كولىك جۋۋ ورىندارى ءۇشىن سۋ تاريفى ەسەلەپ كوتەرىلۋى مۇمكىن

автомойка
Фото: pixabay.com

استانا. KAZINORM - كولىك جۋۋ ورىندارى ءۇشىن سۋ تاريفى ەسەلەپ كوتەرىلۋى مۇمكىن. بۇل تۋرالى ۇكىمەت وتىرىسىنان كەيىنگى بريفينگتە سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ ايتتى.

«قازاقستاندا جالپى سۋ رەسۋرستارى كولەمىنىڭ نە ءبارى 1,3 پايىزى عانا اۋىز سۋعا پايدالانىلادى. ياعني، بۇل 1,3 شارشى شاقىرىم سۋ دەگەن ءسوز. ساراپتاما جاساعان كەزىمىزدە شامامەن 200 ميلليون شارشى شاقىرىم سۋدى تەحنيكالىق قىزمەت كورسەتۋ ستانسالارىنىڭ اۆتوكولىكتەردى جۋۋعا شىعىندايتىندىعىن انىقتادىق»، - دەدى مينيستر ب ا ق وكىلدەرىنىڭ ساۋالىنا وراي.

ونىڭ اتاپ وتۋىنشە، اۋىز سۋدى باسقا قاجەتتىلىككە پايدالاناتىندارعا تاريف كوتەرىلەتىن بولادى.

«قازىرگى ۋاقىتتا ءبىز سۋ كودەكسىندە قانداي دا ءبىر ارالىق نورما قاراستىرعىمىز كەلەدى. ازىرشە ناقتىلاعان جوقپىز، تالقىلاپ جاتىرمىز. تەحنيكالىق قىزمەت كورسەتۋ ستانسالارىندا اۋىز سۋدى پايدالاناتىن كاسىپكەرلەر بەلگىلى ءبىر ۋاقىت ارالىعىندا اۆتوموبيل جۋۋعا قولدانعان سۋدى تازالايتىن جابدىق ورناتۋى ءتيىس. ياعني، سۋدى قايتادان پايدالانۋى قاجەت. ەكىنشى ماسەلە - تاريف بويىنشا شەشەمىز. دەمەك، اۋىز سۋدى باسقا قاجەتتىلىككە پايدالاناتىندارعا تاريف الدەقايدا جوعارى بولادى»، - دەدى نۇرجان نۇرجىگىتوۆ.

سوڭعى جاڭالىقتار