنىلعان سوڭ 15 كۇننەن كەيىن دە قارار بويىنشا داۋىس بەرە الادى.

ا ق ش- تىڭ يرانعا اۋە شابۋىلىنا رەاكسيا ساياسي پارتيالار بويىنشا ءبولىندى: دەموكراتتار ترامپتىڭ كونگرەستىڭ رۇقساتىنسىز يرانعا شابۋىل جاساۋ شەشىمىن سىناسا، رەسپۋبليكاشىلدار تەگەراننىڭ يادرولىق باعدارلاماسىن تەجەۋ قادامىن قۇپتادى.

بۇعان دەيىن كونگرەسمەندەر ترامپتىڭ يزرايل مەن يران اراسىنداعى قاقتىعىسقا ارالاسۋ وكىلەتتىگىن شەكتەۋگە ۇمتىلعانى تۋرالى حابارلانعان بولاتىن.

اۆتور

زارينا تۋعانبايەۆا