كولىك ءمينيسترى دانيال احمەتوۆتىڭ كۇيەۋ بالاسىنىڭ ق ت ج- داعى قىزمەتى تۋرالى پىكىر ءبىلدىردى

استانا. KAZINFORM - ۇكىمەت وتىرىسىنان كەيىن وتكەن باسپا ءسوز ءماسليحاتىندا كولىك ءمينيسترى مارات قارابايەۆقا «قازاقستان تەمىر جول» كومپانياسىنداعى كادر ساياساتى تۋرالى سۇراق قويىلدى.

«ق ت ج ەكسپرەسستەگى» جۇمىسشىلاردىڭ 85 پايىزى تەمىرجولشى ەمەس، تامىر-تانىستىق ارقىلى قىزمەتكە الىنعان ەكەن. ءبىزدىڭ تەمىر جولىمىز قالاي داميدى. مىسالى، ق ت ج باسشىسى نۇرلان ساۋرانبايەۆ بولسا، ونىڭ ورىنباسارى نۇرلان قويشىبايەۆ دانيال احمەتوۆتىڭ تۋعان كۇيەۋ بالاسى. ال «ق ت ج ەكسپرەسكە» دامير قوجاحمەتوۆ دەگەن IT- مامان باسشى بولىپ كەلدى. ماماننىڭ ءبارى تانىس-تامىر ارقىلى عانا جۇمىسقا الىناتىن بولسا، بۇل سالا قالاي داميدى؟» - دەپ سۇرادى جۋرناليست.

مينيستر «ق ت ج ەكسپرەسكە» IT- ماماننىڭ باسشى بولىپ كەلۋى سالانى سيفرلاندىرۋمەن بايلانىستى دەگەن ءۋاج ايتتى.

«بۇل جەردە ماسەلە بىلاي. ءسىزدىڭ 85 پايىز دەگەن اقپاراتىڭىزدى قايتا تەكسەرۋ كەرەك. ونداي بولۋى مۇمكىن ەمەس. جالپى ق تج - دا ەمەس، ءسىز «ق ت ج ەكسپرەستىڭ» ءوزىن اتاپ وتىرسىز. ق ت ج- نىڭ وزىندە بىلىكتى ماماندار جۇمىس ىستەيدى. سول سالادا اۋلەتىمەن جۇمىس ىستەپ كەلە جاتقان، ەكىنشى ءۇشىنشى ۇرپاعى جۇمىس ىستەپ كەلە جاتقان وتباسىلار بار.

ال «ق ت ج ەكسپرەستىڭ» وزىنە توقتالساق، ول - تاسىمالداۋشى كومپانيا. ونىڭ باستى جۇمىسى تاۋار الىپ، سونى تاسىمالداۋ. تاسىمالداۋدىڭ وزىمەن جەرگىلىكتى جۇك تاسۋشى كومپانيالار اينالىسادى»، - دەدى مينيستر.

ۆەدومستۆو باسشىسى «ق ت ج ەكسپرەسس» ماركەتينگتىك كومپانيا سياقتى قۇرىلىم ەكەنىن ايتادى.

«ماركەتينگ كومپانيا بولعان سوڭ، ول جاقتا ءتىل بىلەتىن ادام كەرەك. تەمىرجول سالاسىنىڭ مامان بولعانى مىندەتتى ەمەس. شەتەلدىكتەرمەن سويلەسەتىن، تاۋار تابا الاتىن، سول تاۋاردى باسقا ەلگە ساتا الاتىن، بىلايشا ايتقاندا، ماركەتينگكە جاقىنداۋ كىسىلەر دە بولۋعا ءتيىس. سوندىقتان «ق ت ج ەكسپرەستە» ءار ادام ءوزىنىڭ بىلىكتىلىگىنە سايكەس قىزمەت اتقارىپ جاتىر دەپ ويلايمىن. IT - ماماندى ايتىپ جاتىرسىز عوي، قازىر ەڭ باستى ماسەلە وسى سالانى سيفرلاندىرۋ بولىپ تۇر. سوندىقتان ول جاققا IT - مامان سۋداي قاجەت. ويتكەنى ول جاقتا سيفرلاندىراتىن ماسەلە وتە كوپ»، - دەدى مارات قارابايەۆ.