كولىك قاققان «ليۆەرپۋل» كلۋبى جانكۇيەرلەرىنىڭ جاعدايى ءمالىم بولدى

استانا. KAZINFORM - «ليۆەرپۋل» كلۋبى جانكۇيەرلەرىن كولىك قاعۋ وقيعاسى سالدارىنان 65 ادام زارداپ شەگىپ، ولاردىڭ 11 ى اۋرۋحانادا جاتىر، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

دۇيسەنبى كۇنى اعىلشىن پرەمەر-ليگاسىنداعى «ليۆەرپۋل» كومانداسىنىڭ جەڭىسىن تويلاپ جاتقان جانكۇيەرلەردى كولىك قاعىپ كەتىپ، 11 ادام اۋرۋحاناعا تۇسكەن بولاتىن. زارداپ شەككەندەردىڭ بارلىعى 65 ادامعا جەتتى.

وقيعا جەرگىلىكتى ۋاقىت بويىنشا ساعات 18:00-دە ليۆەرپۋل ورتالىعىندا بولدى. قالا كوشەلەرىندە كولىك قوزعالىسىنا شەكتەۋ قويىلعان بولاتىن. الايدا وقيعا بولعانعا دەيىن از ۋاقىت بۇرىن جۇرەك تالماسى ۇستاۋى مۇمكىن دەگەن كۇدىكپەن شاقىرىلعان جەدەل جاردەم كولىگى ءۇشىن بۇل شەكتەۋ ۋاقىتشا الىنعان ەدى.

جەگىلىكتى پوليتسيا باسشىسى دجەنني سيمستىڭ سوزىنشە، Ford Galaxy ماركىلى كولىگىنىڭ جۇرگىزۋشىسى جەدەل جاردەم كولىگىنىڭ ارتىنان ءجۇرىپ وتىرعان. ءسويتىپ، كولىك جانكۇيەرلەردى سوققان. وقيعا سالدارىنان 11 ادام اۋرۋحانادا جاتىر. ولاردىڭ جاعدايى تۇراقتى دەپ باعالانىپ وتىر.

الايدا ليۆەرپۋل مەرى ستيۆ روزەرام سەيسەنبى كۇنى تاڭ اتا ءتورت ادامنىڭ جاعدايى اۋىر ەكەنىن جەتكىزدى.

شاماسى اڭگىمە ءورت سوندىرۋشىلەر ايتقان كولىكتىڭ استىندا قالىپ قويعان ادامدار تۋرالى بولۋى كەرەك. ويتكەنى ول ادامداردى شىعارۋ ءۇشىن كولىكتى كوتەرۋ كەرەك بولعان.

پوليتسيا 53 جاستاعى بريتانيالىق ليۆەرپۋل تۇرعىنىن ۇستادى. ول كىسى ولتىرۋگە وقتالدى، كولىكتى قاۋىپتى جانە ەسىرتكىگە ماس كۇيدە جۇرگىزدى دەگەن كۇدىكپەن قاماۋعا الىندى.

كۇدىكتى قاماۋدا وتىر، وقيعا بويىنشا تەرگەلىپ جاتىر. دۇيسەنبى كۇنى كەشكىسىن پوليتسيا «بۇل تەراكت بولۋى مۇمكىن» دەگەن نۇسقانى جوققا شىعاردى.

وسىعان دەيىن «ليۆەرپۋل» كلۋبىنىڭ جانكۇيەرلەرىن كولىك باسىپ كەتكەنى تۋرالى حابارلاعان بولاتىنبىز.