كوپەن - كۇلكى كورولى نەمەسە اپەندىلەر اۋلەتى -ءازىل-شىنى ارالاس

Көпен
turkystan.kz

كوپەن امىربەك ۇلى - كوزى ءتىرى كەزىندە ءوز ەلى مەن وقىرماندارىنىڭ سىي- قۇرمەتىنە بولەنگەن قالامگەر. كوپەن - كۇلكى كورولى! قازاق ساتيراسىنىڭ ساردارى.

1988 -جىلى قازىرگى ءال- فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىنە وقۋعا ءتۇستىم. العاشقى كۋرس وقىپ جۇرگەن كەزىمدە گوگول كوشەسىندەگى 12-قاباتتى عيماراتتا ورنالاسقان «ارا» جۋرنالىنا باردىم.

سول كەزدە كوپەكەڭ وسى جۋرنالدىڭ جاۋاپتى حاتشىسى بولىپ ىستەيدى ەكەن. تانىستىق. ءجون سۇراستىق. تۇركىستاندىق ەكەنىمدى ءبىلىپ، «قوڭىراتسىڭ با؟»، - دەدى. «جوق، قاراشامىن»، - دەدىم. «قوڭىراتسىڭ عوي»، - دەپ ءبىر- اق كەستى. «مەنىڭ قوڭىرات ەكەنىمدى قايدان بىلەدى؟ اۋليە ەكەن عوي» دەپ قويدىم ىشتەي. سويتسەم، قاراشا سول قوڭىراتتىڭ ىشىندەگى رۋ ەكەن عوي. ول كەزدە رۋ، ءجۇز دەگەندى بىلمەۋشى ەدىك. سودان شاعىن ساتيرالىق تۋىندىلارىمدى تاستاپ كەتتىم. كوپ ۇزاماي جارىق كوردى. تاعى الىپ باردىم، تاعى شىقتى. ءسويتىپ ءجۇرىپ، ۇمبەتباي ۋايدين، تولىمبەك الىمبەك اعالارىممەن تانىستىم. ولار دا وسى جۋرنالدا قىزمەت ىستەيدى ەكەن. بۇدان كەيىن تۋىندىلارىمدى تولىمبەك اعاما دا تاستاپ كەتىپ ءجۇردىم. ءسويتىپ، «ارا» جۋرنالىنداعى بارلىق ساتيرا سەركەلەرىمەن ەتەنە ارالاسىپ كەتتىك.

ءبىر كۇنى ءبىزدىڭ وقۋ كورپۋسىمىزعا كوپەكەڭ كەلىپ، سەنبى كۇنى ساياجايدا جۇمىس ىستەۋگە اسارعا شاقىرىپ كەتتى. «قاسىڭا دوستارىڭدى ەرتىپ ال» دەدى. جازعان قۇلدا جان بار ما؟ كەلىسكەن كۇنى جانىما باۋىرجان عۇبايدۋللين، مۇحتار اتابەك، باقىتجان سوۆەتسكي، تاعى باسقا كۋرستاستارىمدى ەرتىپ باردىم. كەشكە دەيىن باۋ- باقشادا جۇمىس ىستەدىك. تۇسكى استى ۋاقىتىنان ءبىر مينۋت تا كەشىكپەي ءىشىپ، تويىپ الدىق. «كەدەيدىڭ ءبىر تويعانى - شالا بايىعانى» دەگەندەي، قارنىمىز تويىپ، ءبۇيىرىمىز شىعىپ قالدى. ءومىرى ءان ايتپايتىن باقىتجاننىڭ ءوزى ىڭىلداپ ءان سالدى. باۋىرجان باتىرلار جىرىنان ۇزىندىلەر وقىدى. ال اتابەك اريا ايتتى. مەن دە قاراپ قالماي، قۇرداستارىمدى قاجاپ، قالجىڭداپ ءجۇرمىن. ارا- اراسىندا كوپەكەڭ دە بىردە ءازىل، بىردە باسىنان وتكەن قىزىقتى وقيعالاردى ايتىپ، ءبىزدى ءبىر كۇلدىرىپ الادى. ءبىراق ءبارىمىزدىڭ ويىمىزدا «كەشكە تاماق بەرەر مە ەكەن؟» دەگەن الاڭ بار. سوعان قاراعاندا اش ادام بىردەي ءتۇس كورەدى- اۋ. نە كەرەك، سول كۇنى جوسپارداعى جۇمىستىڭ ءبارىن سول كەزدەگى كوممۋنيستىك پارتيانىڭ بەسجىلدىق جوسپارى سەكىلدى اسىرا ورىنداپ تاستادىق. كوپەكەڭ دە ءماز، ءبىز دە ءمازبىز. «قازىر ۇيگە بارىپ، جەڭگەلەرىڭنىڭ اسىپ جاتقان ەتىن جەيسىڭدەر» دەگەندە ءالى ۇيلەنبەگەن ايەلىمىز ۇل تاپقانداي ءبىر- بىرىمىزگە قاراپ، سانىمىزدى شاپاتتاپ قۋانىپ قالدىق. شىنىندا دا، سول كۇنى جەڭگەمىز وڭ جامباسىمەن تۇرعان با، ايتەۋىر ەتتى مولىنان اسىپتى. «جاقسى تاماق قالعانشا جامان قارىن جارىلسىن» دەگەن قاعيدانى ۇستانىپ، تاباقتى جالاپ- جۇقتاپ جەپ قويدىق. ودان تەرلەپ- تەپشىپ شاي ىشتىك. تۇنگە قاراي كوپەكەڭ كولىگىمەن جاتاقحاناعا دەيىن اپارىپ تاستادى. قويشى، ايتەۋىر نە كەرەك، سول كۇن اشقۇرساق ستۋدەنتتەر ءۇشىن قۇداي قاراسقان كۇن بولدى. سودان باستاپ «كوپەكەڭ قاشان اسارعا شاقىرار ەكەن؟» دەپ جول قاراپ جۇرەتىن بولدىق.

1999 -جىلدان باستاپ ءال- فارابي اتىنداعى قازاق ۇلتتىق ۋنيۆەرسيتەتىندە ءدارىس بەرىپ ءجۇر ەدىم. ءبىر كۇنى دەكانىمىز نامازالى وماشيەۆ شاقىرىپ جاتىر دەگەن سوڭ كابينەتىنە باردىم. سويتسەم، كوپەكەڭ وتىر. ولار كۋرستاس دوستار بولاتىن. ەكەۋىنىڭ ايتقانىنا قاراعاندا، «ارا» جۋرنالى قايتا اشىلادى ەكەن. سوعان ستۋدەنتتەرىمە ساتيرا جازعىزىپ، كومەكتەسۋىم كەرەك. ويتكەنى تەمىربەك قوجاكەيەۆ اعايدان كەيىن ساتيرانىڭ ارناۋلى كۋرسىن جۇرگىزۋشى ەدىم. مەنى جارتى ستاۆكامەن جۇمىسقا الاتىن بولدى. كەلىستىم. دەرەۋ ستۋدەنتتەرگە تاپسىرما بەرىپ، ساتيرالىق شىعارمالار جازدىردىم. ءوزىم دە بەردىم. سىرتتان باسقا دا اۆتورلاردىڭ تۋىندىلارىن تاپسىردىم. ويتكەنى مەن سول جىلدارى «جاس الاش» گازەتىنىڭ «ءبىر ءتۇرلى بەت» ساتيرالىق قوسىمشاسىنىڭ رەداكتورى ەدىم. قولىمدا ءبىراز ماتەريال بولاتىن. قىسقاسى، از ۋاقىتتىڭ ىشىندە ءبىر ەمەس، بىرنەشە نومىرگە جارايتىن ماتەريالدار بەردىم. ءسويتىپ، قولدان كەلگەنشە جۋرنالدىڭ اياقتان تۇرىپ كەتۋىنە سەپتىگىمىزدى تيگىزدىك. بۇل 2002 -جىل ەدى.

2004 -جىلى «ايقىن» گازەتى اشىلدى.

1-ءساۋىر كۇلكى كۇنىنە وراي كوپەكەڭنەن «اق سويلە» ايدارىنا ساتيرا تۋرالى سۇحبات الدىم. ول سۇحبات گازەتتە جاريالانىپ، كەيىن «قازىعۇرت» باسپاسىنان «تاۋەلسىزدىك تولعاۋى» سەرياسىمەن شىققان «اعىنان جارىلساق.. .» دەگەن جيناعىما ەندى. ءدال سول جىلى وسى باسپادان وسى سەريامەن «سۇحباتتىڭ ساردارلارى» اتتى جيناق تا جارىق كوردى. كىتاپتىڭ قۇراستىرۋشىسى - فيلولوگيا عىلىمدارىنىڭ كانديداتى، پروفەسسور ءساليما قالقابايەۆا. بۇل باسىلىمعا جۋرناليستيكا سالاسىندا ايانباي تەر توگىپ، ەلگە كەڭىنەن تانىلعان تاجىريبەلى پۋبليتسيستەردىڭ سۇحباتتارى توپتاستىرىلعان. كىتاپتىڭ ماقساتى - ناعىز مايتالمان جۋرناليستەردىڭ بۇگىنگى اقپاراتتىق قوعامداعى ەڭ جەدەل ءارى وتكىر جانر سانالاتىن سۇحباتتى دايىنداۋداعى شەبەرلىك سىرلارىمەن تانىستىرۋ. سوندا ايتايىن دەگەنىم، وسى جيناققا سۇلتان ورازالى، ساۋىتبەك ابدراحمانوۆ، كوپەن امىربەك، ديداحمەت ءاشىمحان ۇلى، قالي سارسەنباي، قاينار ولجاي، راۋشان تولەن قىزى، ۇلبوسىن ايتولەن جانە مەنىڭ سۇحباتتارىم ەنگىزىلىپتى. سوندا وسى كىتاپتى الىپ تۇرىپ، ءبىر- ءبىرىمىزدى قىزۋ قۇتتىقتاعانىمىزدى قالاي ۇمىتايىن؟ ! كەيىن ول جيناق ەلىمىزدىڭ بۇكىل كىتاپحاناسىنا تاراتىلدى.

سايىپقىران ساتيريك كوپەن امىربەك ۇلى 1950 -جىلى 29-ناۋرىزدا قازىرگى تۇركىستان وبلىسى وتىرار اۋدانىنا قاراستى ەشكىقورا دەگەن ەلدى مەكەندە تۋعان. اتا- اناسى سەگىز ۇل- قىزدى ءدىن امان ءوسىرىپ، ۇلىن ۇياعا، قىزىن قياعا قوندىرىپتى. سونىڭ ۇشەۋى - قىز، بەسەۋى - ۇل. ال سول بەس ۇلدىڭ مەن تانيتىن تورتەۋى جۋرناليست- جازۋشى. ءتولباسى - كوپەكەڭ. توپەن تام- تۇمداپ ساتيرا جازدى. اقتىق دەمى بىتكەنشە اۋداندىق «وتىرار القابى» گازەتىنىڭ رەداكتورى بولدى. بازاربەك - و باستان ساتيريك- اقىن ءھام جۋرناليست. بۇركەنشىك اتى - بالاپان بازار. كەزىندە «جاڭا فيلم» جۋرنالىندا اعا رەداكتور، «جاس قازاق» گازەتىندە جاۋاپتى حاتشى، قازاق راديوسىندا اعا رەداكتور، باس رەداكتور، وڭتۇستىك قازاقستان وبلىستىق تەلەارناسى ديرەكتورىنىڭ ورىنباسارى بولىپ ءبىراز جىل جەمىستى قىزمەت اتقاردى. قازىر ل. گۋميليەۆ اتىنداعى ە ۇ ۋ- دا باسپا ءسوز حاتشىسى. «ايىپ ەتپەڭىز»، «اۋديتوريا»، «كەش جارىق» اتتى كىتاپتاردىڭ اۆتورى. ەرسۇلتان «وتىرار»، «قازاقستان - شىمكەنت»، «حابار» تەلەارنالارىندا ەڭبەك ەتتى. قازىر تۇركىستان وبلىسى «قوعامدىق كەلىسىم» مەكەمەسى باسپا ءسوز ورتالىعىنىڭ قىزمەتكەرى، تۇركىستان وبلىسى ق ح ا جانىنداعى جۋرناليستەر مەن بلوگەرلەر كلۋبىنىڭ ءتوراعاسى. اقپارات سالاسىنىڭ ۇزدىگى.

مىنە، كورىپ وتىرسىزدار، شەتىنەن «سەن تۇر، مەن ايتايىن» دەگەن قالامگەرلەر. سوعان قاراعاندا، انالارى ەمىزگەن كەزدە سۇتىنە سيا قوسىپ بەرگەن- اۋ دەپ توپشىلايمىن. «اربانىڭ الدىڭعى دوڭگەلەگى قالاي جۇرسە، سوڭعى دوڭگەلەگى دە سولاي جۇرەدى» دەيدى اتام قازاق. سول ايتقانداي، كوپەكەڭنىڭ ىنىلەرىنىڭ ءبارى قالام ۇستاپ، قاعاز ءمۇجىدى، ءازىل جاراستىردى. سوزىمىزگە تۇزدىق رەتىندە مىنا اڭگىمەنى ايتا كەتكەنىمىز ءجون شىعار. بىردە- ءبىر جىگىت توپەنمەن تانىسپاق بولىپ ارنايى ىزدەپ كەلەدى. توپەن ەسىك الدىندا تۇرسا كەرەك. «توپەننىڭ ءۇيى قايسى ەكەن؟» دەيدى الگى جىگىت. «مىنا ءۇي» دەيدى توپەن. اۋلاعا كىرىپ، ۇيدەگىلەردەن «توپەن بار ما؟» دەپ سۇرايدى. «الگىندە عانا توپەنمەن سويلەسىپ تۇر ەدىڭ عوي» دەيدى. دەرەۋ سىرتقا شىعادى دا: «ءسىز توپەنسىز بە؟» دەيدى. «ءيا» دەيدى توپەن. «وندا جاڭا نەگە ايتپادىڭىز؟» دەيدى قوناق جىگىت تاڭدانىپ. سوندا توپەن: «سەن مەنەن توپەندى ەمەس، توپەننىڭ ءۇيىن سۇرادىڭ عوي» دەگەن ەكەن.

كىم بىلمەيدى امىربەكوۆ كوپەندى،

ازىلىمەن تانىتادى اكەڭدى.

ءبىر قاراساڭ، الداركوسە اتاسىنداي پىپ- پىسىق،

ءبىر قاراساڭ، قوجاناسىر اتاسىنداي اپەندى، -

دەگەن ەكەن كورنەكتى اقىن جاراسقان ءابدىراش. ءدال ايتقان. قاۋىپ ەمەس، تاۋىپ ايتقان. وسى ولەڭگە قاتىستى كوپەكەڭنىڭ ءوزى: «الداركوسە اتاسىنداي دەگەندى ءجۇرىس- تۇرىسىما، ءوزىمنىڭ جانرىما بايلانىستى ايتقان شىعار. ال وتكەن عۇمىرىمدى سارالاپ وتىرسام، كوپ ءومىرىم قوجاناسىر سەكىلدى اپەندىلىكپەن وتكەن ەكەن»، - دەيدى.

نەگىزى، كوپەكەڭ مەملەكەت جانە قوعام قايراتكەرلەرىنە ەپيگرامما، پاروديا جازۋدىڭ ءارى ءازىل ايتۋدىڭ شەبەرى ەدى عوي. سولاردىڭ ءبىر پاراسىن ايتا كەتەيىن.

بىردە بەلگىلى قالامگەرلەر شەرحان مۇرتازا، كامال سمايىلوۆ جانە كوپەن ۇشەۋى تۇسكى اس ءىشىپ وتىرادى. سوندا كامەكەڭ وڭتايلى ءساتتى پايدالانىپ:

- ءاي، كوپەن، سەن شەر- اعاڭ ەكەۋمىز تۋرالى پاروديا جازىپسىڭ. وقىدىم.

ەلىم، ساعان ايتام،

ەلباسى، سەن دە تىڭدا!

كامال دوس!

سەن دە قۇلاق ءتۇر.

سەبەبى - سەن سوقا،

ال مەن - تراكتور! -

دەپسىڭ. شەرحان - تراكتور، ال مەن سوعان تىركەلگەن سوقامىن با؟ - دەپ قاتتى وكپەلەيدى. سوندا شەر- اعاڭ:

- كامەكە، قۋ تراكتور ايدالادا ءوزى نە ىستەيدى؟ جەردىڭ ءبارىن جىرتاتىن، ءىستىڭ ءبارىن تىندىراتىن سويداق ءتىس سوقا ەمەس پە؟ ! كوپەن ءسىزدى سوقاعا دۇرىس تەڭەگەن، - دەيدى اراشا ءتۇسىپ. سوندا عانا اڭقىلداعان اقكوڭىل اعامىز:

- ا- ا، سولاي ما؟ - دەپ رياسىز كۇلىپ، كوپەكەڭە ءوز ريزاشىلىعىن ءبىلدىرىپتى.

ۇستازى ءارى باستىعى قالتاي مۇحامەدجانوۆ «ارا» جۋرنالىنىڭ باس رەداكتورلىعىنان كەتىپ، حالىقارالىق «تۇركىستان» گازەتىنىڭ باس رەداكتورلىق قىزمەتىنە اۋىسادى. «گەنەرال بولۋدى ارمانداماعان سولدات سولدات ەمەس» دەگەندەي، قولىنا قالام ۇستاعان ءبىراز قالامگەر سول بوس ورىنعا وتىرۋعا جانتالاسىپ باعادى. ولاردىڭ اراسىندا «ارا» جۋرنالىنىڭ جاۋاپتى حاتشىسى كوپەن امىربەك تە بولسا كەرەك. ءبىراق «قۋعان جەتپەيدى، بۇيىرعان كەتپەيدى» دەمەكشى، «ارا» جۋرنالىنىڭ باس رەداكتورى بولىپ بەلگىلى سىنشى سايلاۋبەك جۇمابەكوۆ تاعايىندالادى. كوپ ۋاقىت وتپەي، الگى قىزمەتتەن دامەلى بولعان كوپەنگە جورا- جولداستارى جولىعىپ قالىپ:

- كوپەن، «ارا» جۋرنالىنىڭ باس رەداكتورلىعىنا لايىق ءبىر ادام بولسا، سول سەن ەدىڭ. قالاي، جايلى ورىنعا جايعاستىڭ با؟ - دەپ سۇرايدى.

سوندا كوپەن:

- قوجا كەتىپ، ونىڭ ورنىنا قوجا زامەنيتەل كەلدى عوي، - دەگەن ەكەن قالتاي مۇحامەدجانوۆتىڭ رۋى قوجا ەكەنىن مەڭزەپ.

بىردە كوپەكەڭ ەل تاۋەلسىزدىگىنىڭ قارساڭىندا قازاقستان جازۋشىلار وداعى باسقارماسىنىڭ ءتوراعاسى نۇرلان ءورازاليننىڭ ۇسىنىسىمەن «پاراسات» وردەنىن الادى. سالتاناتتى جيىندا وداق ءتوراعاسىنا العىس ايتىپ تۇرىپ:

- نۇرەكە، ارزىمايتىن ەڭبەگىمىزدى ەلەپ- ەسكەرىپ، وردەن بەرگەنىڭىزگە راحمەت! ەندى ورنىڭىزدى بەرسەڭىز، دۇرىس بولار ەدى، - دەگەن ەكەن ازىلدەپ.

ايتىستىڭ اتاسى اتانعان ءجۇرسىن مەن كوپەكەڭ جاقىن دوس. وتباسى بولىپ ارالاسادى. بىردە ءجۇرسىننىڭ اناسى قاتتى اۋىرىپ قالادى. ءجۇرسىننىڭ اناسى - دوستارىنىڭ دا اناسى. سوندىقتان انالارىنىڭ كوڭىلىن سۇراپ ءجۇرسىننىڭ دوستارى مەن كۋرستاستارى كەلەدى. سوندا ول سوڭعى اماناتىن ايتقانداي بولىپ:

- ەگەر مەن ولاي- بۇلاي بولىپ كەتسەم، جالعىز ءجۇرسىنىمدى سەندەرگە تاپسىردىم، - دەپتى. سوندا كوپەكەڭ قاراپ تۇرماي:

- جوق، اپا، قايتا ءبىزدى جۇرسىنگە تاپسىرىپ كەتىڭىزشى، - دەگەن ەكەن ازىلگە بۇرىپ. ونىسى - ءجۇرسىننىڭ وزدەرىنە قاراعاندا الدەقايدا باي- قۋاتتى ەكەنىن مەڭزەگەنى عوي.

قازاقتىڭ بەلگىلى اقىندارى، ەرلى- زايىپتى قايىربەك اسانوۆ پەن كۇلاش احمەتوۆا كوپەن اعامىزدىڭ ءازىلى جاراسقان كۋرستاستارى. ءبىر كۇنى كوپەكەڭ كۋرستاستارىنىڭ ۇيىنە بارادى. قاي قالامگەردىڭ ۇيىنە بارسا دا، كوپەكەڭ الدىمەن كىتاپحاناسىن قارايدى ەكەن. سول ادەتىنە باسىپ، قوس كۋرستاسىنىڭ كىتاپحاناسىن قاراپ تۇرسا، سورەدە كۇلاشتىڭ «كۇن شىققاندا كۇلىپ ويان» اتتى جالعىز كىتابى تۇر ەكەن.

- مەندە سەنىڭ «ارعىماقتار دالاسى» دەگەن كىتابىڭ بار، - دەيدى كوپەن.

سوندا كۇلاشتىڭ ەكى كوزى شىراداي جانىپ:

- ءوز كىتابىمدى وزىمە سىيلاشى، - دەيدى قۋانىپ.

- جارايدى. ادەتتە، اقىندار كىتابىن قولتاڭبا بەرىپ، وقىرمانىنا ۇسىنۋشى ەدى. ال مەن ساعان كەرىسىنشە، وزىڭە ارناۋ جازىپ قايتارايىن، - دەپتى دە مىنا ولەڭ جولدارىن جازىپ بەرىپتى:

كۇلىپ ويان، كۇلاش- اۋ،

توپ جارساڭ دا توعايما.

ولەڭ، شىركىن - ءبىر اساۋ،

باس ءبىلدىرۋ وڭاي ما؟

ولەڭ، شىركىن - ارعىماق،

اقىن دەگەن - شاباندوز.

قىزىعاتىن اركىم- اق،

اللا بەردى ساعان بوز.

كۇرەڭى نە، بوزى نە -

«ارعىماعى» بۇل قىزدىڭ!

ءوز اتىڭدى وزىڭە،

ءوزىم قايتا مىنگىزدىم.

كەرەمەت پە؟ كەرەمەت! مىنە، كوپەننىڭ كىرشىكسىز كۇلكىسى وسىنداي! مۇنداي ازىلدەردەن بازاربەك اعامىز دا، ەرسۇلتان ءىنىمىز دە كەندە ەمەس. سوندىقتان امىربەكتىڭ اۋلەتىن اپەندىلەر اۋلەتى دەسەك، جاراساتىن شىعار.

باعزى زاماندا عۇلاما عالىم ءجۇسىپ بالاساعۇن:

ول كەزىندە ريزا بولدى، ەلەندى،

وي، ءبىلىمى سىي- قۇرمەتكە بولەندى، -

دەگەن ەكەن. سول ايتقانداي، كوپەن امىربەك ۇلى - كوزى ءتىرى كەزىندە ءوز ەلى مەن وقىرماندارىنىڭ سىي- قۇرمەتىنە بولەنگەن قالامگەر. كوپەن - كۇلكى كورولى! قازاق ساتيراسىنىڭ ساردارى. الدىمەن ونىڭ قازاق ساتيراسى مەن ادەبيەتى قورجىنىنا سالعان قۇندى ەڭبەكتەرىن اتاپ وتكەنىمىز ابزال. ول - «اتى جوق كىتاپ»، «الىپ»، «ءتىلىم قىشىپ بارادى»، «قىسىر اڭگىمە»، «مىڭ ءبىر مىسال»، «اۋىزباستىرىق»، «ءوزىڭدى تانيسىڭ با؟»، «باتپانقۇيرىق»، «حامزا قاجى»، «كوكەمنىڭ كوزى»، «پا، شىركىن، پاروديا!»، «سويلە دەسەڭ، سويلەيىن»، «جۇما سالەم» جانە تاياۋدا عانا جارىق كورگەن بەس تومدىق «كوپەن كەلە جاتىر!» اتتى كىتاپتاردىڭ اۆتورى. وسى كىتاپتاردىڭ قاي- قايسىسىن الساڭىز دا، تالعامى زور وقىرمانداردىڭ كوڭىلىنەن شىعىپ، جادىندا جاتتالعان جيناقتار. سوندىقتان دا ۇكىمەت ونىڭ ەرەن ەڭبەگىن دەر كەزىندە باعالاپ، سوعان لايىق ماراپاتتادى.

كوپەن امىربەك ۇلى - پرەزيدەنت سىيلىعىنىڭ يەگەرى. حالىقارالىق «الاش» ادەبي سىيلىعىنىڭ لاۋرەاتى، قازاقستاننىڭ ەڭبەك سىڭىرگەن قايراتكەرى. «پاراسات» وردەنىنىڭ يەگەرى.

كوپەكەڭنىڭ قازاسىن تۇركيادا ءجۇرىپ ەستىدىم. جانازاسىنا قاتىسىپ، اقتىق ساپارعا شىعارىپ سالا المادىم. ءبىراق الماتىدا بەرىلگەن اسقا قاتىسىپ، ەل- جۇرت پەن ەت جاقىندارىنا كوڭىل ايتتىق.

مىنە، كوپەكەڭنىڭ مىنا جالعاندى تارك ەتىپ، باقيعا وزعانىنا دا جىل تولىپ قالىپتى. وسى ۋاقىت ارالىعىندا ناماز سايىن كوپەكەڭنىڭ ارۋاعىنا قۇران باعىشتاپ كەلەمىز. اللا تاعالا سول دۇعامىزدى قابىل ەتىپ، جانىن ءجانناتتان ەتسىن!

ەرماحان شايحى ۇلى،

قازاقستان جازۋشىلار وداعى

ساتيرا كەڭەسىنىڭ ءتوراعاسى

turkystan.kz

سوڭعى جاڭالىقتار