كولىك ءمينيسترى: الداعى مەرەكەلەردە پويىز بيلەتى قىمباتتامايدى
استانا. KAZINFORM - كولىك ءمينيسترى مارات قارابايەۆ ۇكىمەت وتىرىسىنان كەيىن وتكەن باسپا ءسوز ءماسليحاتىندا الداعى مەرەكەلەردە پويىز بيلەتى قىمباتتامايتىنىن ءمالىم ەتتى.
«تەمىرجول تاريفتەرىن كوتەرۋ جوباسىنىڭ بيلەت باعاسىنا ەش قاتىسى جوق. ول تەك جۇك تاسىمالدايتىن تاريفتەرگە عانا بايلانىستى. جولاۋشىلار تاسىمالدايتىن پويىزداردىڭ بيلەتىنىڭ باعاسى اۋىسپايدى.
كەلەسى جىلى دا، الداعى مەرەكەلەردە دە ەشقانداي وزگەرىس بولمايدى. باعا قالىپتى بولادى»، - دەدى ول جۋرناليستىڭ سۇراعىنا بەرگەن جاۋاپتا.
مينيستر تەمىرجول ينفرقۇرىلىمىن جاڭارتۋ، جاڭا ۆاگوندار مەن لوكوموتيۆ ساتىپ الۋ شىعىندارى بيلەت باعاسىنا اسەر ەتپەيدى دەپ وتىر.
«1- قازاننان باستاپ جولاۋشىلار پويىزىنىڭ باعاسى قىمباتتادى. ودان باسقا قىمباتتاۋ الداعى ۋاقىتتا جوسپارلانىپ وتىرعان جوق. باعا تۇراقتى بولادى. الداعى مەرەكەلەردىڭ بارشاسىندا باعا تۇراقتى بولادى»، - دەدى مارات قارابايەۆ.
اۆتور
ەسىمجان ناقتىباي
