كولىك مينيسترلىگى تاكسيلەردىڭ قالاارالىق تاسىمالىنا شەكتەۋ قويۋ ماسەلەسىنە قاتىستى پىكىر ءبىلدىردى

استانا. KAZINFORM - كولىك مينيسترلىگى تاكسوموتور تاسىمالى سالاسىنداعى جەتەكشى ينتەرنەت-پلاتفورمالارمەن بىرلەسىپ كورسەتىلەتىن قىزمەتتىڭ قاۋىپسىزدىگى مەن ساپاسىن ارتتىرۋ بويىنشا جۇمىستار جۇرگىزۋدە، دەپ حابارلايدى مينيسترلىكتىڭ باسپا ءسوز قىزمەتى.

باسپا ءسوز قىزمەتىنىڭ مالىمەتتەرىنە قاراعاندا، بۇگىنگى كۇنى وسى نارىقتا قىزمەت كورسەتۋشىلەردەن ۇسىنىستار قابىلدانىپ ولاردى زەردەلەۋ جانە ەگجەي-تەگجەيلى تالقىلاۋعا بايلانىستى جۇمىستار جۇرگىزىلۋدە.

بارلىق سۇراقتار مەن ۇسىنىستار جۇيەلەنىپ، مىندەتتى تۇردە قوعامدىق تالقىلاۋدان وتەدى.

الەمدىك تاجىريبەدە دە، ءبىزدىڭ مەملەكەت اۋماعىندا دا حالىقتى تاسىمالداۋ قاۋىپسىزدىگىن قامتاماسىز ەتۋ بويىنشا بازالىق تالاپتار بەلگىلەنگەن، مىسالى:

- كولىكتى تەحنيكالىق باقىلاۋدان وتكىزۋ؛

- جۇرگىزۋشىنىڭ رەيس الدىنداعى مەديتسينالىق تەكسەرۋدەن ءوتۋى؛
- جۇرگىزۋشىنىڭ جۇمىس جانە دەمالىس رەجيمىن ساقتاۋى؛

- جىلدامدىق رەجيمىن ساقتاۋ؛

- تاسىمالداۋ سالاسىندا تەك سول جاقتى رۋلى بار اۆتوكولىكتىڭ جۇمىس ىستەۋى؛

- تاسىمالداۋشىدا ساقتاندىرۋدىڭ بولۋى؛

- تاسىمالداۋ سالاسىندا ەل اۋماعىندا تىركەلگەن اۆتوموبيلدىڭ عانا جۇمىس ىستەۋى.

وكىنىشكە قاراي، جوعارىدا اتالعان تالاپتاردى ينتەرنەت-پلاتفورمالار ارقىلى جۇمىس ىستەيتىن جۇرگىزۋشىلەر ءجيى ساقتامايدى. بۇل جولاۋشىلاردىڭ قاۋىپسىزدىگىنە تىكەلەي اسەر ەتەدى.

قايعىلى جاعدايعا سوقتىرعان اپاتتىڭ كوپ بولىگى قوزعالىس جىلدامدىعى جوعارى قالاارالىق تراسسالاردا بولىپ جاتادى. تيىسىنشە، باستى نازار قالاارالىق جولاۋشىلار تاسىمالىمەن اينالىساتىن تاكسيلەرگە دە باعىتتالعان.

«ايتا كەتۋ كەرەك، جولاۋشىلار تاسىمالىنىڭ قاۋىپسىزدىگىن جانە جولاۋشىلارعا قولايلى جاعداي جاساۋ جۇمىستارى ودان ءارى ءوز جالعاسىن تابادى»، - دەلىنگەن حابارلامادا.

اۆتور
ايدار وسپانالي