كونەنىڭ كوزىندەي كوك ماشينا
«جامبىل - مەنىڭ جاي اتىم، حالىق - مەنىڭ شىن اتىم» دەپ جىر تيەگىن اعىتقان اقيىق اقىن جامبىل جابايەۆتىڭ ادەبي- مەموريالدى مۋزەيىندە شىعارماشىلىعى عانا ەمەس، تىرشىلىگىندە قولدانعان تۇرمىستىق زاتتارى مەن دومبىرا، شاپاندارى كوزدىڭ قاراشىعىنداي ساقتاۋلى تۇر.
بۇگىندە مۋزەي قورىندا 3310 جادىگەر بولسا، ونىڭ 2970 ءى نەگىزگى قوردى، 340 ى عىلىمي كومەكشى قوردى قۇرايدى.
اقىندار ەلىنە تابانى ءتيىپ، جامبىل اتانىڭ كوك كۇمبەزدى مۋزەيىنە كەلگەن قوناقتاردىڭ الدىمەن كولىكجايدا تۇرعان كوك ماشيناعا كوزى تۇسەرى انىق. «مەن مۇندالاپ» تۇرعان كولىك 1938 -جىلى جامبىل جابايەۆتىڭ اقىندىق شىعارماشىلىعىنىڭ 75 جىلدىعى اتالىپ، سول كەزدە اقىنعا 12 بولمەلى ءۇي سالىنىپ، گوركي اۆتوموبيل زاۋىتىنان 1932 -جىلى شىققان «م ك م1» ماركالى اۆتوكولىگى سىيعا بەرىلگەن.
«وزىنە ارناپ سالىنعان ۇيدە ءومىرىنىڭ سوڭىنا دەيىن تۇرعان. جامبىل اتا مەموريالدى مۋزەيىنىڭ بەس بولمەسى ەسكەرتكىش بولمەلەر، ياعني كوزى تىرىسىندە قولدانعان زاتتارى، كيگەن كيىمدەرى، سىيلىقتارى سول قالپى ساقتالعان. ال اتامىزعا بەرىلگەن اۆتوكولىك سول جىلدارى قازاقستان بويىنشا 6 اق ادامدا بولعان ەكەن. جامبىل اتامىزدى گريگوري باجەن جانە تۋىس ءىنىسى ناعاشىبەك بايسابايەۆ دەگەن ەكى جۇرگىزۋشىسى الىپ جۇرگەن. ءبىرى قالاعا تاسىمالداسا، ەكىنشىسى اۋىلداردى ارالاتقان. العاشىندا ماشينانىڭ ءتۇسى قاراكوك بولعان. 2008 -جىلى قايتا جوندەۋدەن ءوتىپ، ءتۇسى وزگەرتىلىپ، جۇرەتىن قالىپقا كەلتىرىلدى»، - دەيدى اقىننىڭ نەمەرەسى ءارى مۋزەيدىڭ ديرەكتورى سالتانات جامبىلوۆا.
اقىننىڭ مول مۇراسىنان سىر شەرتەتىن مۋزەيدە تاياعى، كەبىسى، ءماسىسى مەن بوركى، ويۋلى شاپاندارى ءىلىنىپ تۇر.
ۇلبوسىن يسابەك
egemen.kz
